ഉക്രൈൻ: നാനൂറിലധികം ഇന്ത്യൻ പൗരന്മാരെ രണ്ട് വിമാനങ്ങളിലായി രാജ്യത്ത് എത്തിച്ചു

ന്യൂഡൽഹി: ഉക്രെയ്നിൽ കുടുങ്ങിയ 250 ഇന്ത്യൻ പൗരന്മാരുമായി എയർ ഇന്ത്യയുടെ രണ്ടാമത്തെ ഒഴിപ്പിക്കൽ വിമാനം ഞായറാഴ്ച പുലർച്ചെ റൊമാനിയൻ തലസ്ഥാനമായ ബുക്കാറെസ്റ്റിൽ നിന്ന് ഡൽഹി വിമാനത്താവളത്തിലെത്തി. സിവിൽ ഏവിയേഷൻ മന്ത്രി ജ്യോതിരാദിത്യ സിന്ധ്യ അവരെ സ്വാഗതം ചെയ്തു.

ഞായറാഴ്ച പുലർച്ചെ 2.45 ഓടെ 250 ഇന്ത്യൻ പൗരന്മാരുമായി രണ്ടാമത്തെ എഐ1942 വിമാനം ഡൽഹി വിമാനത്താവളത്തിൽ എത്തിയതായി അധികൃതർ പറഞ്ഞു.

“നിങ്ങളുടെ എല്ലാ സുഹൃത്തുക്കളോടും സഹപ്രവർത്തകരോടും ഞങ്ങൾ അവർക്കൊപ്പമുണ്ടെന്നും അവരുടെ സുരക്ഷിതമായ തിരിച്ചുവരവ് ഞങ്ങൾ ഉറപ്പുനൽകുമെന്നും ഈ സന്ദേശം അറിയിക്കുക,” മന്ത്രി പറഞ്ഞു.

പ്രധാനമന്ത്രി നരേന്ദ്ര മോദിക്ക് വേണ്ടി ഞാൻ നിങ്ങളെ സ്വാഗതം ചെയ്യുന്നുവെന്നും സിന്ധ്യ പറഞ്ഞു. നിങ്ങളെയെല്ലാം തിരികെ കൊണ്ടുവരാൻ വളരെയധികം പരിശ്രമിച്ച എയർ ഇന്ത്യ ടീമിനെയും ഞാൻ അഭിനന്ദിക്കുന്നു.

ഫെബ്രുവരി 24 ന് രാവിലെ ഉക്രേനിയൻ അധികൃതർ തങ്ങളുടെ രാജ്യത്തിന്റെ വ്യോമാതിർത്തി അടച്ചിരുന്നു. അതിനാൽ ഇന്ത്യക്കാരെ നാട്ടിലേക്ക് കൊണ്ടുവരാൻ ഈ വിമാനങ്ങൾ ബുക്കാറെസ്റ്റിൽ നിന്നും ബുഡാപെസ്റ്റിൽ നിന്നുമാണ് പ്രവർത്തിക്കുന്നത്.

റോഡ് മാർഗം ഉക്രെയ്ൻ-റൊമാനിയ, ഉക്രെയ്ൻ-ഹംഗറി അതിർത്തിയിലെത്തിയ ഇന്ത്യൻ പൗരന്മാരെ ഇന്ത്യൻ സർക്കാർ ഉദ്യോഗസ്ഥരുടെ സഹായത്തോടെ യഥാക്രമം ബുക്കാറെസ്റ്റിലേക്കും ബുഡാപെസ്റ്റിലേക്കും റോഡ് മാർഗം കൊണ്ടുപോയി. അതുവഴി അവരെ എയർ ഇന്ത്യ വിമാനത്തിൽ ഇന്ത്യയിലേക്ക് കൊണ്ടുപോകാൻ കഴിഞ്ഞു എന്ന് ഉദ്യോഗസ്ഥർ പറഞ്ഞു.

ഉക്രെയ്നിൽ കുടുങ്ങിക്കിടക്കുന്ന പൗരന്മാരെ കൊണ്ടുവരാൻ സർക്കാർ ഒരു ഫീസും ഈടാക്കുന്നില്ലെന്നും അവര്‍ പറഞ്ഞു.

ഏകദേശം 13,000 ഇന്ത്യക്കാർ ഇപ്പോഴും ഉക്രെയ്നിൽ കുടുങ്ങിക്കിടക്കുന്നുണ്ടെന്ന് സിന്ധ്യ വിമാനത്താവളത്തിൽ മാധ്യമ പ്രവർത്തകരോട് പറഞ്ഞു.

“അവിടെ (ഉക്രെയ്ൻ) വളരെ സെൻസിറ്റീവ് സാഹചര്യമാണുള്ളത്. ഈ സാഹചര്യത്തിൽ ഞങ്ങൾ ടെലികമ്മ്യൂണിക്കേഷൻ വഴി വിദ്യാർത്ഥികളുൾപ്പെടെ ഓരോ ഇന്ത്യൻ പൗരനുമായും സംസാരിക്കുന്നു. ഞങ്ങൾ അവരെ എത്രയും വേഗം തിരികെ കൊണ്ടുവരും,” മന്ത്രി പറഞ്ഞു.

മടങ്ങിയെത്തിയ ഇന്ത്യക്കാരെ വിമാനത്താവളത്തിൽ സ്വാഗതം ചെയ്യുന്ന സിന്ധ്യയുടെ ചിത്രങ്ങൾ എയർ ഇന്ത്യ ട്വിറ്ററിൽ പങ്കുവച്ചിട്ടുണ്ട്.

16,000 ത്തോളം ഇന്ത്യക്കാർ ഉക്രെയ്നിൽ കുടുങ്ങിക്കിടക്കുന്നുണ്ടെന്നും അവരിൽ ഭൂരിഭാഗവും വിദ്യാർത്ഥികളാണെന്നും വിദേശകാര്യ സെക്രട്ടറി ഹർഷ് വർധൻ ശ്രിംഗ്ല ഫെബ്രുവരി 24 ന് പറഞ്ഞിരുന്നു.

ഹെൽപ്പ് ലൈൻ നമ്പറുകൾ ഉപയോഗിച്ച് ഇന്ത്യൻ സർക്കാർ ഉദ്യോഗസ്ഥരുമായി ഏകോപിപ്പിക്കാതെ ഒരു അതിർത്തി പോസ്റ്റിലേക്കും നീങ്ങരുതെന്ന് ഉക്രെയ്നിലെ ഇന്ത്യൻ എംബസി ശനിയാഴ്ച ട്വീറ്റ് ചെയ്തിരുന്നു.

വിവിധ അതിർത്തി ചെക്ക് പോസ്റ്റുകളിലെ സാഹചര്യം സെൻസിറ്റീവാണെന്നും നമ്മുടെ പൗരന്മാരെ ഏകോപിപ്പിച്ച് ഒഴിപ്പിക്കാൻ അയൽരാജ്യങ്ങളിലെ ഞങ്ങളുടെ എംബസികളുമായി എംബസി തുടർച്ചയായി പ്രവർത്തിക്കുന്നുണ്ടെന്നും അതിൽ പറഞ്ഞിരുന്നു.

തങ്ങളെ അറിയിക്കാതെ അതിർത്തി ചെക്ക് പോസ്റ്റുകളിലെത്തിയ ഇന്ത്യക്കാരെ ഒഴിപ്പിക്കുന്നത് പ്രയാസകരമാണെന്ന് എംബസി അറിയിച്ചു.

പടിഞ്ഞാറൻ ഉക്രെയ്നിലെ നഗരങ്ങളിൽ താമസിക്കുന്ന ആളുകൾ താരതമ്യേന “സുരക്ഷിത” അന്തരീക്ഷത്തിലാണ് ജീവിക്കുന്നതെന്നും അടിസ്ഥാന സൗകര്യങ്ങൾക്ക് പ്രവേശനമുണ്ടെന്നും അതിൽ പറയുന്നു. “ജലം, ഭക്ഷണം, പാർപ്പിടം, അടിസ്ഥാന സൗകര്യങ്ങൾ എന്നിവയുള്ള ഉക്രെയ്നിലെ പടിഞ്ഞാറൻ നഗരങ്ങളിൽ താമസിക്കുന്നത് സ്ഥിതിഗതികളെക്കുറിച്ച് പൂർണ്ണമായി അറിയാതെ അതിർത്തി ചെക്ക്‌പോസ്റ്റുകളിൽ എത്തുന്നതിനേക്കാൾ വളരെ സുരക്ഷിതമാണ്,” അതിൽ പറയുന്നു.

ഇപ്പോൾ കിഴക്കൻ മേഖലയിൽ താമസിക്കുന്ന എല്ലാ ആളുകളോടും കൂടുതൽ ഉത്തരവുകൾ ഉണ്ടാകുന്നതുവരെ താമസസ്ഥലത്ത് ശാന്തമായും ക്ഷമയോടെയും ഇരിക്കാനും ഭക്ഷണവും വെള്ളവും സൗകര്യങ്ങളും ലഭ്യമായ വീടുകളിലോ പാർപ്പിടങ്ങളിലോ കഴിയണമെന്നും ഇന്ത്യന്‍ എംബസി അഭ്യര്‍ത്ഥിച്ചു.

ഉക്രെയ്നിൽ കാര്യങ്ങൾ വളരെ മോശമാണ്: മടങ്ങിയെത്തിയ വിദ്യാർത്ഥികൾ
റൊമാനിയയുടെ തലസ്ഥാനമായ ബുക്കാറെസ്റ്റിൽ നിന്ന് 250 പേരുമായി ഇന്ത്യയിലെത്തിയവര്‍ ഒരു നീണ്ട യാത്രയ്ക്ക് ശേഷം സ്വന്തം നാട്ടിലെത്താൻ കഴിഞ്ഞതിൽ ആശ്വാസമുണ്ടെന്ന് പറഞ്ഞു.

“ഉക്രെയിനില്‍ സ്ഥിതി വളരെ മോശമാണ്. ആളുകൾ ഒറ്റപ്പെട്ടു. ഉക്രെയ്നിൽ നിന്ന് മടങ്ങിയെത്തിയ വിദ്യാർത്ഥികൾ ആശ്വാസത്തിന്റെ നെടുവീർപ്പിലാണ്. എന്നാൽ, ചില വിദ്യാർത്ഥികൾ അവരുടെ തുടർ പഠനത്തെക്കുറിച്ച് ആശങ്കാകുലരാണ്,” തിരിച്ചെത്തിയവര്‍ പറയുന്നു.

ഒരു നീണ്ട പ്രക്രിയ പൂർത്തിയാക്കേണ്ടതിനാൽ തനിക്കും സുഹൃത്തുക്കൾക്കും വെള്ളിയാഴ്ച ഉക്രെയ്ൻ-റൊമാനിയ അതിർത്തിയിൽ ഏകദേശം 12 മണിക്കൂറോളം കാത്തിരിക്കേണ്ടി വന്നതായി ബൊക്കോവിനിയൻ സ്റ്റേറ്റ് മെഡിക്കൽ യൂണിവേഴ്‌സിറ്റിയിലെ നാലാം വർഷ എംബിബിഎസ് വിദ്യാർത്ഥിയായ വിപിൻ പറഞ്ഞു.

“വാഹനങ്ങളുടെ നീണ്ട ക്യൂ തടസ്സപ്പെട്ടതിനാൽ അതിർത്തി പ്രദേശത്തേക്ക് അഞ്ച് കിലോമീറ്ററോളം നടക്കേണ്ടി വന്നു,” തിരുവനന്തപുരം സ്വദേശിയായ വിപിൻ പറഞ്ഞു.

മഹാരാഷ്ട്ര, ആന്ധ്രാപ്രദേശ്, ഗുജറാത്ത്, ഉത്തർപ്രദേശ്, ബിഹാർ, അരുണാചൽ പ്രദേശ്, കർണാടക, കേരളം തുടങ്ങി വിവിധ സംസ്ഥാനങ്ങളിൽ നിന്നുള്ളവരാണ് ഉക്രെയ്നിൽ നിന്ന് നാട്ടിലേക്ക് മടങ്ങിയത്. തങ്ങളെ സുരക്ഷിതമായി പുറത്തെത്തിച്ചതിനും ജീവൻ രക്ഷിച്ചതിനും ഇവര്‍ ഇന്ത്യൻ സർക്കാരിന് നന്ദി പറഞ്ഞു.

“ഉക്രെയ്‌നിലെ സ്ഥിതി അത്ര നല്ലതല്ല. ഞങ്ങളുടെ പഠനത്തെക്കുറിച്ച് ഞങ്ങൾ ആശങ്കാകുലരാണ്. എങ്കിലും തിരിച്ചു വന്നതിൽ സന്തോഷം തോന്നി. എന്നെ തിരികെ കൊണ്ടുവന്നതിന് സർക്കാരിനോട് ഞാൻ നന്ദി പറയുന്നു,” ചെർനിവ്‌സിയിലെ ബൊക്കോവിനിയൻ സ്റ്റേറ്റ് മെഡിക്കൽ യൂണിവേഴ്‌സിറ്റിയിലെ ഒന്നാം വർഷ വിദ്യാർത്ഥിനിയായ സുസ്മിത റാത്തോഡ് പറഞ്ഞു.

ഉക്രെയ്നിൽ കുടുങ്ങിയ ശേഷിക്കുന്ന ഇന്ത്യൻ വിദ്യാർത്ഥികളെ തിരികെ കൊണ്ടുവരണമെന്ന് മറ്റൊരു വിദ്യാർത്ഥിയായ ശ്രദ്ധ ഷെറ്റെ സർക്കാരിനോട് അഭ്യർത്ഥിച്ചു.

റഷ്യൻ സേനയുടെ അധിനിവേശത്തിനിടെ ഉക്രെയ്നിൽ കുടുങ്ങിയ പൗരന്മാരെ രക്ഷിക്കാൻ ഇന്ത്യ ശനിയാഴ്ചയാണ് ‘ഓപ്പറേഷൻ ഗംഗ’ ആരംഭിച്ചത്. AI 1944 എന്ന ആദ്യ കുടിയൊഴിപ്പിക്കൽ വിമാനം 219 പേരെ ബുക്കാറെസ്റ്റിൽ നിന്ന് മുംബൈയിലെത്തിച്ചു.

ഞായറാഴ്ച പുലർച്ചെ 2.45 ഓടെ 250 ഇന്ത്യൻ പൗരന്മാരുമായി രണ്ടാമത്തെ എഐ1942 വിമാനം ഡൽഹി വിമാനത്താവളത്തിൽ എത്തിയതായി അധികൃതർ പറഞ്ഞു.

എയർ ഇന്ത്യയുടെ മൂന്നാമത്തെ ഒഴിപ്പിക്കൽ വിമാനം AI1940 ഹംഗറിയുടെ തലസ്ഥാനമായ ബുഡാപെസ്റ്റിൽ നിന്ന് പറന്നുയർന്നു, ഞായറാഴ്ച 240 പേരുമായി ഡൽഹിയിലേക്ക് മടങ്ങുമെന്ന് പ്രതീക്ഷിക്കുന്നു.