മോസ്കോ: ക്രെംലിന് അയൽരാജ്യങ്ങളോട് മോശമായ ഉദ്ദേശ്യമില്ലെന്ന് ഉക്രെയ്നിൽ തുടരുന്ന സൈനിക നടപടിയ്‌ക്കിടെ റഷ്യൻ പ്രസിഡന്റ് വ്‌ളാഡിമിർ പുടിൻ റഷ്യയുടെ അയൽക്കാർക്ക് മുന്നറിയിപ്പ് നൽകി.
ഉക്രെയ്നിലെ സൈനിക സംഘട്ടനത്തിന്റെ ഒമ്പതാം ദിവസം ഒരു ടെലിവിഷൻ പ്രസംഗത്തിലാണ് ഇക്കാര്യം സൂചിപ്പിച്ചത്. “നമ്മുടെ അയൽക്കാരോട് മോശമായ ഉദ്ദേശ്യങ്ങളൊന്നുമില്ല. സ്ഥിതിഗതികൾ വഷളാക്കരുതെന്നും നിയന്ത്രണങ്ങളൊന്നും ഏർപ്പെടുത്തരുതെന്നും ഞാൻ അവരെ ഉപദേശിക്കുന്നു,” അദ്ദേഹം പറഞ്ഞു.
ഞങ്ങൾ ഞങ്ങളുടെ എല്ലാ കടമകളും നിറവേറ്റുകയും അവ നിറവേറുന്നതു വരെ തുടരുകയും ചെയ്യുമെന്നും അദ്ദേഹം പറഞ്ഞു.
ഉക്രേനിയൻ പക്ഷവുമായും ഉക്രെയ്നിൽ സമാധാനം ആഗ്രഹിക്കുന്ന എല്ലാവരുമായും സംവാദത്തിന് റഷ്യ തയ്യാറാണെന്ന് പുടിൻ പറഞ്ഞു. എന്നാൽ, എല്ലാ റഷ്യൻ ആവശ്യങ്ങളും നിറവേറ്റപ്പെടുന്നു എന്ന വ്യവസ്ഥയിൽ മാത്രമെന്നും അദ്ദേഹം പറഞ്ഞു.
ഉക്രെയ്നിന്റെ നിഷ്പക്ഷവും ആണവരഹിതവുമായ പദവി, അതിന്റെ “ഡിനാസിഫിക്കേഷൻ”, റഷ്യയുടെ ഭാഗമായി ക്രിമിയയെ അംഗീകരിക്കൽ, കിഴക്കൻ ഉക്രെയ്നിലെ ജനങ്ങളുടെ “പരമാധികാരം” എന്നിവ അതിൽ ഉൾപ്പെടുന്നു.
കഴിഞ്ഞ മാസം, കിഴക്കൻ ഉക്രെയ്നിലെ പിരിഞ്ഞുപോയ ലുഹാൻസ്ക്, ഡൊനെറ്റ്സ്ക് പ്രദേശങ്ങളെ സ്വതന്ത്ര റിപ്പബ്ലിക്കുകളായി അംഗീകരിക്കുന്ന ഉത്തരവിൽ പുടിൻ ഒപ്പുവച്ചു. മുന്‍ നിശ്ചയിച്ച പ്രകാരം മൂന്നാം റൗണ്ട് ചർച്ചകളിൽ, കിയെവിന്റെ പ്രതിനിധികൾ ന്യായമായതും ക്രിയാത്മകവുമായ നിലപാട് സ്വീകരിക്കുമെന്ന് പുടിന്‍ പ്രത്യാശ പ്രകടിപ്പിച്ചു.
സംഘർഷം അവസാനിപ്പിക്കാന്‍ റഷ്യയും ഉക്രെയ്നും ബെലാറസിൽ ചർച്ചകൾ നടത്തിവരികയാണ്.
ജർമ്മൻ ചാൻസലർ ഒലാഫ് ഷോൾസുമായുള്ള ഫോൺ സംഭാഷണത്തിൽ, റഷ്യൻ സൈന്യം ഉക്രേനിയൻ നഗരങ്ങളിൽ ബോംബാക്രമണം നടത്തുന്നുവെന്ന റിപ്പോർട്ടുകളും പുടിൻ തള്ളിക്കളഞ്ഞു. അദ്ദേഹത്തിന്റെ ഓഫീസ് പറയുന്നതനുസരിച്ച്, അത്തരം വിവരങ്ങൾ “വ്യാജ” പ്രചരണമായി അദ്ദേഹം തള്ളിക്കളഞ്ഞു.
ഈ പ്രശ്നം പരിഹരിക്കാനുള്ള ഞങ്ങളുടെ കാഴ്ചപ്പാട് ഉക്രേനിയൻ ഭാഗത്തെ വ്യക്തമായി അറിയിക്കാനുള്ള നല്ല അവസരമായിരുന്നു ചര്‍ച്ചകള്‍ എന്ന് ക്രെംലിൻ വക്താവ് ദിമിത്രി പെസ്കോവ് വെള്ളിയാഴ്ച പറഞ്ഞു.
“മുന്നോട്ട് പോകുമ്പോൾ, എല്ലാം ഉക്രേനിയൻ ഭാഗത്തിന്റെ പ്രതികരണത്തെ ആശ്രയിച്ചിരിക്കും,” അദ്ദേഹം മാധ്യമ പ്രവർത്തകരോട് പറഞ്ഞു.
ചർച്ചയിൽ കിയെവുമായി ഒരു രേഖകളും അംഗീകരിച്ചിട്ടില്ലെന്നും എന്നാൽ, യുദ്ധത്തിനുള്ള പരിഹാരം എങ്ങനെയാണ് കാണേണ്ടതെന്ന് മോസ്കോ ഉക്രെയ്‌ൻ ഭാഗത്തോട് പറഞ്ഞിട്ടുണ്ടെന്നും അദ്ദേഹം പറഞ്ഞു.
പുടിനെ “പുറന്തള്ളാൻ” ട്വിറ്ററിൽ യുഎസ് സെനറ്റർ ലിൻഡ്സെ ഗ്രഹാം നടത്തിയ വിവാദ ആഹ്വാനത്തിന് മറുപടിയായി, ഇത് ഉന്മാദ റുസോഫോബിയയുടെ ഉദാഹരണമാണെന്ന് പെസ്കോവ് പറഞ്ഞു.
“നമ്മുടെ പ്രസിഡന്റിന് ചുറ്റും ഐക്യപ്പെടാനും ഒരുമിച്ച് നിൽക്കാനും തീർച്ചയായും ഒന്നിക്കാനും” പെസ്കോവ് എല്ലാ റഷ്യക്കാരോടും ആഹ്വാനം ചെയ്തു.
ആണവ നിലയത്തിന് നേരെ റഷ്യൻ ആക്രമണം നടത്തിയെന്ന അവകാശവാദം സത്യമല്ല
അനുബന്ധ സംഭവ വികാസത്തിൽ, തെക്കുകിഴക്കൻ ഉക്രെയ്നിലെ യൂറോപ്പിലെ ഏറ്റവും വലിയ ആണവനിലയത്തിൽ റഷ്യൻ സൈന്യം ഷെല്ലാക്രമണം നടത്തിയെന്ന പാശ്ചാത്യ മാധ്യമ റിപ്പോർട്ടുകൾ ഐക്യരാഷ്ട്രസഭയിലെ റഷ്യൻ അംബാസഡർ വാസിലി നെബെൻസിയ നിരസിച്ചു.
വ്യാഴാഴ്‌ച രാത്രി രൂക്ഷമായ ഏറ്റുമുട്ടലിനിടെ സപോരിജിയ പവർ പ്ലാന്റിനോട് ചേർന്നുള്ള കെട്ടിടത്തിൽ തീപിടിത്തമുണ്ടായി. റഷ്യ പ്ലാന്റ് ആക്രമിച്ചതായി പാശ്ചാത്യ മാധ്യമങ്ങൾ ആരോപിച്ചു. എന്നാല്‍, ഈ പ്രസ്താവനകൾ കേവലം അസത്യമാണെന്ന് വാസിലി നെബെൻസിയ വെള്ളിയാഴ്ച സുരക്ഷാ കൗൺസിലിനോട് പറഞ്ഞു.
“ഇതെല്ലാം റഷ്യയ്‌ക്കെതിരെ മനഃപ്പൂര്‍‌വ്വം കെട്ടിച്ചമച്ച നുണകളുടെയും തെറ്റായ വിവരങ്ങളുടെയും പ്രചാരണത്തിന്റെ ഭാഗമാണ്,” അംബാസഡര്‍ കൂട്ടിച്ചേർത്തു.
പവർ പ്ലാന്റിൽ റഷ്യൻ സൈന്യം ഉക്രേനിയൻ സേനയുമായി ചെറിയ ആയുധങ്ങൾ ഉപയോഗിച്ച് വെടിയുതിർത്തെങ്കിലും
ഷെല്ലാക്രമണം നടത്തിയിട്ടില്ലെന്ന് അംബാസഡര്‍ പറഞ്ഞു.
ഉക്രൈനിലെ ആണവ കേന്ദ്രങ്ങളുടെ സുരക്ഷ ഉറപ്പാക്കണമെന്ന് ചൈന
സംഭവത്തിന് ശേഷം, ഉക്രെയ്നിലെ ആണവ കേന്ദ്രങ്ങളുടെ സുരക്ഷ ഉറപ്പാക്കാൻ ചൈന അഭ്യർത്ഥിച്ചു. സ്ഥിതിഗതികൾ നിരീക്ഷിക്കുകയും സംയമനം പാലിക്കാനും സംഘർഷം ഒഴിവാക്കാനും പ്രസക്തമായ ആണവ കേന്ദ്രങ്ങളുടെ സുരക്ഷ ഉറപ്പാക്കാനും ബീജിംഗ് എല്ലാ ഭാഗത്തുനിന്നും ആവശ്യപ്പെടുമെന്നും ചൈനീസ് വിദേശകാര്യ മന്ത്രാലയ വക്താവ് വാങ് വെൻബിൻ പറഞ്ഞു.
സ്ഥിതിഗതികളിൽ ചൈന വളരെ ആശങ്കാകുലരാണെന്നും അദ്ദേഹം പറഞ്ഞു.
