ഉക്രെയ്നിലെ സൈനിക നടപടിയുടെ പേരിൽ രാജ്യത്ത് നിന്നുള്ള കോർപ്പറേറ്റ് പലായനത്തിനിടയിൽ നൂറുകണക്കിന് വൻകിട അമേരിക്കൻ കമ്പനികൾ റഷ്യയിലെ അവരുടെ പ്രവർത്തനങ്ങൾ താൽക്കാലികമായി നിർത്തി വെച്ച് റഷ്യയോട് ഗുഡ്ബൈ പറയുന്നു.
ഫെബ്രുവരി 24 ന് റഷ്യൻ പ്രസിഡന്റ് വ്‌ളാഡിമിർ പുടിൻ സൈനിക നടപടിക്ക് ഉത്തരവിട്ടത് മുതൽ റഷ്യയുമായുള്ള അവരുടെ ബിസിനസ്സ് ബന്ധം വിച്ഛേദിക്കുകയോ കാര്യമായ രീതിയിൽ അവയെ പിന്നോട്ട് നയിക്കുകയോ ചെയ്ത എല്ലാ വ്യവസായ മേഖലകളിലുമുള്ള 100-ലധികം കമ്പനികളുടെ കൂട്ടത്തിൽ ജനപ്രിയ അമേരിക്കൻ ബ്രാൻഡുകളായ മക്‌ഡൊണാൾഡ്, കൊക്ക കോള, ഡിസ്‌നി എന്നിവയും ഉൾപ്പെടുന്നു.
ഡൊനെറ്റ്സ്ക്, ലുഗാൻസ്ക് പീപ്പിൾസ് റിപ്പബ്ലിക്കുകൾക്ക് (ഡിപിആർ, എൽപിആർ) ഉക്രേനിയൻ സൈന്യം ആഴ്ചകളോളം ഷെല്ലാക്രമണം നടത്തിയതിനാല്‍ റഷ്യയ്ക്ക് മറ്റ് മാർഗമൊന്നുമില്ലായിരുന്നു എന്ന് പുടിന്‍ പറഞ്ഞതായി റിപ്പോര്‍ട്ടുകള്‍ സൂചിപ്പിക്കുന്നു.
റഷ്യൻ നീക്കത്തിന് മറുപടിയായി, യുഎസും സഖ്യകക്ഷികളും മോസ്കോയിൽ കർശനമായ ഉപരോധങ്ങളും കയറ്റുമതി നിയന്ത്രണങ്ങളും ഏർപ്പെടുത്തി.
ഇപ്പോൾ, ഈ മേഖലയിലൂടെ സുരക്ഷിതമായി ചരക്കുകൾ കൊണ്ടുപോകുന്നതിനുള്ള വെല്ലുവിളിയും ആ ഉപരോധങ്ങളിൽ നിന്നും നിയന്ത്രണങ്ങളിൽ നിന്നും ഉണ്ടാകുന്ന സാമ്പത്തിക സങ്കീർണതകളും കമ്പനികൾ പരിഗണിക്കുന്നു.
“ഇപ്പോൾ റഷ്യയുമായി ഏതെങ്കിലും ബിസിനസ്സ് നടത്തുന്നതിന് വലിയ ചിലവുണ്ട്,” ജോർജ്ജ്ടൗൺ മക്‌ഡൊണാഫ് സ്‌കൂൾ ഓഫ് ബിസിനസിലെ പ്രൊഫസറായ ജിം ഏഞ്ചൽ പറഞ്ഞു. “രാഷ്ട്രീയ ചെലവുകളും സാമൂഹിക ചെലവുകളും സാമ്പത്തിക ചെലവുകളും വേറെയുമുണ്ടെന്നും അദ്ദേഹം പറഞ്ഞു.
“നിങ്ങൾ ഒരു അമേരിക്കൻ കമ്പനിയാണെങ്കിൽ, വിവിധ ഉപരോധങ്ങൾ കണക്കിലെടുക്കുമ്പോൾ റൂബിളിൽ ബിസിനസ്സ് ചെയ്യുന്നത് അസാധാരണമായ ബുദ്ധിമുട്ടാണ്,” ഏഞ്ചൽ പറഞ്ഞു. “നിങ്ങളുടെ റഷ്യൻ പ്രവർത്തനങ്ങൾക്ക് ധനസഹായം നേടാനോ ലാഭം എടുക്കാനോ നിങ്ങൾക്ക് കഴിഞ്ഞേക്കില്ല. പണം ട്രാൻസ്ഫർ ചെയ്യാൻ കഴിയുന്നത് വളരെ പ്രശ്നമായി മാറുന്നു, പല ബിസിനസുകളും പറയുന്നു, ‘ഞങ്ങൾക്ക് ഈ രീതിയിൽ ബിസിനസ്സ് ചെയ്യാൻ കഴിയില്ല. ഞങ്ങൾ അടച്ചുപൂട്ടും.”
യേൽ സ്‌കൂൾ ഓഫ് മാനേജ്‌മെന്റിലെ സീനിയർ അസോസിയേറ്റ് ഡീൻ ജെഫ്രി സോണൻഫെൽഡ് സമാഹരിച്ച പട്ടിക പ്രകാരം ബുധനാഴ്ച വരെ, 300-ലധികം കമ്പനികൾ റഷ്യയിൽ നിന്ന് ഭാഗികമായോ പൂർണമായോ പിൻവലിച്ചിട്ടുണ്ട്.
യു.എസ്. കോർപ്പറേഷനുകളിൽ തങ്ങളുടെ പ്രവർത്തനങ്ങൾ നിർത്തിവെച്ചതിൽ, മക്ഡൊണാൾഡിനാണ് ഏറ്റവും വലിയ നഷ്ടം. ഈ ഫാസ്റ്റ് ഫുഡ് ഭീമന് ഏകദേശം 850 സ്റ്റോറുകളിലായി 62,000 റഷ്യൻ തൊഴിലാളികളുണ്ട്.
ചൊവ്വാഴ്ച, റഷ്യയിലെ എല്ലാ ബിസിനസ്സ് പ്രവർത്തനങ്ങളും നിർത്തിവയ്ക്കുമെന്ന് കൊക്കകോള കമ്പനിയും അറിയിച്ചു. താമസിയാതെ, പെപ്‌സികോ ഇങ്ക് റഷ്യയിലെ ശീതളപാനീയ വിൽപ്പനയും മൂലധന നിക്ഷേപവും താൽക്കാലികമായി നിർത്തിവയ്ക്കുമെന്ന് പ്രഖ്യാപിച്ചു.
