വാഷിംഗ്ടണ്‍: കാലപ്പഴക്കം ചെന്ന മിഗ്-29 യുദ്ധവിമാനങ്ങൾ യുക്രെയ്നിലേക്ക് മാറ്റാനുള്ള പോളണ്ടിന്റെ നിർദ്ദേശത്തെ അമേരിക്ക പിന്തുണയ്ക്കുന്നില്ലെന്ന് യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിൻ പറഞ്ഞു. അത്തരമൊരു നടപടി റഷ്യയുമായുള്ള സംഘർഷം വർദ്ധിപ്പിക്കുമെന്ന് അദ്ദേഹം പറഞ്ഞു.
ബുധനാഴ്ച പോളിഷ് അധികൃതരുമായി നടത്തിയ ഒരു ടെലിഫോൺ സംഭാഷണത്തിൽ, ഓസ്റ്റിൻ ഈ നിർദ്ദേശത്തെ “ഉയർന്ന അപകടസാധ്യതയുള്ള” നീക്കമായി വിശേഷിപ്പിക്കുകയും, വിമാനം നേരിട്ട് വാഷിംഗ്ടണിലേക്ക് അയക്കാന്‍ നിര്‍ദ്ദേശിക്കുകയും ചെയ്തു.
മിഗ് 29 വിമാനങ്ങൾ ഉക്രെയ്നിലേക്ക് കൈമാറ്റം ചെയ്യുന്നത് പ്രകോപനമായി തെറ്റിദ്ധരിക്കപ്പെട്ടേക്കാമെന്നും, നാറ്റോയുമായുള്ള സൈനിക വർദ്ധനവിന്റെ സാധ്യതകൾ വർധിപ്പിച്ചേക്കാവുന്ന റഷ്യൻ പ്രതികരണത്തിന് കാരണമായേക്കാമെന്നും ഇന്റലിജൻസ് സമൂഹം വിലയിരുത്തി എന്ന് പെന്റഗൺ പ്രസ് സെക്രട്ടറി ജോൺ കിർബി മാധ്യമ പ്രവർത്തകരോട് പറഞ്ഞു.
“അതിനാൽ, മിഗ് -29 ഉക്രെയ്നിലേക്ക് മാറ്റുന്നത് ഉയർന്ന അപകടസാധ്യതയുള്ളതാണെന്ന് ഞങ്ങൾ വിലയിരുത്തുന്നു,” അദ്ദേഹം കൂട്ടിച്ചേർത്തു.
ഉക്രേനിയൻ പ്രസിഡന്റ് വോളോഡിമർ സെലെൻസ്‌കി ഉക്രെയിനിൽ “നോ ഫ്ലൈ സോണുകൾ” പ്രഖ്യാപിക്കാന്‍ യുഎസിനോട് ആവശ്യപ്പെടുകയും സ്വന്തം രാജ്യത്തിനായി അധിക മിഗ് -29 ജെറ്റുകൾ ആവശ്യപ്പെടുകയും ചെയ്ത് ദിവസങ്ങൾക്ക് ശേഷമാണ് ജോൺ കിർബിയുടെ അഭിപ്രായങ്ങൾ.
എന്നാല്‍, ആ നീക്കം വിനാശകരമായ പ്രത്യാഘാതങ്ങൾക്ക് ഇടയാക്കുമെന്ന് റഷ്യൻ പ്രസിഡന്റ് വ്‌ളാഡിമർ പുടിൻ മുന്നറിയിപ്പ് നൽകി.
അതേസമയം, പോളണ്ടിന്റെ ഓഫർ വാഷിംഗ്ടണുമായി “മുൻകൂട്ടി കൂടിയാലോചിച്ചിട്ടില്ല” എന്ന് യുഎസ് അണ്ടർസെക്രട്ടറി ഓഫ് പൊളിറ്റിക്കൽ അഫയേഴ്സ് വിക്ടോറിയ നൂലാൻഡ് പറഞ്ഞു.
ആധുനിക ആയുധങ്ങളുടെ വൻ ഡെലിവറി ഭീകരരുടെ കൈകളിൽ എത്തിയേക്കാമെന്ന റഷ്യൻ മുന്നറിയിപ്പുകൾ അവഗണിച്ച് ഉക്രെയിനിലേക്ക് യുഎസ് നേതൃത്വത്തിലുള്ള വിപുലമായ ആയുധങ്ങൾ കൈമാറ്റം ചെയ്തതിന്റെ റിപ്പോർട്ടുകൾക്കിടയിലാണ് ഈ സംഭവ വികാസം.
