ഉക്രൈനിൽ ജൈവായുധങ്ങൾ ഉണ്ടെന്ന് ആരോപിച്ച് യുഎസും റഷ്യയും യുഎൻ സുരക്ഷാ കൗൺസിലിൽ പരസ്പരം കൊമ്പുകോര്‍ത്തു. ഉക്രെയ്നിൽ ജൈവായുധ ഗവേഷണ പരിപാടിക്ക് യുഎസ് ധനസഹായം നൽകിയിട്ടുണ്ടെന്ന് റഷ്യ തറപ്പിച്ചുപറയുന്നു. അതേസമയം, വാഷിംഗ്ടൺ ഈ ആരോപണം നിഷേധിച്ചു.
ജീവശാസ്ത്രപരമായ ആയുധ ഗവേഷണത്തിന് സ്വന്തം ആളുകളെ ഗിനിയ പന്നികളായി ഉപയോഗിക്കാൻ ഉക്രേനിയൻ സർക്കാർ അനുവദിച്ചിട്ടുണ്ടെന്ന് യുഎന്നിലെ റഷ്യൻ സ്ഥിരം പ്രതിനിധി വാസിലി നെബെൻസിയ വെള്ളിയാഴ്ച സെക്യൂരിറ്റി കൗൺസിൽ യോഗത്തിൽ പറഞ്ഞു.
പക്ഷികളെയും വവ്വാലുകളെയും ഉപയോഗിച്ച് വൈറസുകൾ എങ്ങനെ പടർത്താമെന്ന് ഉക്രെയിന്‍ ലാബുകളില്‍ പഠനം നടത്തിയിട്ടുണ്ടെന്ന് നെബെൻസിയ പറഞ്ഞു. അതിന് തെളിവായി സമീപ വർഷങ്ങളിൽ ഉക്രെയ്നിൽ വർദ്ധിച്ചുവരുന്ന രോഗബാധ റിപ്പോർട്ടുകള്‍ അവര്‍ ഉദ്ധരിച്ചു.
ജൈവായുധങ്ങളെക്കുറിച്ചുള്ള ഉക്രൈൻ ഗവേഷണം ഉയർത്തുന്ന അപകടത്തെക്കുറിച്ച് റഷ്യൻ പ്രതിനിധി യൂറോപ്യൻ രാജ്യങ്ങൾക്ക് മുന്നറിയിപ്പ് നൽകിയിട്ടുണ്ട്.
“യൂറോപ്യൻ രാജ്യങ്ങളിലെ ജനങ്ങൾ ഒരു യഥാർത്ഥ ജൈവ അപകടത്തെക്കുറിച്ച് ചിന്തിക്കണമെന്ന് ഞങ്ങൾ നിങ്ങളോട് ആവശ്യപ്പെടുന്നു. ഇത് ഉക്രെയ്നിൽ നിന്നുള്ള അനിയന്ത്രിതമായ ബയോ ഏജന്റുകളുടെ വ്യാപനത്തിന്റെ ഫലമായി ഉണ്ടാകുന്നതാണ്, അത്തരമൊരു സാഹചര്യമുണ്ടെങ്കിൽ യൂറോപ്പ് മുഴുവൻ അത് വ്യാപിക്കും,” നെബെൻസിയ പറഞ്ഞു.
ഉക്രെയ്നിലെ റാഡിക്കൽ ദേശീയവാദ ഗ്രൂപ്പുകളുടെ താൽപ്പര്യങ്ങൾ യു എസിന്റെ പ്രതിരോധ മന്ത്രാലയവുമായി ചേർന്ന് നടത്തുന്ന അപകടകരമായ രോഗകാരികളുമായുള്ള പ്രവർത്തനത്തിൽ കാണിക്കുന്നതിനാൽ ഇതിന്റെ അപകടസാധ്യത വളരെ
കൂടുതലാണെന്നും നെബെന്‍സിയ കൂട്ടിച്ചേർത്തു.
എന്നാൽ ഉക്രെയിനിലെ ബയോളജിക്കൽ ലബോറട്ടറികൾക്ക് രാസായുധങ്ങളുമായി യാതൊരു ബന്ധവുമില്ലെന്ന് അവകാശപ്പെട്ട് യുഎൻ ജൈവ പ്രവർത്തനങ്ങളെക്കുറിച്ചുള്ള റഷ്യയുടെ ആരോപണം യുഎന്നിലെ യുഎസ് അംബാസഡർ ലിൻഡ തോമസ് ഗ്രീൻഫീൽഡ് നിരസിച്ചു.
ഉക്രെയ്നിൽ രാസായുധമോ ജൈവികമോ ആയ ആയുധങ്ങൾ ഉപയോഗിക്കാൻ മോസ്കോ പദ്ധതിയിടുന്നു എന്നതിന്റെ സൂചനയാണ് ഇത്തരം ആരോപണങ്ങളെന്നും അവർ പറഞ്ഞു.
ഉക്രെയ്നില് രാസായുധ ആക്രമണം നടത്താന്‍ റഷ്യ മനഃപ്പൂര്‍‌വ്വം ആസൂത്രണം ചെയ്ത ഒരു തന്ത്രമാണ് ഈ പ്രസ്താവനയെന്നും, അതില്‍ ഞങ്ങള്‍ക്ക് ആശങ്കയുണ്ടെന്നും ലിന്‍ഡ തോമസ് പറഞ്ഞു. കഴിഞ്ഞ മാസം സെക്യൂരിറ്റി കൗൺസിലില്‍ യു എസ് സ്റ്റേറ്റ് സെക്രട്ടറി ബ്ലിങ്കെൻ ഉൾപ്പെടെ, ഞങ്ങൾ മുന്നറിയിപ്പ് നൽകിയിരുന്ന അതേ തരത്തിലുള്ളതാണ് റഷ്യയുടെ ഈ തന്ത്രമെന്നും തോമസ് പറഞ്ഞു.
“റഷ്യ തന്നെ ചെയ്യുന്ന ലംഘനങ്ങളെക്കുറിച്ച് മറ്റ് രാജ്യങ്ങള്‍ക്കെതിരെ തെറ്റായ ആരോപണങ്ങള്‍ ഉന്നയിക്കുന്നതിന്റെ ട്രാക്ക് റെക്കോർഡ് റഷ്യക്കുണ്ട്,” അവര്‍ കൂട്ടിച്ചേര്‍ത്തു.
“യുഎൻ സെക്യൂരിറ്റി കൗൺസിൽ യോഗം റഷ്യയുടെ ലക്ഷ്യങ്ങൾ ലോകത്തിന് മുന്നിൽ വെളിപ്പെടുത്തി, റഷ്യയുടെ നുണകൾ തുറന്നുകാട്ടി, ഉക്രെയ്നിനെതിരായ അവരുടെ നിയമവിരുദ്ധവും പ്രകോപനരഹിതവുമായ ആക്രമണത്തിന്റെ ഭാഗമായി റഷ്യ നടത്തുന്ന അതിക്രമങ്ങൾ മറയ്ക്കാനുള്ള ദുരുദ്ദേശ്യപരമായ ശ്രമമാണിത്,” എന്നും അവർ പറഞ്ഞു.
ഉക്രെയ്‌നിന് ഒരു ജൈവ ആയുധ പരിപാടിയില്ല. റഷ്യയുടെ അതിർത്തിക്കടുത്തോ മറ്റെവിടെയെങ്കിലുമോ അമേരിക്കയുടെ പിന്തുണയുള്ള ഉക്രേനിയൻ ബയോളജിക്കൽ ആയുധ ലബോറട്ടറികളൊന്നുമില്ലെന്നും ലിന്‍ഡ തോമസ് പറഞ്ഞു.
ഉക്രെയ്നിലെ ഏതെങ്കിലും ജൈവായുധ പരിപാടിയെക്കുറിച്ച് തങ്ങള്‍ക്ക് അറിവില്ലെന്ന് യുഎൻ നിരായുധീകരണ മേധാവി യോഗത്തിൽ പറഞ്ഞു. കിയെവിലെ സർക്കാർ ഉക്രേനിയൻ മണ്ണിൽ അത്തരമൊരു പരിപാടി നിഷേധിച്ചു.
ഉക്രെയ്നിലെ സൈനിക നടപടിക്കിടെ രാസായുധ ആക്രമണം നടത്തിയാൽ റഷ്യ കനത്ത വില നൽകേണ്ടിവരുമെന്ന് യുഎസ് പ്രസിഡന്റ് ജോ ബൈഡൻ വെള്ളിയാഴ്ച മുന്നറിയിപ്പ് നൽകി.
യുഎസ് ധനസഹായത്തോടെയുള്ള “ബയോളജിക്കൽ റിസർച്ച് സൗകര്യങ്ങൾ” ഉക്രെയ്നിൽ ഉണ്ടെന്ന റഷ്യയുടെ ആരോപണം തങ്ങളെ ആശ്ചര്യപ്പെടുത്തി എന്ന് സ്റ്റേറ്റ് സെക്രട്ടറി ബ്ലിങ്കന്‍ പറഞ്ഞു.
പെന്റഗൺ ധനസഹായം നൽകുന്ന ഒരു ജൈവ ആയുധ പദ്ധതിയായി കണക്കാക്കിയതിന്റെ സൂചനകൾ അടിയന്തരമായി ഇല്ലാതാക്കാൻ കിയെവിന് ഉത്തരവിട്ടതായി റഷ്യ രേഖകൾ പ്രസിദ്ധീകരിച്ചതിന് ശേഷം യുക്രെയ്‌നുമായി ബന്ധപ്പെട്ട സെനറ്റ് ഹിയറിംഗിൽ യുഎസ് അണ്ടർ സെക്രട്ടറി ഓഫ് പൊളിറ്റിക്കൽ അഫയേഴ്‌സ് വിക്ടോറിയ നൂലാൻഡ് ആശങ്ക പ്രകടിപ്പിച്ചു.
ഉക്രൈനിൽ യുഎസ് ഫണ്ട് ഉപയോഗിച്ചുള്ള ബയോലാബുകളുടെ തെളിവുകൾ കണ്ടെത്തിയതായി റഷ്യൻ പ്രതിരോധ മന്ത്രാലയം നേരത്തെ വ്യക്തമാക്കിയിരുന്നു.
സോവിയറ്റിനു ശേഷമുള്ള രാജ്യങ്ങളിൽ പെന്റഗൺ വികസിപ്പിച്ചെടുത്ത ബയോളജിക്കല്‍ വെപ്പണ്‍ പ്രോഗ്രാമുകൾ സൂക്ഷ്മമായി നിരീക്ഷിച്ചു വരികയാണെന്ന് മന്ത്രാലയം പറഞ്ഞു. പുതിയ കണ്ടെത്തലുകൾ അനുസരിച്ച്, ഉക്രെയ്നിൽ 30 ലധികം ബയോളജിക്കൽ ലബോറട്ടറികളുടെ ഒരു “നെറ്റ്‌വര്‍ക്ക്” രൂപീകരിച്ചിട്ടുണ്ടെന്നും മന്ത്രാലയം അവകാശപ്പെട്ടു.
