ഉക്രെയ്നിലെ റഷ്യൻ ആക്രമണത്തിന് ശേഷം, ഓപ്പറേഷൻ ഗംഗയുടെ കീഴിൽ ഇന്ത്യ മിക്കവാറും എല്ലാ പൗരന്മാരെയും ഒഴിപ്പിച്ചു. ഈ പൗരന്മാരിൽ ഭൂരിഭാഗവും മെഡിസിൻ പഠിക്കാൻ ഉക്രെയ്നിലേക്ക് പോയ വിദ്യാർത്ഥികളായിരുന്നു. ഇപ്പോൾ വിദ്യാർത്ഥികൾ പോയതോടെ അവരുടെ അദ്ധ്യാപകർ യുദ്ധമുഖത്ത് വിവിധ തലങ്ങളില്‍ സേവനം ചെയ്യുന്നു.
ഏകദേശം രണ്ടാഴ്ച മുമ്പ് വരെ, നതാലിയ കല്യാണിയുക്ക് പടിഞ്ഞാറൻ ഉക്രെയ്നിലെ ടെർനോപിൽ മെഡിക്കൽ നാഷണൽ യൂണിവേഴ്സിറ്റിയിൽ ഫോറൻസിക് മെഡിസിനെക്കുറിച്ചും മെഡിക്കൽ നിയമത്തെക്കുറിച്ചും ക്ലാസെടുക്കുകയായിരുന്നു. എന്നാൽ ഇപ്പോൾ, 37-കാരിയായ അസോസിയേറ്റ് പ്രൊഫസർ ഉക്രേനിയൻ സൈന്യത്തിന് വേണ്ടി കാമോഫ്ലോഗ് വലകൾ നെയ്യുന്നു. കൂടാതെ, യുദ്ധമേഖലകളിലെ സാധാരണക്കാർക്കും സൈനികർക്കും മെഡിക്കൽ സപ്ലൈകളും ഭക്ഷണവും ക്രമീകരിക്കാൻ സഹായിക്കുന്നു. അവര്‍ ചോദിക്കുന്നു, “ഞങ്ങളുടെ വീട് നശിപ്പിക്കുന്നത് ഞങ്ങൾ എങ്ങനെ കാണും, ഒന്നും ചെയ്യാതിരിക്കുന്നതെങ്ങനെ?”
റഷ്യൻ അധിനിവേശത്തെത്തുടർന്ന് ആയിരക്കണക്കിന് ഇന്ത്യൻ വിദ്യാർത്ഥികൾ നാട്ടിലേക്ക് മടങ്ങി. ഉക്രെയ്നിലെ അവരുടെ അദ്ധ്യാപകരാകട്ടേ യുദ്ധഭൂമിയിലേക്കിറങ്ങി. യുദ്ധം കൂടുതല്‍ ബാധിക്കാത്ത പടിഞ്ഞാറൻ നഗരങ്ങളായ ടെർനോപിൽ, എൽവിവ് എന്നിവിടങ്ങളിലാണവര്‍.
അവർ യുദ്ധമേഖലകളിൽ മരുന്നുകൾ ക്രമീകരിക്കുകയും വിതരണം ചെയ്യുകയും ചെയ്യുന്നു, സൈനികർക്കും സാധാരണക്കാർക്കും ഭക്ഷണം പാകം ചെയ്യുന്നു, കൂടാതെ സാധാരണക്കാർക്ക് സൗജന്യമായി ഓൺലൈനിലും ഓഫ്‌ലൈനിലും മെഡിക്കൽ സഹായ ക്ലാസുകൾ നടത്തുന്നു. ചിലർ സൈന്യത്തിൽ ചേരാന്‍ ഒപ്പുവച്ചു.
തന്റെ അഭിഭാഷകനായ ഭർത്താവ് ബോഡ്ഗൻ കല്യാണിയുക്കിനൊപ്പം എല്ലാ ദിവസവും സൈനിക യൂണിറ്റിൽ റിപ്പോർട്ട് ചെയ്യുന്ന ആർമി ജോയിനിംഗ് ഗ്രൂപ്പിൽ നിന്നുള്ളയാളാണ് കല്യാണിയുക്ക്. ടാങ്ക് വേധ മിസൈലുകൾ പ്രയോഗിക്കാൻ അവർ പഠിക്കുന്നു.
“ഞാൻ എന്റെ സ്വന്തം ഇഷ്ടപ്രകാരമാണ് ചേർന്നത്. ഞാൻ എന്റെ 10 ഉം 5 ഉം വയസ്സുള്ള കുട്ടികളെ അമ്മയോടൊപ്പം വീട്ടിലാക്കിയിട്ടാണ് ഇതിനായി ഇറങ്ങിത്തിരിച്ചത്. ഇന്ത്യൻ വിദ്യാർത്ഥികളുൾപ്പെടെ നിരവധി ആളുകൾ തന്റെ വിവരങ്ങള്‍ തിരക്കി വാട്ട്‌സ്ആപ്പിൽ മെസേജുകള്‍ അയക്കാറുണ്ട്,” അവർ പറയുന്നു.
“യുദ്ധമേഖലകളിലെ ബങ്കറുകളിൽ താമസിക്കുന്ന സൈനികരുടെയും സാധാരണക്കാരുടെയും ആവശ്യങ്ങൾക്കനുസരിച്ച് മെഡിക്കൽ സപ്ലൈസ്, ഭക്ഷണം, കാമോഫ്ലോഗ് വലകൾ തുടങ്ങിയ സാമഗ്രികൾ ക്രമീകരിക്കുകയും വിതരണം ചെയ്യുകയും ചെയ്യുക എന്നതാണ് എന്റെ ജോലി. നിരവധി സ്ത്രീകൾ ഉക്രെയ്ൻ വിട്ട് അയൽരാജ്യങ്ങളിലേക്ക് മാറി. എനിക്ക് എന്റെ ഭർത്താവിനെയോ ഞങ്ങളുടെ രാജ്യം സംരക്ഷിക്കുന്ന എന്റെ സുഹൃത്തുക്കളെയും സഹപ്രവർത്തകരെയും ഉപേക്ഷിക്കാൻ കഴിയില്ല,” കല്യാണിയുക്ക് പറയുന്നു.
ഉക്രെയ്നിൽ സൈനിക നിയമം പ്രാബല്യത്തിൽ വന്നതിനാൽ, മിക്ക സർവകലാശാലകളും വിദ്യാർത്ഥികൾക്ക് അവധി പ്രഖ്യാപിച്ചിരിക്കുകയാണ്. ക്ലാസുകൾ എപ്പോൾ പുനരാരംഭിക്കുമെന്ന കാര്യം അനിശ്ചിതത്വത്തിലാണ്. അതിനിടെ, സര്‍‌വ്വകലാശാലകള്‍ സൈനിക പിന്തുണാ കേന്ദ്രമായി മാറി. സൈനിക പിന്തുണ നൽകുന്നതിനു പുറമേ, പരിക്കേറ്റ സൈനികരെയും സാധാരണക്കാരെയും ചികിത്സിക്കുന്നതിനായി മെഡിക്കൽ ഫാക്കൽറ്റി സൈനിക ആശുപത്രികളിലും ക്യാമ്പുകളിലും സേവനം ചെയ്യുന്നു.
“എന്റെ മുൻ ഇറാഖി വിദ്യാർത്ഥികൾ എന്നെ ബന്ധപ്പെടുകയും അവർ $11,000 സമാഹരിച്ചതായി പറയുകയും ചെയ്തു. ഞാൻ അവർക്ക് മെഡിക്കൽ സപ്ലൈസിന്റെ ഒരു ലിസ്റ്റ് അയച്ചു, അവർ തുർക്കി വഴി അയക്കും. പോളണ്ടിൽ നിന്നും ഇന്ത്യയിൽ നിന്നുമുള്ള ഞങ്ങളുടെ വിദ്യാർത്ഥികളും ഞങ്ങളെ സഹായിക്കുന്നു. ഞങ്ങളുടെ ഇന്ത്യൻ വിദ്യാർത്ഥികൾ ഹാർമോണിയത്തിൽ ഉക്രെയ്നിന്റെ ഗാനം വായിച്ച് ഞങ്ങൾക്ക് ഒരു വീഡിയോ അയച്ചു, അത് ഞങ്ങൾ ഞങ്ങളുടെ സോഷ്യൽ മീഡിയ പ്ലാറ്റ്‌ഫോമുകളിൽ പോസ്റ്റ് ചെയ്തു. ചിലർ അവരുടെ രാജ്യത്തേക്ക് മടങ്ങാൻ ആഗ്രഹിച്ചില്ല, പക്ഷേ അവരുടെ മാതാപിതാക്കൾ ആശങ്കാകുലരായതിനാൽ അവർ പോയി,” കല്യാണിയുക്ക് പറഞ്ഞു.
ഏകദേശം 1,700 ഇന്ത്യൻ വിദ്യാർത്ഥികൾ ടെർനോപിൽ നാഷണൽ മെഡിക്കൽ യൂണിവേഴ്‌സിറ്റിയിലും 1,000 പേർ ഡാനിലോ ഹാലിറ്റ്‌സ്‌കി ലിവിവ് നാഷണൽ മെഡിക്കൽ യൂണിവേഴ്‌സിറ്റിയിലും പഠിക്കുന്നുണ്ട്.
