ന്യൂഡൽഹി: പെട്രോൾ ലിറ്ററിന് 50 പൈസയും ഡീസലിന് 55 പൈസയും ഞായറാഴ്ച വർദ്ധിച്ചു. കഴിഞ്ഞ ആറ് ദിവസത്തിനിടെ അഞ്ചാം തവണയാണ് വില കൂട്ടുന്നത്. ആറ് ദിവസത്തിനിടെ പെട്രോൾ വില ലിറ്ററിന് 3.70 രൂപയും ഡീസലിന് 3.75 രൂപയുമാണ് വർദ്ധിച്ചത്.
പൊതുമേഖലാ പെട്രോളിയം മാർക്കറ്റിംഗ് കമ്പനികൾ പുറപ്പെടുവിച്ച വിലവിജ്ഞാപനം അനുസരിച്ച്, രാജ്യതലസ്ഥാനമായ ഡൽഹിയിൽ പെട്രോൾ വില ലിറ്ററിന് 98.61 രൂപയിൽ നിന്ന് 99.11 രൂപയായും ഡീസൽ ലിറ്ററിന് 89.87 രൂപയിൽ നിന്ന് 90.42 രൂപയായും ഉയർന്നു.
രാജ്യത്തുടനീളം പെട്രോൾ, ഡീസൽ വില വർദ്ധിപ്പിച്ചിട്ടുണ്ട്. എന്നാൽ, പ്രാദേശിക നികുതികളെ ആശ്രയിച്ച് അവയുടെ വില ഓരോ സംസ്ഥാനത്തിനും വ്യത്യാസപ്പെടുന്നു.
മുംബൈയിൽ 53 പൈസ വർദ്ധിച്ചതോടെ പെട്രോൾ ലിറ്ററിന് 113.88 രൂപയും ഡീസലിന് 58 പൈസ വർദ്ധിച്ച് 98.13 രൂപയായി.
ചെന്നൈയിൽ പെട്രോൾ ലിറ്ററിന് 104.90 രൂപയായും ഡീസലിന്റെ വില 95.00 രൂപയായും ഉയർന്നു. കൊൽക്കത്തയിൽ പെട്രോളിന് 108.53 രൂപയും ഡീസലിന് 93.57 രൂപയുമാണ്.
കഴിഞ്ഞ നാല് തവണയായി ഇന്ധനവില ലിറ്ററിന് 80 പൈസ വർദ്ധിപ്പിച്ചിരുന്നു. 2017 ജൂണിൽ പ്രതിദിന വില പരിഷ്‌കരണം ആരംഭിച്ചതിന് ശേഷമുള്ള ഏറ്റവും വലിയ ഒറ്റ ദിവസത്തെ വർദ്ധനവാണിത്.
നാലര മാസത്തെ സ്ഥിരതയ്ക്ക് ശേഷം മാർച്ച് 22 ന് പെട്രോളിനും ഡീസലിനും 80 പൈസ വർദ്ധിപ്പിച്ചു . അതിനുശേഷം അവയുടെ വില ലിറ്ററിന് 80-80 പൈസ വരെ മൂന്ന് തവണ വർദ്ധിപ്പിച്ചു . ഈ നാല് തവണയായി പെട്രോളിനും ഡീസലിനും ലിറ്ററിന് 3.20 രൂപയുടെ വർദ്ധനവാണ് ഉണ്ടായത്.
ഉത്തർപ്രദേശ്, പഞ്ചാബ് എന്നിവയുൾപ്പെടെ അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പ് പ്രക്രിയ ആരംഭിക്കുന്നതിന് മുമ്പ്, 2021 നവംബർ 4 മുതൽ പെട്രോളിയം ഉൽപ്പന്നങ്ങളുടെ വില സ്ഥിരമായി തുടര്‍ന്നു. എന്നാല്‍, ഈ കാലയളവിൽ ക്രൂഡ് ഓയിൽ വില ബാരലിന് 30 ഡോളറായി വർദ്ധിച്ചു.
നിയമസഭാ തിരഞ്ഞെടുപ്പ് ഫലം മാർച്ച് 10ന് പ്രഖ്യാപിക്കുന്നതോടെ പെട്രോൾ, ഡീസൽ വില വർദ്ധിക്കാൻ സാധ്യതയുണ്ടായിരുന്നു.
ഇപ്പോൾ പെട്രോളിയം മാർക്കറ്റിംഗ് കമ്പനികൾ അവരുടെ നഷ്ടം നികത്തുകയാണെന്ന് പറയപ്പെടുന്നു. എണ്ണയുടെ ആവശ്യകത നിറവേറ്റാൻ ഇന്ത്യ 85 ശതമാനവും ഇറക്കുമതിയെ ആശ്രയിക്കുന്നു.
