മോസ്കോയ്ക്കെതിരായ നിയമവിരുദ്ധ ഉപരോധം പാശ്ചാത്യ രാജ്യങ്ങൾ നീക്കം ചെയ്തതിന് ശേഷം മാത്രമേ അന്താരാഷ്ട്ര ബഹിരാകാശ നിലയവുമായി (ഐഎസ്‌എസ്) സാധാരണ ബന്ധം പുനഃസ്ഥാപിക്കുകയുള്ളൂവെന്ന് റഷ്യയുടെ ബഹിരാകാശ ഏജൻസി മേധാവി പറഞ്ഞു.
മോസ്കോയ്ക്കെതിരായ “നിയമവിരുദ്ധമായ ഉപരോധം” നീക്കുന്നത് വരെ റഷ്യ ഐഎസ്‌എസുമായി ബന്ധപ്പെട്ട് പാശ്ചാത്യ രാജ്യങ്ങളുമായുള്ള സഹകരണം താൽക്കാലികമായി നിർത്തിവയ്ക്കുമെന്ന് റഷ്യൻ ബഹിരാകാശ ഏജൻസി റോസ്കോസ്മോസിന്റെ ഡയറക്ടർ ജനറൽ ദിമിത്രി റോഗോസിൻ ശനിയാഴ്ച പറഞ്ഞതായി അന്താരാഷ്ട്ര മാധ്യമങ്ങള്‍ റിപ്പോർട്ട് ചെയ്തു.
റഷ്യൻ സമ്പദ്‌വ്യവസ്ഥയെ തകര്‍ക്കുകയും റഷ്യന്‍ ജനതയെ നിരാശയിലേക്കും പട്ടിണിയിലേക്കും തള്ളിവിടുകയും രാജ്യത്തെ മുട്ടുകുത്തിക്കുകയും ചെയ്യുക എന്നതാണ് ഈ ഉപരോധങ്ങളുടെ ലക്ഷ്യമെന്ന് ഒരു സോഷ്യൽ മീഡിയ പോസ്റ്റിൽ അദ്ദേഹം പറഞ്ഞു. “അവർ അതിൽ വിജയിക്കില്ല, പക്ഷേ ഉദ്ദേശ്യങ്ങൾ വ്യക്തമാണ്” എന്നും അദ്ദേഹം ഊന്നിപ്പറഞ്ഞു.
“അതുകൊണ്ടാണ് അന്താരാഷ്ട്ര ബഹിരാകാശ നിലയത്തിലെ (ISS) പങ്കാളികളും മറ്റ് പ്രോജക്റ്റുകളും തമ്മിലുള്ള സാധാരണ ബന്ധം പുനഃസ്ഥാപിക്കുന്നത് നിയമവിരുദ്ധമായ ഉപരോധങ്ങൾ പൂർണ്ണമായും നിരുപാധികമായും നീക്കം ചെയ്യുന്നതിലൂടെ മാത്രമേ സാധ്യമാകൂ എന്ന് ഞാൻ വിശ്വസിക്കുനത്,” റോഗോസിൻ കൂട്ടിച്ചേർത്തു.
അമേരിക്ക, കാനഡ, യൂറോപ്യൻ യൂണിയൻ, ജപ്പാൻ എന്നീ ബഹിരാകാശ ഏജൻസികളുമായുള്ള ഐഎസ്എസുമായുള്ള സഹകരണം എപ്പോൾ അവസാനിപ്പിക്കണമെന്ന റോസ്കോസ്മോസിന്റെ നിർദേശങ്ങൾ ഉടൻ റഷ്യൻ അധികാരികളെ അറിയിക്കുമെന്ന് റഷ്യന്‍ ബഹിരാകാശ ഏജൻസി ഡയറക്ടർ പറഞ്ഞു.
ഉപരോധം ഐഎസ്എസിലെ യുഎസ്-റഷ്യൻ പങ്കാളിത്തത്തെ നശിപ്പിക്കുമെന്ന് റോഗോസിൻ നേരത്തെ മുന്നറിയിപ്പ് നൽകിയിരുന്നു.
ഫെബ്രുവരി 24 ന് മോസ്കോ ഉക്രെയ്നിൽ സൈനിക നടപടി ആരംഭിച്ചതിന് ശേഷമാണ് യുഎസും യൂറോപ്യൻ സഖ്യകക്ഷികളും റഷ്യക്കെതിരെ കടുത്ത ഉപരോധത്തിന്റെ തരംഗങ്ങൾ അടിച്ചേൽപ്പിക്കാൻ തുടങ്ങിയത്.
പിരിമുറുക്കങ്ങൾക്കിടയിലും, ഒരു അമേരിക്കൻ ബഹിരാകാശ സഞ്ചാരിയും രണ്ട് റഷ്യൻ ബഹിരാകാശ സഞ്ചാരികളും ഒരേ ക്യാപ്‌സ്യൂളിൽ ISS ൽ നിന്ന് പുറപ്പെട്ടതിന് ശേഷം ബുധനാഴ്ച സുരക്ഷിതമായി കസാക്കിസ്ഥാനിൽ ഇറങ്ങി.
ചൊവ്വയുടെ ഉപരിതലത്തിൽ ജീവന്റെ അടയാളങ്ങൾ തിരയാനുള്ള എക്സോമാർസ് റോവർ ദൗത്യത്തിൽ റോസ്‌കോസ്‌മോസുമായുള്ള സഹകരണം നിർത്തുകയാണെന്ന് യൂറോപ്യൻ ബഹിരാകാശ ഏജൻസി (ഇഎസ്‌എ) കഴിഞ്ഞ മാസം പ്രഖ്യാപിച്ചിരുന്നു.
ഉക്രെയ്‌നിലെ നടപടിയുടെ പേരിൽ യുഎസ് വാണിജ്യ വകുപ്പ് റഷ്യയ്‌ക്കെതിരെ കൂടുതൽ ഉപരോധം ഏർപ്പെടുത്തുമെന്ന് വൈറ്റ് ഹൗസ് വക്താവ് കേറ്റ് ബെഡിംഗ്ഫീൽഡ് പ്രഖ്യാപിച്ച് രണ്ട് ദിവസത്തിന് ശേഷമാണ് റോഗോസിന്റെ പ്രസ്താവന പുറത്തുവന്നത്.
വരുംദിവസങ്ങളിൽ പ്രഖ്യാപിക്കാനിരിക്കുന്ന പുതിയ ഉപരോധങ്ങൾ റഷ്യയുടെ പ്രതിരോധം, എയ്‌റോസ്‌പേസ്, നാവിക മേഖലകളെ ലക്ഷ്യം വയ്ക്കുമെന്ന് അവർ കൂട്ടിച്ചേർത്തു.
റഷ്യയ്‌ക്കെതിരായ പാശ്ചാത്യ ഉപരോധം യുദ്ധ പ്രഖ്യാപനത്തിന് തുല്യമാണെന്ന് കഴിഞ്ഞ മാസം റഷ്യൻ പ്രസിഡന്റ് വ്‌ളാഡിമിർ പുടിൻ പറഞ്ഞിരുന്നു.
