വാഷിംഗ്ടണ്‍: ഉക്രെയ്നിലെ സൈനിക നടപടിയെച്ചൊല്ലി പാശ്ചാത്യ രാജ്യങ്ങളും റഷ്യയും തമ്മിലുള്ള സംഘർഷം രൂക്ഷമായ സാഹചര്യത്തിൽ, റഷ്യൻ ഉദ്യോഗസ്ഥർക്കും സ്ഥാപനങ്ങൾക്കും എതിരെ യുഎസ് ബുധനാഴ്ച പുതിയ ഉപരോധം ഏർപ്പെടുത്തി.
റഷ്യ ഉക്രെയ്നില്‍ നടത്തിയ മനുഷ്യത്വരഹിതമായ “ക്രൂരതകൾക്ക്” തക്കതായ ശിക്ഷ നല്‍കണമെന്ന ആഗോള അഭിപ്രായം കണക്കിലെടുത്താണ് വാഷിംഗ്ടൺ റഷ്യൻ ബാങ്കുകൾക്കും കമ്പനികൾക്കും സർക്കാർ ഉദ്യോഗസ്ഥർക്കും – അവരുടെ കുടുംബാംഗങ്ങൾ ഉൾപ്പെടെ – പുതിയ ഉപരോധം ഏർപ്പെടുത്തിയത്.
പ്രസിഡന്റ് വ്‌ളാഡിമിർ പുടിന്റെ മുതിർന്ന കുട്ടികളും വിദേശകാര്യ മന്ത്രി സെർജി ലാവ്‌റോവിന്റെ ഭാര്യയും മകളും ഉൾപ്പെടുന്ന ഏറ്റവും പുതിയ റൗണ്ട് പൂർണ്ണ ഉപരോധം ലക്ഷ്യമിടുന്നവരിൽ ഉൾപ്പെടുന്നു.
പ്രധാനമന്ത്രി മിഖായേൽ മിഷുസ്റ്റിൻ, മുൻ പ്രസിഡന്റ് ദിമിത്രി മെദ്‌വദേവ് എന്നിവർക്കും റഷ്യൻ സുരക്ഷാ കൗൺസിലിലെ അംഗങ്ങള്‍ക്കും ഉപരോധം ബാധകമാണ്.
യുഎസ് സാമ്പത്തിക വ്യവസ്ഥയില്‍ ഏര്‍പ്പെടുന്ന Sberbank, Alfa-Bank എന്നിവയുടെ എല്ലാ ആസ്തികളും തടയുമെന്നും അവരുമായി വ്യാപാരം ചെയ്യുന്നതിൽ നിന്ന് അമേരിക്കക്കാരെ വിലക്കുമെന്നും പ്രസ്താവനയിൽ പറയുന്നു.
ആഗോള സമ്പദ്‌വ്യവസ്ഥയിൽ നിന്ന് റഷ്യയെ കൂടുതൽ ഒറ്റപ്പെടുത്തുന്നതിനും, “റഷ്യൻ ഫെഡറേഷന്റെ ആഗോള മത്സരക്ഷമതയുടെ ശാശ്വതമായ ദുർബലത ഉറപ്പാക്കുന്നതിനും” അമേരിക്കക്കാർ എവിടെയായിരുന്നാലും റഷ്യയിൽ നിക്ഷേപം നടത്തുന്നത് നിരോധിക്കുന്ന എക്സിക്യൂട്ടീവ് ഉത്തരവിൽ യുഎസ് പ്രസിഡന്റ് ജോ ബൈഡൻ വ്യാഴാഴ്ച ഒപ്പുവെക്കുമെന്നും വൈറ്റ് ഹൗസ് വൃത്തങ്ങള്‍ പറഞ്ഞു.
ഒരു മുതിർന്ന ഫ്രഞ്ച് സർക്കാർ ഉദ്യോഗസ്ഥനെ ഉദ്ധരിച്ച്, യൂറോപ്യൻ യൂണിയനും (EU) ബുധനാഴ്ച പുതിയ ഉപരോധം ഏർപ്പെടുത്തുമെന്ന് റിപ്പോര്‍ട്ടുകളുണ്ട്. Sberbank ഉപരോധം നേരിടാൻ സാധ്യതയുണ്ട്.
യൂറോപ്യൻ യൂണിയന്റെ എക്സിക്യൂട്ടീവ് ബ്രാഞ്ചും റഷ്യയിൽ നിന്നുള്ള കൽക്കരി ഇറക്കുമതി നിരോധിക്കണമെന്ന് ആവശ്യപ്പെട്ടിട്ടുണ്ട്. ആദ്യമായാണ് രാജ്യത്തിന്റെ ഊർജ്ജ വ്യവസായത്തിന് തടസ്സം നേരിടുന്നത്.
ബുച്ചയിലെ “ക്രൂരമായ കുറ്റകൃത്യങ്ങൾ” നടത്തിയ റഷ്യയ്ക്കു മേല്‍ യൂറോപ്യന്‍ യൂണിയന്‍ സമ്മര്‍ദ്ദം വര്‍ദ്ധിപ്പിക്കേണ്ടതുണ്ടെന്ന് യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ പറഞ്ഞു.
