ഉക്രെയിൻ ആക്രമിച്ചതിന് യുഎൻ രക്ഷാസമിതിയിൽ (യുഎൻഎസ്‌സി) റഷ്യക്കെതിരെ കൊണ്ടുവന്ന പ്രമേയത്തിന്റെ വോട്ടെടുപ്പിൽ നിന്ന് ഇന്ത്യ വിട്ടുനിന്നത് വിവാദമായിരിക്കുകയാണ്. റഷ്യ ഉക്രെയ്നില്‍ അധിനിവേശം ആരംഭിച്ചതുമുതല്‍ അമേരിക്കയും യൂറോപ്യന്‍ രാജ്യങ്ങളും നിരന്തരം റഷ്യയ്ക്കെതിരെ ഉപരോധങ്ങള്‍ ഏര്‍പ്പെടുത്തിക്കൊണ്ടിരിക്കുന്നതിനോടൊപ്പം, ഉക്രെയ്നിന് സഹായങ്ങളും ലഭ്യമാക്കിക്കൊണ്ടിരിക്കുന്നു. ലോക രാജ്യങ്ങളില്‍ ബഹുഭൂരിഭാഗവും റഷ്യയുടെ നടപടിയെ അപലപിച്ചപ്പോള്‍ ഇന്ത്യയും ചൈനയും റഷ്യയോട് അനുകൂല ചായ്‌വ് പ്രകടിപ്പിച്ചത് ഇന്ന് ചര്‍ച്ചാവിഷയമായിരിക്കുകയാണ്. റഷ്യയോട് മൃദുസമീപനം പാടില്ല എന്ന് ചില യു എസ് കോണ്‍ഗ്രസ് അംഗങ്ങള്‍ ഇന്ത്യയോട് നിര്‍ദ്ദേശിക്കുകയും ചെയ്തിരിക്കുന്നു.
എന്നാല്‍, റഷ്യയെ സസ്പെന്‍ഡ് ചെയ്യാന്‍ യുഎൻ മനുഷ്യാവകാശ കൗൺസിലിൽ (യുഎൻജിഎ) വ്യാഴാഴ്ച നടന്ന വോട്ടെടുപ്പില്‍ നിന്ന് ഇന്ത്യ വിട്ടു നിന്നതും ഇപ്പോള്‍ വിവാദമായി. ഉക്രെയ്‌നിന്റെ തലസ്ഥാനമായ കൈവിനു സമീപം റഷ്യൻ സൈന്യം സാധാരണക്കാരെ കൊലപ്പെടുത്തിയെന്ന ആരോപണത്തെ തുടർന്നാണ് യുഎൻജിഎയിൽ നിന്ന് റഷ്യയെ സസ്പെന്‍ഡ് ചെയ്യണമെന്ന നിര്‍ദ്ദേശം യുഎസ് മുന്നോട്ടുവച്ചത്.
193 അംഗരാജ്യങ്ങളുടെ പൊതുസഭ വ്യാഴാഴ്ച മനുഷ്യാവകാശ കൗൺസിലിൽ നിന്ന് റഷ്യയെ സസ്പെന്‍ഡ് ചെയ്യാനുള്ള പ്രമേയത്തിൽ വോട്ട് ചെയ്തു. അമേരിക്കയുടെ നിർദ്ദേശത്തിന് അനുകൂലമായി 93 വോട്ടുകളും എതിർപ്പിൽ 24 വോട്ടുകളും ലഭിച്ചു, മറുവശത്ത് 58 രാജ്യങ്ങൾ വോട്ടിംഗിൽ പങ്കെടുത്തില്ല. അതില്‍ ഇന്ത്യയും ഉള്‍പ്പെടും. മനുഷ്യാവകാശ കൗൺസിലിൽ നിന്ന് റഷ്യൻ ഫെഡറേഷനെ സസ്പെൻഡ് ചെയ്യാനുള്ള പ്രമേയത്തിൽ ഇന്ത്യ വിട്ടുനിന്നതിനെ ഐക്യരാഷ്ട്രസഭയിലെ ഇന്ത്യയുടെ സ്ഥിരം പ്രതിനിധി ടി എസ് തിരുമൂർത്തി ന്യായീകരിക്കുകയും ചെയ്തു. യുക്തിസഹവും നടപടിക്രമപരവുമായ കാരണങ്ങളാലാണ് അത് ചെയ്തതെന്നാണ് അദ്ദേഹം പറഞ്ഞത്.
ഇക്കാര്യത്തില്‍ ഇന്ത്യയെ പഴിക്കുമ്പോള്‍ തന്നെ, ഇന്ത്യ-റഷ്യ-അമേരിക്ക ബന്ധങ്ങളുടെ ഭൂതകാലത്തിലേക്ക് ഒന്ന് എത്തി നോക്കുന്നതും നല്ലതാണ്. ഇന്ത്യയുടെ ഇപ്പോഴത്തെ നടപടി വളരെ ചിന്തനീയവും പ്രശംസനീയവുമാണെന്ന് അപ്പോള്‍ മാത്രമേ മനസ്സിലാകൂ. എല്ലാത്തിനുമുപരി, മുൻ സോവിയറ്റ് യൂണിയനും (യുഎസ്എസ്ആർ) ഇന്നത്തെ റഷ്യയും യുഎൻഎസ്‌സിയിലെ ഇന്ത്യൻ താൽപ്പര്യങ്ങളെ എങ്ങനെയാണ് പരിപാലിച്ചു പോന്നിരുന്നതെന്നും മനസ്സിലാകും. ഇന്ത്യക്ക് സഹായം ആവശ്യമുള്ള സമയങ്ങളിലെല്ലാം മുന്‍ സോവിയറ്റ് യൂണിയന്‍ (റഷ്യ) അവരുടെ വീറ്റോ പവര്‍ ഉപയോഗിച്ചാണ് ഇന്ത്യയ്ക്ക് കവചം തീര്‍ത്തിരുന്നത്.
1957 മുതൽ റഷ്യ ഇന്ത്യയുടെ തോളോട് തോൾ ചേർന്ന് നിൽക്കുന്ന സൗഹൃദ രാജ്യമാണ്. ഇന്ത്യയ്‌ക്കെതിരെ ഐക്യരാഷ്ട്ര സഭയില്‍ ആരെല്ലാം പ്രമേയങ്ങള്‍ കൊണ്ടുവന്നിട്ടുണ്ടോ അവയെല്ലാം വീറ്റോ അധികാരം ഉപയോഗിച്ച് റഷ്യ തടഞ്ഞത് ഒന്നോ രണ്ടോ തവണയല്ല, ആറ് തവണയാണെന്ന് ചരിത്രം നോക്കിയാല്‍ മനസ്സിലാകും. യുഎൻഎസ്‌സിയിൽ ഇന്ത്യയ്ക്ക് ദുരന്തമുണ്ടായപ്പോഴെല്ലാം റഷ്യയാണ് ഇന്ത്യയുടെ രക്ഷകനായി നിലകൊണ്ടിരുന്നത്.
1957 ഫെബ്രുവരി 20 – കശ്മീര്‍ പ്രതിരോധം
1947-ൽ ഇന്ത്യ സ്വാതന്ത്ര്യം നേടിയപ്പോൾ, കാശ്മീർ നാട്ടുരാജ്യമായി ഇന്ത്യയിൽ നിന്നും പാക്കിസ്താനില്‍ നിന്നും സ്വതന്ത്രമായി തുടരാൻ തീരുമാനിച്ചു. എന്നാൽ, ഏതാനും ദിവസങ്ങൾക്കുള്ളിൽ പാക്കിസ്താന്‍ ഗോത്രവർഗക്കാരെ അയച്ച് കശ്മീര്‍ ആക്രമിച്ചപ്പോൾ, കശ്മീരി നേതാക്കൾ ഇന്ത്യയുടെ സഹായം തേടി. ഏറ്റെടുക്കൽ രേഖയിൽ ഒപ്പിടാനുള്ള വ്യവസ്ഥയിൽ ഇന്ത്യ കശ്മീരിനെ സഹായിച്ചു. എന്നാൽ, അന്നത്തെ പ്രധാനമന്ത്രി ജവഹർലാൽ നെഹ്‌റു വിഷയം ഐക്യരാഷ്ട്രസഭയെ അറിയിച്ചു. നെഹ്‌റു ചെയ്ത ഈ തെറ്റിന്റെ ശിക്ഷ പില്‍ക്കാലത്ത് ഇന്ത്യക്ക് അനുഭവിക്കേണ്ടിവന്നു എന്നത് ചരിത്ര സത്യം.
1957 ഫെബ്രുവരി 20-ന് ഓസ്‌ട്രേലിയ, ക്യൂബ, യുകെ, യുഎസ് എന്നീ രാജ്യങ്ങൾ ഐക്യരാഷ്ട്രസഭയുടെ സുരക്ഷാ കൗൺസിലില്‍ ഇന്ത്യയുമായും പാക്കിസ്താനുമായും ചർച്ച ചെയ്ത് പ്രശ്നം പരിഹരിക്കാൻ പ്രേരിപ്പിക്കുന്ന പ്രമേയം കൊണ്ടുവന്നു. അങ്ങനെ ഇരു രാജ്യങ്ങളോടും തർക്ക മേഖലയിൽ നിന്ന് തങ്ങളുടെ സൈന്യത്തെ പിൻവലിക്കാൻ നിർദേശിച്ചു. കശ്മീരിൽ ഐക്യരാഷ്ട്രസഭയുടെ സൈന്യത്തെ താത്കാലികമായി വിന്യസിക്കണമെന്ന നിർദേശവും ഉയർന്നു.
അന്നത്തെ സോവിയറ്റ് യൂണിയൻ ഈ നിർദ്ദേശത്തിനെതിരെ വീറ്റോ അധികാരം ഉപയോഗിച്ചപ്പോൾ സ്വീഡൻ വോട്ടെടുപ്പിൽ നിന്ന് വിട്ടുനിന്നു. അന്ന് യുഎൻഎസ്‌സിയുടെ പ്രസിഡന്റും സ്വീഡനിൽ നിന്നുള്ളയാളായിരുന്നു. ഓസ്‌ട്രേലിയ, ചൈന, കൊളംബിയ, ക്യൂബ, ഫ്രാൻസ്, ഇറാഖ്, ഫിലിപ്പീൻസ്, യുകെ, യുഎസ് എന്നീ രാജ്യങ്ങൾ പ്രമേയത്തിന് അനുകൂലമായി വോട്ട് ചെയ്തു.
1961 ഡിസംബർ 18 – ഗോവ, ദാമൻ, ദിയു
ഗോവയിലും ദാമൻ ദിയുവിലും ഇന്ത്യന്‍ സൈനികരെ ഉപയോഗിക്കുന്നതിനെതിരെ ഫ്രാൻസ്, തുർക്കി, യുകെ, യുഎസ് എന്നീ രാജ്യങ്ങൾ രക്ഷാസമിതിയിൽ ഇന്ത്യയ്‌ക്കെതിരെ സംയുക്ത പ്രമേയം കൊണ്ടുവന്നു. പ്രമേയത്തിൽ, 1961 ഡിസംബർ 17 ന് മുമ്പ് സൈന്യത്തെ പിൻവലിക്കണമെന്നും സ്ഥിതിഗതികൾ പുനഃസ്ഥാപിക്കണമെന്നും ഇന്ത്യാ ഗവൺമെന്റിനോട് ആവശ്യപ്പെട്ടിരുന്നു.
സോവിയറ്റ് യൂണിയൻ, സിലോൺ (അന്ന് ശ്രീലങ്ക), ലൈബീരിയ, യുഎഇ എന്നീ രാജ്യങ്ങൾ ഈ നിർദ്ദേശത്തെ എതിർത്ത് ഇന്ത്യയെ പിന്തുണച്ചു. അതേസമയം, ചിലി, ചൈന, ഇക്വഡോർ, ഫ്രാൻസ്, തുർക്കി, യുകെ, യുഎസ് എന്നീ രാജ്യങ്ങൾ ഇന്ത്യയെ എതിർക്കുന്ന പ്രമേയത്തെ പിന്തുണച്ചു. “പോർച്ചുഗലിന്റെ സംരക്ഷകർ ഐക്യരാഷ്ട്രസഭയുടെ താൽപ്പര്യങ്ങളല്ല, മറിച്ച് ഇരുപതാം നൂറ്റാണ്ടിലെ ഏറ്റവും ലജ്ജാകരമായ തത്ത്വചിന്തയായ കൊളോണിയലിസത്തിന് അനുകൂലമാണ്,” എന്നാണ് സംവാദത്തെക്കുറിച്ചുള്ള ചർച്ചയിൽ, യുഎന്നിലെ സോവിയറ്റ് അംബാസഡർ വലേറിയൻ സോറിൻ പറഞ്ഞത്.
1962 ജൂൺ 22 – കശ്മീർ പ്രശ്നം വീണ്ടും ഉയർന്നു
അമേരിക്കയുടെ പിന്തുണയോടെ, അയർലൻഡ് സുരക്ഷാ കൗൺസിലിൽ ഒരു പ്രമേയം കൊണ്ടുവന്നു. അതിൽ കശ്മീർ തർക്കം പരിഹരിക്കാൻ ഇന്ത്യയുടെയും പാക്കിസ്താന്റേയും സർക്കാരുകളോട് ആവശ്യപ്പെട്ടു. ചർച്ചയിലൂടെ ധാരണയിലെത്താൻ ഇരു സർക്കാരുകളും അത്തരമൊരു അന്തരീക്ഷം സൃഷ്ടിക്കണമെന്നും അതിൽ പറഞ്ഞു. ഈ നിർദ്ദേശത്തിനെതിരെ സോവിയറ്റ് യൂണിയൻ വീണ്ടും വീറ്റോ അധികാരം ഏർപ്പെടുത്തി. റൊമാനിയയും പ്രമേയത്തിനെതിരെ വോട്ട് ചെയ്തുകൊണ്ട് ഇന്ത്യയെ പിന്തുണച്ചു. ഘാനയും യുഎഇയും വോട്ടെടുപ്പിൽ നിന്ന് വിട്ടുനിന്നു. ചിലി, ചൈന, ഫ്രാൻസ്, അയർലൻഡ്, യുകെ, യുഎസ്, വെനസ്വേല എന്നിവയെല്ലാം പ്രമേയത്തെ അനുകൂലിച്ചു.
1971 ഡിസംബർ 4 – പാക്കിസ്താന്‍ അതിർത്തിയിൽ വെടിനിർത്തലിന് ആഹ്വാനം
ഇന്ത്യ-പാക് അതിർത്തിയിൽ വെടിനിർത്തൽ നടപ്പാക്കാൻ യുഎസിന്റെ നേതൃത്വത്തിൽ കൊണ്ടുവന്ന പ്രമേയത്തിനെതിരെ റഷ്യ വീറ്റോ അധികാരം ഉപയോഗിച്ചു. അർജന്റീന, ബെൽജിയം, ബുറുണ്ടി, ചൈന, ഇറ്റലി, ജപ്പാൻ, നിക്കരാഗ്വ, സിയറ ലിയോൺ, സൊമാലിയ, സിറിയ, അമേരിക്ക എന്നീ രാജ്യങ്ങൾ പ്രമേയത്തെ പിന്തുണച്ചു. അന്നത്തെ ജനസംഘം (പിന്നീട് ബിജെപി) അദ്ധ്യക്ഷന്‍ അടൽ ബിഹാരി വാജ്പേയി റഷ്യയുടെ വീറ്റോയെ സ്വാഗതം ചെയ്തിരുന്നു. ഡൽഹി രാംലീല മൈതാനിയിൽ സംഘടിപ്പിച്ച റാലിയിൽ വാജ്പേയി പറഞ്ഞു, “നിലവിലെ പ്രതിസന്ധിയിൽ നമ്മളെ പിന്തുണയ്ക്കുന്നവർ
നമ്മുടെ സുഹൃത്താണ്. പ്രത്യയശാസ്ത്ര പോരാട്ടം പിന്നീട് നടക്കും.” അന്നത്തെ സോവിയറ്റ് യൂണിയനും ഇന്നത്തെ റഷ്യയും നയിക്കുന്ന ഇടതുപക്ഷത്തോടാണ് ജനസംഘം എതിർത്തിരുന്നത്.
1971 ഡിസംബർ 5 – അഭയാർത്ഥി പ്രശ്നം
അർജന്റീന, ബെൽജിയം, ബുറുണ്ടി, ഇറ്റലി, ജപ്പാൻ, നിക്കരാഗ്വ, സിയറ ലിയോൺ, സൊമാലിയ എന്നീ രാജ്യങ്ങൾ ഇന്ത്യ-പാക് അതിർത്തിയിൽ വെടിനിർത്തൽ പ്രഖ്യാപിച്ച് അഭയാർഥികളുടെ മടക്കം സുഗമമാക്കി. വീറ്റോ അധികാരം ഉപയോഗിച്ച് സോവിയറ്റ് യൂണിയൻ അഞ്ചാം തവണയും ഇന്ത്യയെ പിന്തുണച്ചു. ഇന്ത്യക്കെതിരെ നിര്‍ദ്ദേശങ്ങള്‍ കൊണ്ടുവന്നവരുടെ കൂടെ അമേരിക്ക നിലയുറപ്പിച്ചു. അതേസമയം പോളണ്ട് ഈ നിർദ്ദേശത്തിനെതിരെ വോട്ട് ചെയ്തു. യുകെയും ഫ്രാൻസും വോട്ടെടുപ്പിൽ നിന്ന് വിട്ടുനിന്നു.
1971 ഡിസംബര്‍ 14 – സൈന്യത്തെ പിൻവലിക്കാനുള്ള ആവശ്യം
വെടിനിർത്തലിന് ആവശ്യമായ എല്ലാ നടപടികളും സ്വീകരിക്കാനും, അതത് പ്രദേശങ്ങളിലേക്ക് സൈന്യത്തെ പിൻവലിക്കാനും ഇന്ത്യ, പാക്കിസ്താന്‍ സർക്കാരുകളോട് യുഎസ് സ്പോൺസർ ചെയ്ത പ്രമേയം ആവശ്യപ്പെട്ടു. സോവിയറ്റ് യൂണിയൻ ഈ നിർദ്ദേശം വീണ്ടും വീറ്റോ ചെയ്തു. പോളണ്ടും നിർദ്ദേശത്തിനെതിരെ വോട്ട് ചെയ്തു. ഫ്രാൻസും യുകെയും വീണ്ടും വോട്ടെടുപ്പിൽ പങ്കെടുത്തില്ല. അർജന്റീന, ബെൽജിയം, ബുറുണ്ടി, ചൈന, ഇറ്റലി, ജപ്പാൻ, നിക്കരാഗ്വ, സിറിയ ലിയോൺ, സൊമാലിയ, സിറിയ, യുഎസ് എന്നീ രാജ്യങ്ങൾ പ്രമേയത്തെ അനുകൂലിച്ചു.
അന്നും ഇന്ത്യാ വിരുദ്ധ നയം അമേരിക്ക മാറ്റിയില്ല
അങ്ങനെ റഷ്യ വീറ്റോ അധികാരം ഉപയോഗിച്ച സുരക്ഷാ കൗൺസിലിൽ ഇന്ത്യയ്‌ക്കെതിരെ കൊണ്ടുവന്ന ആറ് പ്രമേയങ്ങളിലും യുഎസ് പിന്തുണച്ചു. ഈ സമയത്ത്, ചില ശക്തമായ രാജ്യങ്ങളും നിഷ്പക്ഷത പാലിച്ചു. പക്ഷേ, അമേരിക്ക എല്ലാ അവസരങ്ങളിലും ഇന്ത്യയെ എതിർത്തു.
1971-ൽ ഇന്ത്യയ്‌ക്കെതിരെ രണ്ട് പ്രമേയങ്ങൾ കൊണ്ടുവന്നു. ഫ്രാൻസും യുകെയും വോട്ടിംഗിൽ പങ്കെടുക്കാതെ നിഷ്പക്ഷ നിലപാട് സ്വീകരിച്ചെങ്കിലും അമേരിക്ക അപ്പോഴും ഇന്ത്യയെ എതിർത്തു. അതിന് മുമ്പ് യുകെയും ഫ്രാൻസും ഇന്ത്യക്കെതിരെ വോട്ട് ചെയ്തിരുന്നു.
