കാബൂൾ: അഫ്ഗാനിസ്ഥാന്റെ തലസ്ഥാനമായ കാബൂളിന് സമീപമുള്ള സ്‌കൂളിൽ ചൊവ്വാഴ്ച നടന്ന ബോംബ് സ്ഫോടനങ്ങളില്‍ നിരവധി പേര്‍ക്ക് പരിക്കേറ്റു. കാബൂളിനടുത്തുള്ള അബ്ദുൾ റഹീം ഷാഹിദ് ഹൈസ്‌കൂളിലാണ് സ്ഫോടനം നടന്നത്.
കാബൂളിലെ ഷിയാ വിഭാഗമായ ഹസാര ആധിപത്യമുള്ള പ്രദേശത്താണ് സ്ഫോടനം നടന്നതെന്ന് കാബൂൾ പോലീസ് പറഞ്ഞു. അതേസമയം, ആക്രമണത്തിന്റെ ഉത്തരവാദിത്തം ഇതുവരെ ഒരു സംഘടനയും ഏറ്റെടുത്തിട്ടില്ല. അഫ്ഗാനിസ്ഥാനിൽ ഷിയ-സുന്നി പോരാട്ടം അനുദിനം വര്‍ദ്ധിച്ചുവരികയാണ്.
ഭീകര സംഘടനയായ താലിബാൻ അഫ്ഗാനിസ്ഥാനിൽ ഭരണം സ്ഥാപിച്ചതിന് ശേഷം അവിടെ സ്ഥിതിഗതികൾ കൂടുതൽ വഷളായിക്കൊണ്ടിരിക്കുകയാണ്. ഭക്ഷണപാനീയങ്ങൾ ഉൾപ്പെടെയുള്ള ദൈനംദിന ആവശ്യങ്ങൾക്കായി അഫ്ഗാനിസ്ഥാനിലെ ജനങ്ങൾ വീടുകൾതോറും അലയേണ്ടിവരുന്നു. ഇത്രയും പ്രശ്‌നങ്ങൾക്കിടയിലും ബോംബ് സ്‌ഫോടനങ്ങൾ സാധാരണക്കാരുടെ ജീവിതം ദുസ്സഹമാക്കിയിരിക്കുകയാണ്. 2021 ഓഗസ്റ്റ് 15-നാണ് അഫ്ഗാനിസ്ഥാൻ ഭരണം താലിബാൻ പിടിച്ചെടുത്തത്.
താലിബാൻ അഫ്ഗാനിസ്ഥാൻ പിടിച്ചടക്കിയതിന് പിന്നാലെ രാജ്യത്തിന്റെ തലസ്ഥാനമായ കാബൂളിലെ വിമാനത്താവളത്തിന് സമീപം മൂന്ന് സ്ഫോടനങ്ങളുണ്ടായി. ഈ സ്ഫോടനങ്ങളിൽ 100-ലധികം പേർ കൊല്ലപ്പെട്ടു. 120ലധികം പേർക്ക് പരിക്കേറ്റു. മരിച്ചവരിൽ 13 അമേരിക്കൻ കമാൻഡോകളും ഉൾപ്പെടുന്നു.
സ്‌ഫോടനങ്ങളിലൊന്ന് എയർപോർട്ടിലെ അബായ് ഗേറ്റിലും മറ്റൊന്ന് വിമാനത്താവളത്തിന് സമീപമുള്ള ബാരൺ ഹോട്ടലിന് സമീപവുമാണ് നടന്നത്. ബ്രിട്ടീഷ് പട്ടാളക്കാർ ഈ ഹോട്ടലിൽ താമസിച്ചിരുന്നു.
