ന്യൂഡൽഹി: രാജ്യതലസ്ഥാനത്തെ ജഹാംഗീർപുരി അക്രമത്തിന് ശേഷം ഡൽഹി മുനിസിപ്പൽ കോർപ്പറേഷന്റെ (എംസിഡി) ഒമ്പത് ബുൾഡോസറുകൾ ജഹാംഗീർപുരിയിൽ അനധികൃത നിർമാണം പൊളിച്ചുനീക്കാൻ രാവിലെ തന്നെ നിലത്തിറക്കി.
അനധികൃത നിർമാണങ്ങൾ പൊളിക്കുന്നതിനുള്ള എക്കാലത്തെയും വലിയ പ്രവർത്തനമാണ് ജഹാംഗീര്‍പുരിയിയില്‍ അരങ്ങേറിയത്. അന്തരീക്ഷം സംഘർഷഭരിതമാവുകയും ക്രമസമാധാനം തകരാനുള്ള സാധ്യത മുന്നില്‍ കണ്ട് കർശന സുരക്ഷാ ക്രമീകരണങ്ങളാണ് ഏർപ്പെടുത്തിയിരുന്നത്.
ബുള്‍ഡോസറുകള്‍ എത്തിയയുടനെ ആദ്യം തകര്‍ത്തത് രാമൻ ഝാ എന്നയാളുടെ കടയാണ്. 1985 മുതൽ താൻ ഇതേ സ്ഥലത്ത് പാൻ കട നടത്തുകയാണെന്ന് രാമൻ പറയുന്നു. കൂടാതെ, പൂജയും ആളുകളുടെ വീടുകളിൽ പൂജ-പാരായണവും നടത്താറുണ്ട്. രാവിലെ, പ്രദേശത്ത് എംസിഡി ജീവനക്കാരുടെയും പോലീസ് സേനയുടെയും എണ്ണം കൂടിയപ്പോൾ, അവരുടെ കടയും പൊളിക്കുമോ എന്ന് അദ്ദേഹം അവരോട് ചോദിച്ചിരുന്നു.
തന്റെ കട അപകടത്തിലല്ലെന്ന് എംസിഡി ജീവനക്കാർ തന്നോട് പറഞ്ഞെങ്കിലും ബുൾഡോസർ വന്നയുടൻ തന്റെ കടയാണ് ആദ്യം പൊളിച്ചതെന്ന് രാമൻ ഝാ പറഞ്ഞു. ഇയാളോടൊപ്പം ഭാര്യയും സാധനങ്ങൾ വിതരണം ചെയ്യുന്ന തിരക്കിലായിരുന്നു. പ്രതിമാസം 5000 രൂപ വരുമാനം ലഭിച്ചിരുന്ന കടയാണ് തകര്‍ത്തത്. ഇപ്പോൾ തന്റെ വരുമാന മാർഗം അടഞ്ഞു എന്ന് രാമന്‍ പറഞ്ഞു. കട പൂർണമായും തകർന്നു. ചില സാധനങ്ങൾ ദമ്പതികൾക്ക് നീക്കം ചെയ്യാൻ സാധിച്ചെങ്കിലും ഒരുപാട് സാധനങ്ങൾക്ക് കേടുപാടുകൾ സംഭവിച്ചിട്ടുണ്ട്, ഇനി എങ്ങനെ കട തുടങ്ങുമെന്ന ആശങ്കയും ഇവരെ അലട്ടുന്നുണ്ട്.
അനധികൃത നിർമാണത്തിൽ നിന്ന് ജഹാംഗീർപുരിയെ മോചിപ്പിക്കാനുള്ള എല്ലാ തയ്യാറെടുപ്പുകളോടെയുമാണ് എംസിഡി രംഗത്തിറങ്ങിയിരിക്കുന്നത്. ബുൾഡോസറുകൾ ഓരോന്നായി മുന്നോട്ട് നീങ്ങി കൈയേറ്റം പൊളിക്കുന്ന തിരക്കിലാണ്. എന്നാൽ, മുനിസിപ്പൽ ഭരണത്തിന്റെ ബുൾഡോസറുകൾക്ക് കൂടുതൽ സമയം ലഭിച്ചില്ല. 85 മിനിറ്റിനുശേഷം സുപ്രീം കോടതിയുടെ ഉത്തരവ് വന്നു. തൽസ്ഥിതി തുടരാൻ സുപ്രീം കോടതി ഉത്തരവിടുകയും സ്ഥലത്തുണ്ടായിരുന്ന നോർത്ത് എംസിഡി മേയർ നടപടി നിർത്താൻ ബുൾഡോസർ ബ്രിഗേഡിന് നിർദേശം നൽകുകയും ചെയ്തു.
