ഒട്ടാവ: യുക്രൈനിലെ കനേഡിയൻ എംബസി ഉടൻ വീണ്ടും തുറക്കുമെന്ന് കനേഡിയൻ വിദേശകാര്യ മന്ത്രി മെലാനി ജോളി അറിയിച്ചു.
അടുത്ത ഏതാനും ദിവസങ്ങൾക്കോ ആഴ്‌ചകൾക്കോ ഉള്ളിൽ അത് ചെയ്യണമെന്നാണ് തന്റെ ലക്ഷ്യമെന്ന് ജോളി വ്യാഴാഴ്ച സെനറ്റ് ഫോറിൻ അഫയേഴ്‌സ് ആൻഡ് ഇന്റർനാഷണൽ ട്രേഡ് കമ്മിറ്റിക്ക് മുമ്പാകെ പറഞ്ഞതായി റിപ്പോർട്ട് പറയുന്നു. ജീവനക്കാര്‍ക്ക് സുരക്ഷിതമായ അന്തരീക്ഷം ഉണ്ടെന്ന് ഞങ്ങൾ ഉറപ്പാക്കേണ്ടതുണ്ടെന്ന് അവര്‍ പറഞ്ഞു.
ഫെബ്രുവരി 12 ന്, കിയെവിലെ കാനഡയുടെ എംബസി അടച്ചുപൂട്ടി നയതന്ത്ര ഉദ്യോഗസ്ഥരെ പടിഞ്ഞാറൻ നഗരമായ ലിവിവിലേക്ക് മാറ്റിയിരുന്നു. പിന്നീട്, മുഴുവൻ ജീവനക്കാരെയും പോളണ്ടിലേക്ക് മാറ്റി.
യുക്രെയിനിൽ യുകെ തങ്ങളുടെ നയതന്ത്രാലയം പുനരാരംഭിക്കുമെന്ന് ബ്രിട്ടീഷ് പ്രധാനമന്ത്രി ബോറിസ് ജോൺസൺ കഴിഞ്ഞ ആഴ്ച പ്രഖ്യാപിച്ചിരുന്നു. അമേരിക്ക, ഫ്രാൻസ്, ഇറ്റലി എന്നീ രാജ്യങ്ങളും സമാനമായ നിർദേശങ്ങൾ പ്രഖ്യാപിച്ചിട്ടുണ്ട്.
ഇത് പിന്തുടരാൻ കനേഡിയൻ ഗവൺമെന്റ് ഇപ്പോൾ സമ്മർദ്ദത്തിലാണ്. വ്യാഴാഴ്ച രാവിലെ, യുക്രെയ്നിലെ കനേഡിയന്‍ അംബാസഡർ ലാരിസ ഗലാഡ്സയുമായി ഇക്കാര്യം ചർച്ച ചെയ്തതായി ജോളി പറഞ്ഞു.
റഷ്യയിലെ മുൻ കനേഡിയൻ അംബാസഡർ ജെറമി കിൻസ്മാൻ വിശ്വസിക്കുന്നത് കാനഡ ഒരിക്കലും തങ്ങളുടെ നയതന്ത്ര ദൗത്യം ഉക്രെയ്നിൽ നിന്ന് മാറ്റാൻ പാടില്ലായിരുന്നു എന്നാണ്. റഷ്യൻ പ്രസിഡന്റ് വ്‌ളാഡിമിർ പുടിന്റെ ആണവഭീഷണിയെ കാനഡ ഗൗരവത്തോടെ കാണണമെന്ന് സെനറ്റർമാരും ജോളിയെ സമ്മർദ്ദത്തിലാക്കി.
