ഭോപ്പാൽ: ഇൻഡോറിലെ സ്വർണ ബാഗ് കോളനിയിലെ ഇരുനില കെട്ടിടത്തിൽ പുലർച്ചെയുണ്ടായ തീപിടുത്തത്തില്‍ ഏഴു പേര്‍ വെന്തു മരിച്ചു. ഒൻപത് പേരെ അഗ്നിശമന സേനാംഗങ്ങൾ കെട്ടിടത്തിൽ നിന്ന് ജീവനോടെ രക്ഷിച്ചു. അതിൽ ചിലരുടെ നില ഗുരുതരാവസ്ഥയിൽ തുടരുന്നു.
വിജയ് നഗർ പോലീസ് സ്റ്റേഷൻ പരിധിക്ക് കീഴിലുള്ള സ്വർണ്ണ ബാഗ് കോളനിയിലെ കെട്ടിടത്തിൽ തീപിടുത്തത്തെക്കുറിച്ച് പുലർച്ചെ മൂന്ന് മണിയോടെയാണ് എമർജൻസി റെസ്‌പോൺസ് സേവനത്തിന് കോൾ ലഭിച്ച്തെന്ന് ഇൻഡോർ പോലീസിലെ മുതിർന്ന ഉദ്യോഗസ്ഥൻ പറഞ്ഞു.
“പോലീസും അഗ്നിശമന സേനാംഗങ്ങളും സ്ഥലത്തെത്തി അഗ്നിശമന / രക്ഷാപ്രവർത്തനങ്ങൾ ആരംഭിച്ചു,” ഉദ്യോഗസ്ഥർ പറഞ്ഞു. അഗ്നിശമന സേനാംഗങ്ങൾ കെട്ടിടത്തിനകത്ത് കുടുങ്ങിയ 16 താമസക്കാരെ പുറത്തെടുത്തു.
സ്ഥലത്തുണ്ടായിരുന്ന വൃത്തങ്ങൾ പറയുന്നതനുസരിച്ച്, കെട്ടിടത്തിൽ നിന്ന് രക്ഷപ്പെടുത്തിയവരിൽ രണ്ടുപേരെങ്കിലും സർക്കാർ എംവൈ ആശുപത്രിയിലേക്കും മറ്റ് ആശുപത്രികളിലേക്കും കൊണ്ടുപോകുംമുമ്പ് മരിച്ചു.
മറ്റ് അഞ്ച് പേർ ആശുപത്രിയിലോ ആശുപത്രിയിലേക്ക് കൊണ്ടുപോകുമ്പോഴോ മരിച്ചു. തീപിടിത്തത്തിൽ മരിച്ച ഏഴ് പേരിൽ രണ്ട് പേർ സ്ത്രീകളാണെന്ന് വൃത്തങ്ങൾ അറിയിച്ചു. ആശുപത്രിയിൽ ചികിൽസയിലുള്ള മറ്റുള്ളവരിൽ ചിലർ ഗുരുതരാവസ്ഥയിലാണ്.
ബേസ്‌മെന്റിലെ എൻട്രി പോയിന്റിൽ സ്ഥാപിച്ചിട്ടുള്ള കെട്ടിടത്തിന്റെ പ്രധാന വൈദ്യുത വിതരണ പാനലിലെ ഷോർട്ട് സർക്യൂട്ടാണ് തീപിടിത്തത്തിന് കാരണമെന്ന് പ്രാഥമിക അന്വേഷണത്തിൽ കണ്ടെത്തി. ബേസ്‌മെന്റിൽ പാർക്ക് ചെയ്‌തിരുന്ന മോട്ടോർ ബൈക്കുകളിൽ തീ പടർന്നു. കെട്ടിടത്തിൽ അഗ്നി സുരക്ഷാ ഉപകരണങ്ങളൊന്നും സ്ഥാപിച്ചിട്ടില്ലെന്ന് ഇൻഡോർ പോലീസ് ഉദ്യോഗസ്ഥർ പറഞ്ഞു.
മരിച്ചവരിൽ അഞ്ചുപേരെ തിരിച്ചറിഞ്ഞിട്ടുണ്ട്. എംപിയിലെ ഇൻഡോർ, ദേവാസ്, യുപിയിലെ ഝാൻസി എന്നിവിടങ്ങളിൽ നിന്നുള്ളവരാണ് മരിച്ചത്. മരിച്ചവരിൽ രണ്ടുപേർ അയൽപക്കത്തെ സ്വന്തം വീട് നിർമ്മിക്കുന്നതോ പുതുക്കിപ്പണിയുന്നതോ ആയതിനാൽ കെട്ടിടത്തിൽ വാടകയ്ക്ക് താമസിക്കുകയായിരുന്നു. കെട്ടിടത്തിൽ താമസിക്കുന്നവരിൽ പ്രൊഫഷണലുകളും വിദ്യാർത്ഥികളും ഉൾപ്പെടുന്നു.
സംഭവത്തിൽ, കെട്ടിട ഉടമ അൻസാർ പട്ടേലിനെ പോലീസ് കസ്റ്റഡിയിലെടുത്തിട്ടുണ്ട്, ഐപിസി സെക്ഷൻ 304 എ (അശ്രദ്ധമൂലമുള്ള മരണത്തിന് കാരണമായത്) പ്രകാരം കേസെടുത്തിട്ടുണ്ടെന്ന് ഒരു മുതിർന്ന പോലീസ് ഉദ്യോഗസ്ഥന്‍ മാധ്യമങ്ങളോടു പറഞ്ഞു. അന്വേഷണ ആവശ്യങ്ങൾക്കായി മുഴുവൻ കെട്ടിടവും പോലീസ് സീൽ ചെയ്തിട്ടുണ്ട്.
