കൊച്ചി: തൃക്കാക്കര നിയമസഭാ ഉപതിരഞ്ഞെടുപ്പിലെ സ്ഥാനാർത്ഥിയായി ഡോ. ജോ ജോസഫിനെ സി.പി.എം അവതരിപ്പിച്ചതിന് പിന്നാലെ സഭയുടെ നിയന്ത്രണത്തിലുള്ള ലിസി ആശുപത്രിയിൽ നടന്ന രാഷ്ട്രീയ ചേരിതിരിവ് രസകരമായ വഴിത്തിരിവിലേക്ക്. സിറോ മലബാർ സഭയെ തിരഞ്ഞെടുപ്പ് ചർച്ചയിലേക്ക് വലിച്ചിഴച്ചു എന്ന കുറ്റം ചുമത്തി യു.ഡി.എഫിനെ സി.പി.എം. പ്രതിക്കൂട്ടിലാക്കി. അപകടം മണത്തറിഞ്ഞ്, ജോസഫ് സഭയുടെ നോമിനിയാണെന്ന് പാർട്ടി ഒരിക്കലും പറഞ്ഞിട്ടില്ലെന്ന് മുതിർന്ന നേതാക്കളായ രമേശ് ചെന്നിത്തലയും ഡൊമിനിക് പ്രസന്റേഷനും വ്യക്തമാക്കി.
“സിൽവർ ലൈൻ, സർക്കാരിന്റെ മൊത്തത്തിലുള്ള പരാജയം തുടങ്ങിയ യഥാർത്ഥ വിഷയങ്ങളിൽ നിന്ന് ചർച്ചയെ വഴിതിരിച്ചുവിടാനാണ് സി.പി.എം സഭയെ തിരഞ്ഞെടുപ്പ് ചർച്ചയിലേക്ക് വലിച്ചിഴയ്ക്കുന്നത്. ഡോ. ജോ ജോസഫ് സഭയുടെ സ്ഥാനാർത്ഥിയാണെന്ന് കോൺഗ്രസ് ഒരിക്കലും പറഞ്ഞിട്ടില്ല. കോൺഗ്രസ് തെരഞ്ഞെടുപ്പിനെ രാഷ്ട്രീയമായി നേരിടുകയാണ്, യഥാർത്ഥ പ്രശ്‌നങ്ങൾ ചർച്ച ചെയ്യാൻ ഞങ്ങൾ ആഗ്രഹിക്കുന്നു. സി.പി.എം തന്ത്രങ്ങൾ തുറന്നുകാട്ടും,” ഡൊമിനിക് പ്രസന്റേഷന്‍ പറഞ്ഞു.
എന്നാൽ, കൊച്ചിയിൽ നടത്തിയ വാർത്താ സമ്മേളനത്തിൽ യു.ഡി.എഫിനെതിരായ ആരോപണം ആവർത്തിച്ച് വ്യവസായ മന്ത്രി പി.രാജീവ് രംഗത്തെത്തി. ഏറ്റവും അനുയോജ്യനായ സ്ഥാനാർത്ഥിയെ തിരഞ്ഞെടുക്കുന്നത് ഇടതുമുന്നണിയുടെ അവകാശമാണെന്ന് അദ്ദേഹം പറഞ്ഞു. “തിരഞ്ഞെടുപ്പ് ചർച്ചയിലേക്ക് സഭയെ വലിച്ചിഴച്ച് അപമാനിക്കാനാണ് കോൺഗ്രസ് ശ്രമിക്കുന്നത്. ലിസി ആശുപത്രിയെ അപകീർത്തിപ്പെടുത്താനും ഇവർ ശ്രമിച്ചിരുന്നു. ലെനിൻ സെന്ററിൽ നടന്ന വാർത്താ സമ്മേളനത്തിലാണ് എൽഡിഎഫ് സ്ഥാനാർത്ഥിയെ പ്രഖ്യാപിച്ചത്.”
തീരുമാനം ജോ ജോസഫിനെ അറിയിക്കാൻ മറ്റ് നേതാക്കൾക്കൊപ്പം ഞാനും ആശുപത്രിയിലെത്തിയിരുന്നു. എന്നാൽ, ഞങ്ങൾക്കും മുൻപേ മാധ്യമ പ്രവർത്തകർ ആശുപത്രിയിലെത്തി. ഞങ്ങൾ എത്തിയപ്പോൾ ജോ ജോസഫ് മാധ്യമങ്ങളോട് സംസാരിക്കുകയായിരുന്നു, ഞങ്ങൾ അദ്ദേഹത്തോടൊപ്പം ചേർന്നു. വൈദികൻ കൂടിയായ ആശുപത്രി ഡയറക്ടർ രാഷ്ട്രീയ പ്രസ്താവനകളൊന്നും നടത്തിയിട്ടില്ലെന്നും രാജീവ് പറഞ്ഞു.
സഭയെ തിരഞ്ഞെടുപ്പ് ചർച്ചയിലേക്ക് വലിച്ചിഴച്ചത് യു.ഡി.എഫല്ല രാജീവാണ്: വി ഡി സതീശൻ
മണിക്കൂറുകൾക്ക് ശേഷം പ്രതിപക്ഷ നേതാവ് വി ഡി സതീശനും മാധ്യമ പ്രവർത്തകരെ കാണുകയും സഭയെ തിരഞ്ഞെടുപ്പ് ചർച്ചയിലേക്ക് വലിച്ചിഴച്ചത് യു ഡി എഫല്ല, രാജീവാണെന്ന് അവകാശപ്പെടുകയും ചെയ്തു. ജോ ജോസഫ് സഭയുടെ സ്ഥാനാർത്ഥിയാണെന്ന് വരുത്തിത്തീർക്കാനാണ് എൽഡിഎഫ് ശ്രമമെന്നും അദ്ദേഹം ആരോപിച്ചു.
ജോ ജോസഫ് സഭയുടെ സ്ഥാനാർത്ഥിയാണോ എന്ന് സിപിഎം നേതാക്കളോട് ചോദിച്ചത് മാധ്യമ പ്രവർത്തകരാണ്. കുറ്റം ഞങ്ങളുടെ മേൽ കെട്ടിവെക്കാനാണ് സിപിഎം ശ്രമിക്കുന്നതെന്നും അദ്ദേഹം പറഞ്ഞു. അന്തരിച്ച എം.എൽ.എ പി.ടി തോമസുമായി സഭയ്ക്കും വിശ്വാസികൾക്കും ഉണ്ടായ പിണക്കം ഓർമിപ്പിക്കാനാണ് സി.പി.എം ശ്രമിക്കുന്നതെന്ന് യു.ഡി.എഫ് സംശയിക്കുന്നു. തൃക്കാക്കര ഉപതെരഞ്ഞെടുപ്പ് നിയമസഭയിൽ നൂറ് എന്ന മാന്ത്രിക സംഖ്യയിലെത്താനുള്ള അപൂർവ അവസരമാണെന്ന് എൽഡിഎഫ് തിരിച്ചറിഞ്ഞു. കൂടാതെ, തൃക്കാക്കരയിലെ വിജയം പ്രതിപക്ഷ പാർട്ടികളിൽ നിന്ന് കടുത്ത പ്രതിരോധം നേരിടുന്ന സിൽവർലൈൻ സെമി ഹൈസ്പീഡ് പദ്ധതിക്കുള്ള അംഗീകാരമായി എടുത്തു കാണിക്കാം.
തൃക്കാക്കര സുരക്ഷിത മണ്ഡലമായി കണക്കാക്കപ്പെടുന്നുണ്ടെങ്കിലും, മറ്റൊരു തോൽവി പാർട്ടി കേഡറെ കൂടുതൽ തളർത്തുകയും യു.ഡി.എഫിന്റെ ശിഥിലീകരണത്തിന് കാരണമാവുകയും ചെയ്യും എന്നതിനാൽ ഉപതിരഞ്ഞെടുപ്പ് കോൺഗ്രസിനെ സംബന്ധിച്ചിടത്തോളം നിര്‍ണ്ണായകമായ പോരാട്ടമാണ്. എൽഡിഎഫിനേക്കാൾ, ട്വന്റി 20യെ കോൺഗ്രസും സംയുക്ത സ്ഥാനാർത്ഥിയെ നിർത്താൻ ഉദ്ദേശിക്കുന്ന എഎപിയും തങ്ങളുടെ വോട്ട് വിഹിതം തട്ടിയെടുക്കുമെന്ന് ഭയപ്പെടുന്നു. ഡൽഹി മുഖ്യമന്ത്രി അരവിന്ദ് കെജ്‌രിവാൾ എഎപി-ട്വന്റി 20 സ്ഥാനാർത്ഥിക്ക് വേണ്ടി പ്രചാരണം നടത്തുമെന്ന് പ്രതീക്ഷിക്കുന്നു. കോൺഗ്രസിനും അതിന്റെ പുതിയ സംസ്ഥാന നേതൃത്വത്തിനും തോൽക്കാൻ കഴിയില്ല.
