ആഗ്ര: ലോകാത്ഭുതങ്ങളില്‍ ഒന്നായ, ലോകപ്രശസ്ത സ്മാരകമായ താജ്മഹൽ വീണ്ടും വിവാദത്തിൽ. താജ്മഹലിന് അടിയിലുള്ള 22 മുറികൾ തുറന്നു കൊടുക്കണമെന്ന് ആവശ്യപ്പെട്ട് അലഹബാദ് ഹൈക്കോടതിയിലാണ് ഹർജി ഫയൽ ചെയ്തിരിക്കുന്നത്.
22 മുറികൾ തുറന്നാൽ അവിടെ ക്ഷേത്രം ഉണ്ടായിരുന്നോ ഇല്ലയോ എന്ന് മനസ്സിലാകുമെന്ന് ആഗ്രയിലെ ചരിത്രകാരൻ രാജ്കിഷോർ പറയുന്നു. 22 മുറികളിൽ ഏതെങ്കിലും തരത്തിലുള്ള ക്ഷേത്രത്തിന്റെ ചിഹ്നങ്ങൾ ഉണ്ടെങ്കിൽ, ഒരു കാലഘട്ടത്തിൽ അതൊരു ശവകുടീരമല്ലായിരുന്നുവെന്നും അടയാളം കണ്ടെത്തിയില്ലെങ്കിൽ ഈ തർക്കം എന്നെന്നേക്കുമായി അവസാനിക്കുമെന്നും ചരിത്രകാരൻ രാജ് കിഷോർ പറഞ്ഞു. അതിനാൽ, 22 മുറികൾ തുറക്കേണ്ടത് ആവശ്യമാണ്, ഹർജിക്കാരൻ ആവശ്യപ്പെട്ടു.
“താജ്മഹലിന് കീഴിൽ നിർമ്മിച്ച 22 മുറികളിലേക്ക് പോകാനുള്ള ആദ്യ വഴി അവിടെയുണ്ടായിരുന്നു. എന്നാൽ, 45 വർഷം മുമ്പ് ആര്‍ക്കിയോളജിക്കല്‍ സര്‍‌വ്വേ ഓഫ് ഇന്ത്യ (എഎസ്‌ഐ) ആ വഴി അടച്ചു. ആ 22 മുറികളിൽ എന്താണുള്ളത്? ഈ ദുരൂഹത ഇതുവരെ പുറത്തുവന്നിട്ടില്ല” ചരിത്രകാരൻ രാജ് കിഷോർ പറഞ്ഞു. താജ്മഹലിന്റെ ഈ 22 മുറികളും തുറന്നാൽ താജ്മഹലുമായി ബന്ധപ്പെട്ട എല്ലാ രഹസ്യങ്ങളും പുറത്തുവരുമെന്നും രാജ് കിഷോർ കൂട്ടിച്ചേർത്തു.
“താജ്മഹൽ പണിയുമ്പോൾ ഷാജഹാൻ ദക്ഷിണേന്ത്യയിലായിരുന്നു. മുംതാസും അവർക്കൊപ്പമുണ്ടായിരുന്നു. ബർഹാൻപൂരിൽ വെച്ച് മുംതാസ് മരിച്ചു. ഷാജഹാന്റെ മകൻ സൗസ മുംതാസിന്റെ മൃതദേഹവുമായി ആഗ്രയിലെത്തി. ആദ്യം മുംതാസിനെ താജ്മഹലിന്റെ പ്രധാന കെട്ടിടത്തിനും മ്യൂസിയത്തിനും നടുവിൽ അടക്കം ചെയ്തു, ആറ് മാസത്തിന് ശേഷം മൃതദേഹം താജ്മഹലിന്റെ പ്രധാന ശവകുടീരത്തിൽ അടക്കം ചെയ്തു,” രാജ് കിഷോര്‍ പറയുന്നു.
താജ്മഹലിന്റെ നിർമ്മാണ സമയത്ത് ഷാജഹാൻ എവിടെയായിരുന്നു?
ഇത്രയും വലിയൊരു സ്മാരകം പണിയുമ്പോൾ എന്തുകൊണ്ട് ഷാജഹാൻ താജ്മഹലിൽ ഉണ്ടായിരുന്നില്ല എന്നാണ് ചരിത്രകാരൻ രാജ്കിഷോർ ചോദിക്കുന്നത്. താജ്മഹൽ കെട്ടിടം ഇതിനകം നിർമ്മിച്ചിരിക്കാം, ഷാജഹാൻ അതിൽ മാറ്റങ്ങൾ വരുത്തിയിരിക്കാം എന്ന സാധ്യതയും ചരിത്രകാരൻ ഉയർത്തി. താജ്മഹൽ സ്ഥിതി ചെയ്യുന്ന സ്ഥലം ജയ്പൂർ രാജാവ് മാൻ സിംഗിന്റെ സ്വത്തായിരുന്നു. ഷാജഹാൻ മാൻ സിംഗിന്റെ ചെറുമകൻ രാജാ ജയ് സിംഗിന് താജ്മഹലിന് പകരമായി നാല് കെട്ടിടങ്ങൾ നൽകിയിരുന്നു എന്ന് രാജ്കിഷോർ പറഞ്ഞു. താജ്മഹലിന്റെ നിർമ്മാണത്തിനായി 230 കാളവണ്ടികളില്‍ മാർബിൾ കൊണ്ട് വന്നതിന്റെ രേഖകള്‍ തന്റെ പക്കലുണ്ടെന്നും രാജ്കിഷോർ ശർമ്മ കൂട്ടിച്ചേർത്തു.
