കൊച്ചി: കിറ്റെക്‌സ് ഗ്രൂപ്പ് പ്രോത്സാഹിപ്പിക്കുന്ന രാഷ്ട്രീയ പാർട്ടിയായ ട്വന്റി 20 സംഘടിപ്പിക്കുന്ന പൊതുയോഗത്തിൽ പങ്കെടുക്കാൻ ഡൽഹി മുഖ്യമന്ത്രിയും ആം ആദ്മി പാർട്ടി ദേശീയ കൺവീനറുമായ അരവിന്ദ് കെജ്രിവാൾ ശനിയാഴ്ച കൊച്ചിയിലെത്തി.
കെജ്രിവാൾ ട്വന്റി20യുടെ ഭക്ഷ്യസുരക്ഷാ മാർക്കറ്റ്, ഗോഡ്‌സ് വില്ല എന്നിവ സന്ദർശിച്ചു. കിറ്റക്സ് എം.ഡി സാബു എം ജേക്കബും ഒപ്പമുണ്ടായിരുന്നു. സൂപ്പര്‍ മാര്‍ക്കറ്റിന്റെ പ്രവര്‍ത്തനത്തെക്കുറിച്ച് സാബു എം ജേക്കബ് കെജ്‌രിവാളിനോട് വിശദീകരിച്ചു. ഞായറാഴ്ച കൊച്ചിയിലെ കിഴക്കമ്പലം കിറ്റെക്‌സ് ഗ്രൗണ്ടിൽ പൊതുയോഗത്തിൽ പ്രസംഗിക്കുമെന്ന് എഎപി പാർട്ടി വൃത്തങ്ങൾ അറിയിച്ചു.
മെയ് 31 ന് തൃക്കാക്കര നിയമസഭാ മണ്ഡലത്തിൽ ഉപതെരഞ്ഞെടുപ്പ് നടക്കാനിരിക്കെ ട്വന്റി 20യുമായി എഎപി തന്ത്രപരമായ ധാരണയിലെത്തിയതായി അറിയുന്നു.
ഉപതെരഞ്ഞെടുപ്പിൽ ഇരു പാർട്ടികളും സ്ഥാനാർത്ഥികളെ നിർത്തിയിട്ടില്ലെങ്കിലും നാളത്തെ പൊതുയോഗത്തിൽ ട്വന്റി 20 പിന്തുണ പ്രഖ്യാപിക്കുമെന്ന് പ്രതീക്ഷിക്കുന്നു.
