ന്യൂഡൽഹി: ചൈനീസ് വിസ കുംഭകോണക്കേസ് വ്യാജ അന്വേഷണമാണെന്ന് കോൺഗ്രസ് എംപി കാർത്തി ചിദംബരം. വ്യാഴാഴ്ച ദേശീയ തലസ്ഥാനത്തെ സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) ആസ്ഥാനത്ത് നിന്ന് പുറത്തിറങ്ങി മാധ്യമങ്ങളോട് സംസാരിക്കുകയായിരുന്നു അദ്ദേഹം.
“ഇതൊരു കള്ളക്കേസും വ്യാജ അന്വേഷണവുമാണ്. അവർ എന്നോട് എപ്പോഴും മാന്യമായി പെരുമാറുന്നു, പക്ഷേ എന്നോട് ചോദിക്കാൻ ഒന്നുമില്ല. അതാണ് മുഴുവൻ സത്യവും,” അദ്ദേഹം പറഞ്ഞു.
ചൈനീസ് വിസ തട്ടിപ്പ് കേസുമായി ബന്ധപ്പെട്ട് കോൺഗ്രസ് എംപി ഇന്ന് രാവിലെയാണ് സിബിഐ ആസ്ഥാനത്ത് എത്തിയത്. ഒരു ചൈനീസ് പൗരനും വിസ ലഭിക്കാൻ താൻ സഹായം ചെയ്തിട്ടില്ലെന്നും ചിദംബരം പറഞ്ഞു. കേസിൽ കാർത്തിയുടെ അടുത്ത അനുയായി എസ് ഭാസ്‌കർ രാമനെ മെയ് 17ന് സിബിഐ അറസ്റ്റ് ചെയ്തിരുന്നു.
കാർത്തിയുടെ ജാമ്യം സംബന്ധിച്ച കോടതിയുടെ ഉത്തരവനുസരിച്ച് അദ്ദേഹം ഇന്ത്യയിലെത്തി 16 മണിക്കൂറിനുള്ളിൽ സിബിഐക്ക് മുമ്പാകെ ഹാജരാകണമെന്ന് വൃത്തങ്ങൾ നേരത്തെ അറിയിച്ചിരുന്നു.
കോൺഗ്രസ് എംപി ഉൾപ്പെട്ട ചൈനീസ് വിസ തട്ടിപ്പ് കേസിൽ എൻഫോഴ്സ്മെന്റ് ഡയറക്ടറേറ്റും (ഇഡി) കള്ളപ്പണം വെളുപ്പിക്കൽ കേസ് ഫയൽ ചെയ്തിരുന്നു.
പഞ്ചാബിൽ പവർ പ്രോജക്ട് പൂർത്തിയാക്കാൻ 263 ചൈനീസ് പൗരന്മാർക്ക് അനധികൃതമായി വിസ സൗകര്യമൊരുക്കാൻ കാർത്തി ചിദംബരം 50 ലക്ഷം രൂപ കൈപ്പറ്റിയെന്നാണ് ആരോപണം.
കാർത്തിയുടെ പിതാവും മുതിർന്ന കോൺഗ്രസ് നേതാവുമായ പി ചിദംബരം 2011ൽ ആഭ്യന്തര മന്ത്രിയായിരുന്നെങ്കിലും എഫ്‌ഐആറിൽ പി ചിദംബരത്തെ പ്രതി ചേർത്തിട്ടില്ല.
എംപിയെ കൂടാതെ, കാർത്തി ചിദംബരത്തിന്റെ ചാർട്ടേഡ് അക്കൗണ്ടന്റ് എസ് ഭാസ്‌കര രാമൻ, മാൻസ ആസ്ഥാനമായുള്ള സ്വകാര്യ കമ്പനിയായ തൽവണ്ടി സാബോ പവർ ലിമിറ്റഡിന്റെ പ്രതിനിധി വികാസ് മഖാരിയ, മുംബൈയിലെ ബെൽ ടൂൾസ്, അജ്ഞാതരായ പൊതുപ്രവർത്തകർ, സ്വകാര്യ വ്യക്തികൾ എന്നിവരുൾപ്പെടെ നാല് പേർക്കെതിരെയും സിബിഐ കേസെടുത്തു. .
