വാഷിംഗ്ടണ്‍: കഴിഞ്ഞ വർഷം യുഎസ് ക്യാപിറ്റോളിനു നേരെ നടന്ന ആക്രമണവുമായി ബന്ധപ്പെട്ട ക്രിമിനൽ കുറ്റങ്ങൾ ചുമത്തി വിചാരണ കാത്തിരിക്കുന്നതിനിടെ, ജയിലിൽ നിന്ന് മോചിപ്പിക്കാനുള്ള വലതുപക്ഷ ഗ്രൂപ്പായ പ്രൗഡ് ബോയ്‌സിന്റെ മുൻ ഉന്നത നേതാവ് എൻറിക് ടാരിയോയുടെ ഏറ്റവും പുതിയ അഭ്യർത്ഥന ജഡ്ജി നിരസിച്ചു.
ടാറിയോയ്‌ക്കെതിരായ തെളിവുകൾ “വളരെ ശക്തമാണ്” എന്നും, ഒരു ബോണ്ടും വീട്ടു തടങ്കലും പോലുള്ള നടപടികൾ “ടാരിയോ ഉയർത്തുന്ന അപകട ഭീഷണിയെ വേണ്ടത്ര ലഘൂകരിക്കുന്നില്ല” എന്നും യുഎസ് ജില്ലാ ജഡ്ജി തിമോത്തി കെല്ലി ഉത്തരവില്‍ പറഞ്ഞു.
ഭാവിയിൽ യുണൈറ്റഡ് സ്റ്റേറ്റ്സ് ഗവൺമെന്റിന്റെ നിയമാനുസൃതമായ പ്രവർത്തനത്തിന് സമാനമായ വെല്ലുവിളികൾ ആസൂത്രണം ചെയ്യാനുള്ള വൈദഗ്ധ്യവും വിഭവങ്ങളും നെറ്റ്‌വർക്കുകളും ടാറിയോയ്‌ക്കുണ്ടെന്നും ജസ്റ്റിസ് കെല്ലി പറഞ്ഞു.
ഫ്ലോറിഡയിലെ ഒരു ജഡ്ജി മുമ്പ് ടാറിയോയുടെ പ്രീട്രയൽ റിലീസിനുള്ള അഭ്യർത്ഥന നിരസിച്ചിരുന്നു. ആ ഉത്തരവ് പുനഃപരിശോധിക്കാനാണ് ടാരിയോ കെല്ലിയോട് ആവശ്യപ്പെട്ടത്.
ജോ ബൈഡന്റെ തിരഞ്ഞെടുപ്പ് വിജയം സാക്ഷ്യപ്പെടുത്തുന്നതിൽ നിന്ന് കോൺഗ്രസിനെ തടയാനുള്ള ശ്രമത്തിൽ അന്നത്തെ പ്രസിഡന്റ് ഡൊണാൾഡ് ട്രംപിന്റെ അനുയായികൾ ക്യാപ്പിറ്റോളില്‍ നടത്തിയ ആക്രമണത്തിൽ ക്രിമിനൽ കുറ്റം ചുമത്തപ്പെട്ട 775-ലധികം ആളുകളിൽ ഏറ്റവും ഉയർന്ന പ്രൊഫൈലിലുള്ള വ്യക്തിയാണ് ടാരിയോ.
2020 ഡിസംബറിൽ ചരിത്രപ്രസിദ്ധമായ ഒരു ആഫ്രിക്കൻ-അമേരിക്കൻ പള്ളിയിൽ ബ്ലാക്ക് ലൈവ്സ് മാറ്റർ ബാനർ കത്തിച്ചതിന് ടാറിയോയെ 2021 ജനുവരി 4-ന് പോലീസ് അറസ്റ്റ് ചെയ്തിരുന്നു. ഈ കുറ്റത്തിന് പിന്നീട് നാല് മാസം ജയിലിൽ കിടന്നു.
ജനുവരി 6-ന് നടന്ന ആക്രമണത്തിന് “തിരശ്ശീലയ്ക്ക് പിന്നിൽ നിന്ന്” നേതൃത്വം കൊടുത്ത വ്യക്തിയാണ് ടാറിയോ എന്ന് പ്രോസിക്യൂട്ടർമാർ പറഞ്ഞു. സോഷ്യൽ മീഡിയയിലെ തന്റെ അനുയായികളോട് കാപ്പിറ്റോൾ വിട്ടുപോകരുതെന്ന് നിര്‍ബ്ബന്ധിച്ചതും, പിന്നീട് എൻക്രിപ്റ്റ് ചെയ്ത ചാറ്റിൽ അവരെ പ്രചോദിപ്പിച്ചതും ടാരിയോ ആയിരുന്നു എന്നും പ്രൊസിക്യൂട്ടര്‍മാര്‍ പറഞ്ഞു.
ടാറിയോ 2021 ജനുവരി 5-ന് – ക്യാപിറ്റോളിനു നേരെയുള്ള ആക്രമണത്തിന് ഒരു ദിവസം മുമ്പ് – വാഷിംഗ്ടൺ ഡിസി വിട്ടു എന്ന് ടാറിയോയുടെ അറ്റോർണി നയിബ് ഹസ്സൻ മാർച്ചിൽ മാധ്യമ പ്രവർത്തകരോട് പറഞ്ഞിരുന്നു. “കേസ് ഇപ്പോൾ അവലോകനം ചെയ്തതനുസരിച്ച് തെളിവുകൾ ദുർബലമാണെന്നാണ് ഞങ്ങളുടെ അനുമാനം,” ഹസൻ പറഞ്ഞു.
റിപ്പബ്ലിക്കൻ പാർട്ടിക്കാരനായ അന്നത്തെ പ്രസിഡന്റ് ഡൊണാൾഡ് ട്രംപിനെതിരെ നിലവിലെ പ്രസിഡന്റ് ജോ ബൈഡന്റെ വിജയം സാക്ഷ്യപ്പെടുത്തുന്നതിൽ നിന്ന് കോൺഗ്രസിനെ തടയാൻ ആയിരക്കണക്കിന് ആളുകൾ അന്ന് ക്യാപ്പിറ്റോളില്‍ ഇരച്ചുകയറി. 800-ലധികം പേരാണ് ഇപ്പോള്‍ ക്രിമിനൽ കുറ്റം നേരിടുന്നത്.
