ന്യൂഡൽഹി: മാനുഷിക പ്രവര്‍ത്തനങ്ങള്‍ക്കായി യൂറോപ്പില്‍ പര്യടനം നടത്തുന്ന ചലച്ചിത്ര നിർമ്മാതാവ് വിവേക് രഞ്ജൻ അഗ്നിഹോത്രി ചൊവ്വാഴ്ച ഓക്സ്ഫോർഡ് യൂണിയനെ “ഹിന്ദുഫോബിയ” എന്ന് ആരോപിച്ചു. തന്റെ പരിപാടി റദ്ദാക്കിയതിന് അവർക്കെതിരെ കേസ് ഫയൽ ചെയ്യുമെന്ന് ഭീഷണിപ്പെടുത്തി.
“ഹിന്ദുഫോബിക് ഓക്സ്ഫോർഡ് യൂണിയനിൽ മറ്റൊരു ഹിന്ദു ശബ്ദം നിയന്ത്രിക്കപ്പെടുന്നു. അവർ എന്റെ പരിപാടി റദ്ദാക്കി. വാസ്തവത്തിൽ, അവർ ഹിന്ദു വംശഹത്യയും ഓക്സ്ഫോർഡ് സർവകലാശാലയിലെ ന്യൂനപക്ഷമായ ഹിന്ദു വിദ്യാർത്ഥികളെയും റദ്ദാക്കി. തിരഞ്ഞെടുക്കപ്പെട്ട പ്രസിഡന്റ് ഒരു പാക്കിസ്താനിയാണ്. ഈ ഏറ്റവും പ്രയാസകരമായ പോരാട്ടത്തിൽ എന്നെ പിന്തുണയ്ക്കുക,” കശ്മീർ ഫയൽസ് ഡയറക്ടർ വീഡിയോയ്‌ക്കൊപ്പം ട്വീറ്റ് ചെയ്തു.
താൻ കേംബ്രിഡ്ജ് സർവകലാശാലയിൽ സന്ദർശനം നടത്തിയെന്നും പരിപാടി വീഡിയോ റെക്കോർഡ് ചെയ്യാൻ അനുവദിക്കില്ലെന്ന് അവസാന നിമിഷം അറിയിച്ചെന്നും അദ്ദേഹം പറഞ്ഞു.
തന്റെ ‘ആവിഷ്കാര സ്വാതന്ത്ര്യം’ തടയപ്പെടുകയാണെന്ന് അദ്ദേഹം അവകാശപ്പെട്ടു, ഏതാനും പാക്കിസ്താനി, കശ്മീരി മുസ്ലീം വിദ്യാർത്ഥികൾ പ്രതിഷേധിച്ചതിനെ തുടർന്നാണ് സര്‍‌വ്വകലാശാല ഈ നടപടി സ്വീകരിച്ചതെന്ന് അദ്ദേഹം പറഞ്ഞു.
“ഞാൻ യൂറോപ്പിൽ ഒരു മനുഷ്യത്വ പര്യടനത്തിലാണെന്ന് നിങ്ങൾക്കറിയാം. കേംബ്രിഡ്ജ് യൂണിവേഴ്‌സിറ്റി, ഓക്സ്ഫോർഡ് യൂണിവേഴ്‌സിറ്റി, ബ്രിട്ടീഷ് പാർലമെന്റ് തുടങ്ങി ജർമ്മനിയിലെയും നെതർലൻഡിലെയും ഒരുപാട് സ്ഥലങ്ങൾ എന്നെ ക്ഷണിച്ചതിനാലാണ് ഈ ടൂർ തീരുമാനിച്ചത്. എന്നാൽ, ഇന്നലെ വളരെ വിചിത്രമായ ഒരു കാര്യം സംഭവിച്ചു. ഞാൻ കേംബ്രിഡ്ജ് യൂണിവേഴ്സിറ്റിയിലെത്തിയപ്പോൾ, അവസാന നിമിഷം, പരിപാടി വീഡിയോ റെക്കോർഡ് ചെയ്യാൻ കഴിയില്ലെന്ന് എന്നോട് പറഞ്ഞു. ഇപ്പോൾ, ഇത് അഭിപ്രായ സ്വാതന്ത്ര്യത്തെ 100 ശതമാനം തടയുന്നു. ഏതാനും പാക്കിസ്ഥാനി, കശ്മീരി മുസ്ലീം വിദ്യാർത്ഥികൾ ഇതിനെതിരെ പ്രതിഷേധിച്ചതിനാലാണ് ഇത് സംഭവിച്ചത്. ഇവ വംശഹത്യ നിഷേധങ്ങളാണ്, അവർ ഫാസിസ്റ്റുകളാണ്. ജനാധിപത്യപരമായി തിരഞ്ഞെടുക്കപ്പെട്ട ഇന്ത്യാ ഗവൺമെന്റിനെ ഞാൻ പിന്തുണയ്ക്കുന്നതിനാലാകാം ഇത്,” അദ്ദേഹം ഒരു വീഡിയോ സന്ദേശത്തിൽ പറഞ്ഞു.
സുഭാഷ് ചന്ദ്രബോസ് പഠിച്ച അതേ സർവ്വകലാശാലയാണ് ഇതെന്നും എന്നാൽ അടുത്തിടെ അദ്ദേഹത്തിന്റെ 150-ാം ജന്മവാർഷികത്തിൽ ബോസ് ഫാസിസ്റ്റാണെന്ന് പറഞ്ഞ് പരിപാടി റദ്ദാക്കിയെന്നും അദ്ദേഹം പറഞ്ഞു.
നേരത്തെ തന്നെ ഓക്സ്ഫോർഡ് യൂണിയൻ ക്ഷണിച്ചിരുന്നതിനാൽ ഓക്സ്ഫോർഡ് യൂണിവേഴ്സിറ്റിയിലേക്ക് പോകാനാണ് താൻ ഉദ്ദേശിച്ചതെന്നും അദ്ദേഹം അവകാശപ്പെട്ടു. എന്നാല്‍, വരുന്നതിന് തൊട്ടുമുമ്പ്, ഇരട്ട ബുക്കിംഗ് ഉണ്ടെന്ന് അദ്ദേഹത്തെ അറിയിക്കുകയും അദ്ദേഹത്തിന്റെ പരിപാടി ജൂലൈ 1 ലേക്ക് മാറ്റുകയും ചെയ്തു.
“ഇപ്പോൾ മറ്റൊരു വിചിത്രമായ കാര്യം സംഭവിച്ചു. ഇന്ന് ഞാൻ ഓക്സ്ഫോർഡ് യൂണിവേഴ്സിറ്റിയിൽ സംസാരിക്കേണ്ടതായിരുന്നു, കാരണം ഓക്സ്ഫോർഡ് യൂണിയൻ വളരെക്കാലം മുമ്പ് എന്നെ ക്ഷണിച്ചതാണ്. എല്ലാം ഇമെയിലുകൾ വഴി സ്ഥിരീകരിച്ചു. എന്നാൽ, ഏതാനും മണിക്കൂറുകൾക്ക് മുമ്പ് അവർ പറഞ്ഞു, “ക്ഷമിക്കണം ഞങ്ങൾക്ക് ഒരു തെറ്റ് സംഭവിച്ചു, ഇരട്ട ബുക്കിംഗ് ഉണ്ടായിരുന്നു, ഞങ്ങൾക്ക് നിങ്ങളെ ഇന്ന് ഹോസ്റ്റ് ചെയ്യാൻ കഴിയില്ല.” എന്നോട് പോലും ചോദിക്കാതെ, അവർ തീയതി ജൂലൈ 1 ലേക്ക് മാറ്റി. ഒരു വിദ്യാർത്ഥിയും അന്ന് അവിടെ ഉണ്ടാകില്ല, അത്തരം സാഹചര്യത്തില്‍ ഒരു പരിപാടി നടത്തുന്നതിൽ അർത്ഥമില്ല, ”അദ്ദേഹം പറഞ്ഞു.
ഓക്സ്ഫോർഡ് യൂണിവേഴ്‌സിറ്റിയിലെ ഹിന്ദുക്കൾ ന്യൂനപക്ഷ വിഭാഗമാണെന്ന് പരാമര്‍ശിച്ച അദ്ദേഹം, സംഭവത്തെ ‘ന്യൂനപക്ഷത്തിന്റെ അടിച്ചമർത്തൽ’ എന്ന് വിശേഷിപ്പിച്ചു.
“ഭൂട്ടോയുടെ മകനും നിരവധി ആഫ്രിക്കൻ തീവ്രവാദികളും ഉൾപ്പെടെയുള്ള ഏകാധിപതികൾക്കും ഫാസിസ്റ്റുകൾക്കും ആതിഥേയത്വം വഹിച്ചതിന്” ഓക്സ്ഫോർഡ് യൂണിവേഴ്‌സിറ്റിയെയും അദ്ദേഹം ആക്ഷേപിച്ചു.
ഓക്സ്ഫോർഡ് യൂണിയനെതിരെ കേസ് ഫയൽ ചെയ്യാൻ പോകുന്നതിനാൽ അഗ്നിഹോത്രി ജനങ്ങളുടെ പിന്തുണ തേടി.
“അതിനാൽ ദയവായി ഈ കാര്യത്തിൽ എന്നെ സഹായിക്കൂ. ഞാൻ അവർക്കെതിരെ ഒരു കേസ് ഫയൽ ചെയ്യുന്നു. എല്ലാ നാശനഷ്ടങ്ങളും ഞാൻ ക്ലെയിം ചെയ്യാൻ പോകുന്നു. ദയവായി എന്നെ പിന്തുണയ്ക്കുകയും എന്നോടൊപ്പം ചേരുകയും ചെയ്യുക, ”അദ്ദേഹം കൂട്ടിച്ചേർത്തു.
