ന്യൂഡൽഹി: ആഗോള ഭീകരസംഘടനയായ അൽ-ഖ്വയ്ദ സംരക്ഷകരല്ലെന്നും, മുസ്ലീങ്ങൾക്ക് ഭീഷണിയാണെന്നും കേന്ദ്രമന്ത്രി മുഖ്താർ അബ്ബാസ് നഖ്‌വി. “നമ്മുടെ പ്രവാചകന്റെ അന്തസ്സിനു വേണ്ടി പോരാടാൻ” ഗുജറാത്ത്, ഉത്തർപ്രദേശ്, മുംബൈ, ഡൽഹി എന്നിവിടങ്ങളിൽ തങ്ങൾ സ്വയം പൊട്ടിത്തെറിക്കാൻ തയ്യാറാണെന്ന് ഭീഷണിപ്പെടുത്തിയ അൽ-ക്വയ്ദയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
“ഇസ്ലാമിനെ ഒരു സംരക്ഷണ കവചമായി ഉപയോഗിച്ച് മനുഷ്യരാശിയെ കൊല്ലാൻ ഈ ആളുകൾ ആഗ്രഹിക്കുന്നു. നാനാത്വത്തിൽ ഏകത്വമെന്ന ഇന്ത്യയുടെ കരുത്ത് ദുർബ്ബലപ്പെടുത്താനാവില്ലെന്ന് പാക്കിസ്ഥാന്റെ കുപ്രചാരണത്തിൽ കുടുങ്ങിയവർ മനസ്സിലാക്കണം. മനുഷ്യാവകാശങ്ങളെക്കുറിച്ച് സംസാരിക്കുന്ന ആളുകൾ കുറ്റകൃത്യങ്ങൾക്കും അടിച്ചമർത്തലുകൾക്കും നേരെ കണ്ണടച്ചിരിക്കുന്നു. മനുഷ്യാവകാശങ്ങൾ ലംഘിക്കപ്പെടുന്നതോ, ന്യൂനപക്ഷങ്ങൾ പരസ്യമായി കശാപ്പ് ചെയ്യപ്പെടുന്നതോ അവര്‍ കാണുന്നില്ല,” അദ്ദേഹം പറഞ്ഞു.
സങ്കുചിത ചിന്താഗതിയുള്ള വർഗീയ ഗൂഢാലോചനയിലൂടെ ഇന്ത്യയുടെ കരുത്ത് തകർക്കാനാകില്ലെന്നും, എല്ലാ മതസ്ഥരും സമത്വത്തിന്റെയും സ്വാതന്ത്ര്യത്തിന്റെയും ഉൾച്ചേരലിന്റെയും പരിതസ്ഥിതിയിൽ അഭിവൃദ്ധി പ്രാപിക്കുന്ന “വസുധൈവ കുടുംബകം” എന്ന പ്രതിജ്ഞാബദ്ധതയോടെ ജീവിക്കുന്നു എന്നും കേന്ദ്ര ന്യൂനപക്ഷകാര്യ മന്ത്രി പറഞ്ഞു. മുസ്ലീങ്ങൾ ഉൾപ്പെടെയുള്ള ന്യൂനപക്ഷങ്ങളുടെ തുല്യാവകാശങ്ങളും അന്തസ്സും സമൃദ്ധിയും രാജ്യത്തിന്റെ സഹിഷ്ണുത, ഐക്യം, ഉൾക്കൊള്ളൽ എന്നിവയ്ക്കുള്ള പ്രതിബദ്ധതയുടെ ഭാഗമാണെന്നും നഖ്‌വി മാധ്യമ പ്രവർത്തകരോട് പറഞ്ഞു.
കഴിഞ്ഞ കുറച്ച് ദിവസങ്ങളായി ഇന്ത്യ ഒരു നയതന്ത്ര ദുരന്തത്തെ അഭിമുഖീകരിക്കുന്ന പശ്ചാത്തലത്തിലാണ് അദ്ദേഹത്തിന്റെ പ്രതികരണം. ഇപ്പോൾ പുറത്താക്കപ്പെട്ട ബി.ജെ.പി വക്താവ് നൂപുർ ശർമയുടെ മുഹമ്മദ് നബിക്കെതിരായ വിവാദ പരാമർശത്തിനെതിരെ അറബ് രാജ്യങ്ങൾ ഉൾപ്പെടെ 15 ഓളം രാജ്യങ്ങൾ ശക്തമായി പ്രതികരിച്ചു. “കഴിഞ്ഞ എട്ട് വർഷത്തിനിടയിൽ, ന്യൂനപക്ഷങ്ങൾ ഉൾപ്പെടെ സമൂഹത്തിലെ എല്ലാ വിഭാഗങ്ങളെയും നരേന്ദ്ര മോദി സർക്കാർ സമാധാനത്തിലും സമൃദ്ധിയിലും തുല്യ പങ്കാളികളാക്കി,” നഖ്‌വി പറഞ്ഞു.
“രാജ്യത്തെ വിശ്വാസത്തോടെയുള്ള വികസനത്തിന്റെ ഈ നല്ല അന്തരീക്ഷം ദഹിക്കാതെ, ന്യൂനപക്ഷങ്ങളുടെ വിഷയത്തിൽ ചില ആളുകൾ ലോകത്തിന് മുന്നിൽ വ്യാജ പ്രചരണം നടത്തുകയാണ്. അത് കെട്ടിച്ചമച്ചതും അടിസ്ഥാന യാഥാർത്ഥ്യത്തിന് വിപരീതവുമാണ്,” അദ്ദേഹം കൂട്ടിച്ചേർത്തു. “നുണകളുടെ കുറ്റിക്കാടുകൾക്ക്” പിന്നിൽ “സത്യത്തിന്റെ പർവ്വതം” മറയ്ക്കാനാണ് ഇക്കൂട്ടർ ശ്രമിക്കുന്നതെന്ന് കേന്ദ്രമന്ത്രി പറഞ്ഞു. “വസുധൈവ കുടുംബകം” (ലോകം ഒരു കുടുംബമാണ്), “സർവേ ഭവന്തു സുഖിനഃ” (എല്ലാവരും സന്തോഷവാനായിരിക്കണം) എന്നിവയിൽ ഇന്ത്യ വിശ്വസിക്കുന്നു, അദ്ദേഹം പറഞ്ഞു.
ലോകത്തിലെ 10 മുസ്ലീങ്ങളിൽ ഒരാൾ ഇന്ത്യയിലാണ് താമസിക്കുന്നതെന്നും, രാജ്യത്തെ മറ്റേതൊരു പൗരനെയും പോലെ സാമൂഹിക-സാമ്പത്തിക, വിദ്യാഭ്യാസ, മത, ഭരണഘടനാപരമായ അവകാശങ്ങൾ ആസ്വദിക്കുന്നുണ്ടെന്നും ബിജെപി നേതാവ് പറഞ്ഞു. “നമ്മുടെ അയൽരാജ്യത്ത് ന്യൂനപക്ഷങ്ങൾക്കെതിരായ അടിച്ചമർത്തലിലും ക്രൂരതയിലും തിരഞ്ഞെടുത്ത നിശബ്ദത കാപട്യമായി ഞെട്ടിക്കുന്ന ഒന്നാണ്,” ഇസ്ലാമിക രാജ്യങ്ങളിൽ നിന്നുള്ള പ്രസ്താവനകളെ പരാമർശിച്ച് അദ്ദേഹം പറഞ്ഞു.
