അമൃത്സർ: പഞ്ചാബിലെ ഫരീദ്കോട്ട് ജില്ലയിലെ സെഷൻസ് ജഡ്ജിയുടെ വസതിയുടെ ചുവരുകളിൽ ഖാലിസ്ഥാൻ അനുകൂല മുദ്രാവാക്യങ്ങൾ എഴുതിയതായി കണ്ടെത്തി. ഇതിന്റെ ഉത്തരവാദിത്വം ഖാലിസ്ഥാനി ഭീകരസംഘടനയായ സിഖ് ഫോർ ജസ്റ്റിസിന്റെ (എസ്എഫ്ജെ) തലവൻ ഗുർപത്വന്ത് സിംഗ് പന്നു ഏറ്റെടുത്തതായി ജില്ലാ എസ്എസ്പി അവ്നീത് കൗർ സിദ്ദു ശനിയാഴ്ച പറഞ്ഞു. വീടിന്റെ മതിലുകളില്‍ മുദ്രാവാക്യങ്ങൾ എഴുതിയിരിക്കുന്ന വീഡിയോ പന്നു പുറത്തുവിട്ടിട്ടുണ്ട്.
ഇത്തരമൊരു സാഹചര്യത്തിൽ, പഞ്ചാബിലെ ഒരു ജഡ്ജിയുടെ സുരക്ഷയിൽ ഇത്തരത്തിൽ വിട്ടുവീഴ്ച ചെയ്യപ്പെടുമ്പോൾ, പൊതുസമൂഹം എന്താണ് പ്രതീക്ഷിക്കേണ്ടത് എന്നതാണ് ഒരു വലിയ ചോദ്യം.
എന്നാൽ സിസിടിവി ദൃശ്യങ്ങളുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചിട്ടുണ്ട്. കേസ് പുറത്തുവന്നതിന് പിന്നാലെ ചുവരുകളിൽ എഴുതിയ മുദ്രാവാക്യങ്ങൾക്ക് കറുപ്പ് ചായം പൂശിയിരിക്കുകയാണ്. നേരത്തെ ഫരീദ്കോട്ടിലെ ബാജിഗർ ബസ്തിയിലെ പാർക്കിൽ ഖാലിസ്ഥാൻ അനുകൂല മുദ്രാവാക്യങ്ങളും എഴുതിയിരുന്നു.
2020 ജൂലൈ 1 ന് കേന്ദ്ര സർക്കാർ, ഭേദഗതി ചെയ്ത യുഎപിഎ നിയമപ്രകാരം ഗുർപത്വന്ത് സിംഗ് പന്നുവിനെ തീവ്രവാദിയായി പ്രഖ്യാപിച്ചിരുന്നു. 2020 ജൂലൈയിൽ മാത്രമാണ് പഞ്ചാബ് പോലീസ് അദ്ദേഹത്തിനെതിരെ അമൃത്സർ, കപൂർത്തല, ഗുരുഗ്രാം എന്നിവിടങ്ങളിൽ രാജ്യദ്രോഹത്തിന് കേസ് രജിസ്റ്റർ ചെയ്തത്.
ഏപ്രിൽ 29 ന് ഖലിസ്ഥാൻ ദിനം ആഘോഷിക്കുമെന്ന് ഭീകരൻ ഗുർപത്വന്ത് സിംഗ് പന്നു പ്രഖ്യാപിച്ചിരുന്നു. തന്റെ യൂട്യൂബ് ചാനലിൽ ഹരിയാന പഞ്ചാബിന്റെ ഭാഗമാകുമെന്നും പഞ്ചാബിനെ ഹിന്ദുസ്ഥാനിൽ നിന്ന് മോചിപ്പിക്കുമെന്നും അദ്ദേഹം വീഡിയോയിൽ പറഞ്ഞിരുന്നു. ഏപ്രിൽ 29 ന് ഗുരുഗ്രാം മുതൽ അംബാല വരെയുള്ള എല്ലാ എസ്പി, ഡിസി ഓഫീസുകളിലും ഉയർത്തും, ഹരിയാന ഖാലിസ്ഥാനാകുമെന്നും അദ്ദേഹം പറഞ്ഞിരുന്നു.
