വാഷിംഗ്ടണ്‍: കുതിച്ചുയരുന്ന പെട്രോൾ വിലയും പണപ്പെരുപ്പവും നേരിടാൻ അമേരിക്ക പാടുപെടുന്നതിനാൽ ചൈനയ്‌ക്കെതിരായ ചില താരിഫുകൾ നീക്കം ചെയ്യുന്നതും, ഫെഡറൽ ഗ്യാസ് ടാക്സ് താൽക്കാലികമായി നിർത്തുന്നതും പ്രസിഡന്റ് ജോ ബൈഡന്റെ ഭരണകൂടം അവലോകനം ചെയ്യുകയാണെന്ന് രണ്ട് ഉന്നത ഉദ്യോഗസ്ഥർ പറഞ്ഞു.
മുൻ പ്രസിഡന്റ് ഡൊണാൾഡ് ട്രംപിന്റെ ഭരണത്തിൽ നിന്ന് പാരമ്പര്യമായി ലഭിച്ച ചൈനയ്‌ക്കെതിരായ ചില താരിഫുകൾ “തന്ത്രപരമായ ലക്ഷ്യത്തിന്” ഉതകുന്നതല്ലെന്നും പണപ്പെരുപ്പം കുറയ്ക്കുന്നതിനുള്ള ഒരു മാർഗമായി അവ നീക്കം ചെയ്യുന്നതിനെ ബൈഡൻ പരിഗണിക്കുന്നുണ്ടെന്നും യുഎസ് ട്രഷറി സെക്രട്ടറി ജാനറ്റ് യെല്ലൻ പറഞ്ഞു.
വില കുറയ്ക്കുന്നതിനായി ഫെഡറൽ ഗ്യാസ് ടാക്‌സിന്റെ താൽക്കാലിക വിരാമവും പ്രസിഡന്റ് വിലയിരുത്തുന്നുണ്ടെന്ന് എനർജി സെക്രട്ടറി ജെന്നിഫർ ഗ്രാൻഹോം പറഞ്ഞു.
റെക്കോർഡ് ഉയർന്ന പെട്രോൾ വിലയും പണപ്പെരുപ്പവും നേരിടാൻ ബൈഡൻ ഭരണകൂടം പാടുപെടുന്നതിനിടയിലാണ് ഈ നിര്‍ദ്ദേശങ്ങള്‍. 40 വർഷത്തിനിടയിലെ ഏറ്റവും ഉയർന്ന നിരക്കിലാണ് ഇപ്പോള്‍ ഗ്യാസ് വില.
സെൻട്രൽ ബാങ്കിന്റെ 2% ലക്ഷ്യത്തിലേക്ക് പണപ്പെരുപ്പം കുറയാൻ രണ്ട് വർഷമെടുക്കുമെന്ന് ക്ലീവ്‌ലാൻഡ് ഫെഡറൽ റിസർവ് ബാങ്ക് പ്രസിഡന്റ് ലോറെറ്റ മെസ്റ്റർ പറഞ്ഞു.
എബിസി ന്യൂസിനോട് സംസാരിച്ച യെല്ലൻ, ഭരണകൂടം അതിന്റെ ചൈന താരിഫ് നയം അവലോകനം ചെയ്യുകയാണെന്ന് പറഞ്ഞു. എന്നാൽ, പ്രത്യേകതകൾ ഉദ്ധരിക്കുകയോ എപ്പോൾ തീരുമാനമുണ്ടാകുമെന്ന് പറയാനോ യെല്ലന്‍ തയ്യാറായില്ല.
“ചൈന അന്യായമായ വ്യാപാര സമ്പ്രദായങ്ങളിൽ ഏർപ്പെടുന്നുണ്ടെന്ന് ഞങ്ങൾ എല്ലാവരും തിരിച്ചറിയുന്നു. അത് പരിഹരിക്കുകയാണ് മുഖ്യ ലക്ഷ്യം. എന്നാൽ, നമ്മള്‍ക്ക് പാരമ്പര്യമായി ലഭിച്ച താരിഫുകളില്‍ ചിലത് തന്ത്രപരമായ ഉദ്ദേശ്യങ്ങൾ നിറവേറ്റുന്നില്ല. മാത്രമല്ല, ഉപഭോക്താക്കൾക്ക് ചെലവ് വർദ്ധിപ്പിക്കുന്നു,” യെല്ലന്‍ പറഞ്ഞു.
ലോകത്തിലെ ഏറ്റവും വലിയ രണ്ട് സമ്പദ്‌വ്യവസ്ഥകൾ തമ്മിലുള്ള കടുത്ത വ്യാപാര യുദ്ധത്തിനിടയിൽ തന്റെ മുൻഗാമി 2018 ലും 2019 ലും നൂറുകണക്കിന് ബില്യൺ ഡോളർ വിലമതിക്കുന്ന ചൈനീസ് ഉൽപ്പന്നങ്ങൾക്ക് ചുമത്തിയ ചില താരിഫുകൾ നീക്കം ചെയ്യുന്ന കാര്യം പരിഗണിക്കുകയാണെന്ന് ബൈഡന്‍ പറഞ്ഞു.
