ഭോപ്പാല്‍: മധ്യപ്രദേശിലെ രത്‌ലം ജില്ലയിലെ അംബ ഗ്രാമത്തിലെ 18 പേരടങ്ങുന്ന കുടുംബം ഭിക്ഷാടനത്തിന് മുസ്ലിം വസ്ത്രങ്ങള്‍ ധരിച്ചത് ഇവര്‍ മതപരിവര്‍ത്തനം നടത്തിയതാണെന്ന് കിം‌വദന്തി പരന്നു. യഥാര്‍ത്ഥത്തില്‍ ഈ കുടുംബങ്ങള്‍ ഹിന്ദുക്കളായിരുന്നു. ഭിക്ഷാടനം നടത്തിയാല്‍ കൂടുതല്‍ പണം കിട്ടുമെന്ന ചിന്തയാണ് ഇവരെ മുസ്ലിം വേഷങ്ങള്‍ ധരിക്കാന്‍ പ്രേരിപ്പിച്ചതെന്ന് പറയുന്നു. ഇവരുടെ വസ്ത്രധാരണ രീതി കാരണം മുസ്ലീം കുടുംബമാണെന്ന് തെറ്റിദ്ധരിക്കപ്പെട്ടതായും കുടുംബത്തിലെ ഒരു സ്ത്രീ വെളിപ്പെടുത്തി. മുസ്ലീം ആരാധനാലയങ്ങൾക്കും പള്ളികൾക്കും പുറത്ത് ഭിക്ഷ യാചിക്കുന്നതിനായി കുടുംബാംഗങ്ങൾ മുസ്ലീങ്ങളുമായി സാമ്യമുള്ള വസ്ത്രങ്ങൾ ധരിച്ചതാണ് പ്രശ്നങ്ങള്‍ക്ക് തുടക്കം.
“ഞങ്ങൾ ആദ്യം മുതലേ ഹിന്ദു ദൈവങ്ങളെയും ദേവതകളെയും ആരാധിക്കുന്നു. ഞങ്ങൾക്ക് പള്ളിയില്‍ പോകാന്‍ കഴിയില്ല…. ഞങ്ങൾ ഹിന്ദുക്കളാണ്. പക്ഷെ, ഞങ്ങൾ മുസ്ലീം വസ്ത്രം ധരിക്കുന്നത് ഞങ്ങളുടെ വയറു നിറയ്ക്കാൻ പണം സമ്പാദിക്കാനാണ്,” ആശ പറഞ്ഞു. ആയിഷ എന്ന ഓമനപ്പേര് സ്വീകരിച്ച് മുസ്ലീമായി വേഷംമാറി ഇത്രയും കാലം ഒളിവിൽ കഴിഞ്ഞിരുന്ന കുടുംബം ഇപ്പോൾ ഇസ്‌ലാമിക ഭക്ഷണ ശീലങ്ങളിലേക്ക് മാറിയെന്നും അവർ അറിയിച്ചു.
മതപരിവർത്തന വാർത്ത പുറത്തുവന്നതോടെ ഇക്കാര്യം സ്ഥിരീകരിക്കാൻ മധ്യപ്രദേശ് ജംഇയ്യത്തുൽ ഉലമ-ഇ-ഹിന്ദ് പ്രസിഡന്റ് ഹാജി മുഹമ്മദ് ഹാറൂൺ രത്‌ലം ജംഇയ്യത്ത് പ്രതിനിധികളോട് ആവശ്യപ്പെട്ടു. രത്‌ലം ജമിയത്ത് സംഭവം അവലോകനം ചെയ്യുകയും ഇസ്‌ലാം ഉപേക്ഷിച്ച് ഹിന്ദുമതത്തിലേക്ക് പരിവർത്തനം ചെയ്തതായി റിപ്പോർട്ട് ചെയ്യപ്പെട്ട 18 പേർ യഥാർത്ഥത്തിൽ ഒരിക്കലും മുസ്‌ലിംകളായിട്ടില്ലെന്നും എന്നാൽ ഇതിനകം ഹിന്ദുക്കളാണെന്നും കണ്ടെത്തി.
രത്‌ലാമിൽ ഹിന്ദു കുടുംബാംഗങ്ങളെ പരിവർത്തനം ചെയ്തുവെന്ന വാർത്ത ഒരു വിഭാഗം മാധ്യമങ്ങളും ഹൈന്ദവ സംഘടനകളും പെരുപ്പിച്ചുകാട്ടിയെന്നും അതിനെ കുപ്രചരണമായാണ് വിശേഷിപ്പിച്ചതെന്നും ഹാറൂൺ പറഞ്ഞു. ജാമിയത്ത് അവരുമായി സംസാരിച്ച് അവിടത്തെ സ്ഥിതിഗതികൾ അവലോകനം ചെയ്തപ്പോൾ, അവർ ഇതിനകം ഹിന്ദു മതത്തിന്റെ അനുയായികളാണെന്നും എന്നാൽ മുസ്ലീം വേഷം ധരിച്ച് ദർഗകൾക്കും പള്ളികൾക്കും പുറത്ത് ഭിക്ഷാടനം നടത്തുകയാണെന്നും അദ്ദേഹം പറഞ്ഞു. മുസ്‌ലിംകൾ പലപ്പോഴും സകാത്ത്, സദഖ, ഫിത്‌റ (വിവിധ തരത്തിലുള്ള നിർബന്ധ ദാനധർമ്മങ്ങൾ) എന്നിവ നൽകാറുണ്ടെന്ന് ഹാറൂൺ പറഞ്ഞു. കുടുംബം പള്ളികളിലേക്കും ദർഗകളിലേക്കും തിരിയുകയും മുസ്ലീം വസ്ത്രധാരണം അവലംബിക്കുകയും ചെയ്തിരിക്കാം, അദ്ദേഹം പറഞ്ഞു.
