ഉദയ്പൂർ: ഉദയ്പൂർ കൊലപാതകവുമായി ബന്ധപ്പെട്ട് ഏഴാമത്തെ കുറ്റവാളിയെ ദേശീയ അന്വേഷണ ഏജൻസി (എൻഐഎ) അറസ്റ്റ് ചെയ്തതായി ശനിയാഴ്ച NIA ഉദ്യോഗസ്ഥർ അറിയിച്ചു.
അസാസ് മുഹമ്മദിന്റെ മകൻ ഫർഹാദ് മുഹമ്മദ് ഷെയ്ഖ് (ബബ്ല – 31) എന്നയാളെയാണ് എൻഐഎ അറസ്റ്റ് ചെയ്തത്. ഉദയ്പൂർ രാജസ്ഥാനിലെ കനയ്യ ലാൽ തെലിയെ ഉദയ്പൂരിലെ (രാജസ്ഥാൻ) മാൽദാസ് സ്ട്രീറ്റിലെ കടയിൽ വച്ച് കൊലപ്പെടുത്തിയതിനാണ് കേസ്. പ്രധാന കൊലയാളികളിലൊരാളായ റിയാസ് അട്ടാരിയുടെ അടുത്ത ക്രിമിനൽ കൂട്ടാളിയും കനയ്യ ലാലിനെ കൊലപ്പെടുത്താനുള്ള ഗൂഢാലോചനയുടെ സജീവ ഭാഗവുമായിരുന്നു ഫർഹാദ് മുഹമ്മദ്.
ഈ കേസിൽ യഥാക്രമം ജൂൺ 29, ജൂലൈ 1, 4 തീയതികളിൽ ആറ് കുറ്റവാളികളെ നേരത്തെ അറസ്റ്റ് ചെയ്തിരുന്നു.
ജൂൺ 28നായിരുന്നു കൊലപാതകം നടത്തിയത്. അതിനു കുറച്ച് ദിവസങ്ങൾക്ക് മുമ്പ് സസ്‌പെൻഡ് ചെയ്യപ്പെട്ട ബിജെപി വക്താവ് നൂപുർ ശർമ്മയെ പിന്തുണച്ച് കനയ്യ ലാല്‍ സോഷ്യൽ മീഡിയ പോസ്റ്റ് ഷെയർ ചെയ്തിരുന്നു. കേസിൽ കൂടുതൽ അന്വേഷണങ്ങൾ നടന്നുവരികയാണ്.
