തൃശൂർ: തൃശൂർ തേലപ്പിള്ളി സ്വദേശി പൊറിഞ്ചു (67), ഭാര്യ ബേബി (60) എന്നിവർ 20 വർഷം മുമ്പാണ് കരുവന്നൂർ സർവീസ് സഹകരണ ബാങ്കിൽ 40 ലക്ഷം രൂപ നിക്ഷേപിച്ചത്.
“വിരമിക്കലിന് ശേഷമുള്ള ഒരു ഫണ്ടായി നിക്ഷേപിച്ച ഞങ്ങളുടെ ആജീവനാന്ത സമ്പാദ്യമായിരുന്നു അത്. പലവിധ ആവശ്യങ്ങൾക്കായി പിന്നീട് ഉപയോഗിക്കാമെന്ന പ്രതീക്ഷയിലായിരുന്നു ബാങ്കില്‍ പണം നിക്ഷേപിച്ചത്. എന്നാൽ, ഹൃദയ ശസ്ത്രക്രിയയ്ക്ക് വിധേയനാകേണ്ടി വന്നപ്പോൾ അതിൽ നിന്ന് ഒരു പൈസ പോലും ബാങ്ക് തിരികെ നൽകിയില്ല. നാല് ലക്ഷം രൂപ ആശുപത്രി ബില്ലടയ്ക്കാൻ സുഹൃത്തുക്കളിൽ നിന്നും കുടുംബാംഗങ്ങളിൽ നിന്നും പണം കടം വാങ്ങേണ്ടി വന്നു. ബാങ്കില്‍ നിന്ന് പണം എപ്പോൾ തിരികെ കിട്ടുമെന്ന് അറിയില്ല,” പൊറിഞ്ചു പറയുന്നു.
വർഷങ്ങളായി ബാങ്കിന്റെ ചുക്കാൻ പിടിച്ച സിപിഎം നേതാക്കൾ നടത്തിയ കോടിക്കണക്കിന് രൂപയുടെ വായ്പാ തട്ടിപ്പിൽ കുടുങ്ങിയ തൃശൂർ ആസ്ഥാനമായ ബാങ്കിന്റെ ഇരുളടഞ്ഞ സാധ്യതകളിലേക്ക് ഉറ്റുനോക്കുന്ന ധാരാളം നിക്ഷേപകരിൽ ഇവരുമുണ്ട്. പണം തിരികെ ലഭിക്കുന്നതിനായി നിരവധി തവണ വയോധിക ദമ്പതികൾ ബാങ്കിന്റെ കരുവന്നൂരിലെ ആസ്ഥാനത്തും മാപ്രാണം ശാഖയിലും പോയിരുന്നു.
“എന്റെ വീടിന്റെ നിർമാണ പ്രവർത്തനങ്ങൾ പാതിവഴിയിൽ നിലച്ചു. എന്റെ അളിയന് അപകടത്തെ തുടർന്ന് നട്ടെല്ലിന് ശസ്ത്രക്രിയ നടത്തിയപ്പോൾ പണത്തിനായി ബാങ്കുമായി ബന്ധപ്പെട്ടെങ്കിലും ലഭിച്ചില്ല. എന്റെ മകന്റെ വിദ്യാഭ്യാസ ആവശ്യങ്ങൾക്ക്, എനിക്ക് പണം ആവശ്യമായിരുന്നു. പക്ഷേ എന്റെ പണം കിട്ടിയില്ല. ഞങ്ങൾ സർക്കാരിൽ പ്രതീക്ഷ അർപ്പിക്കുകയും ഫണ്ട് തിരികെ നൽകാനുള്ള സംവിധാനത്തിനായി ക്ഷമയോടെ കാത്തിരിക്കുകയും ചെയ്യുന്നു,” 25 ലക്ഷം രൂപ ബാങ്കിൽ കുടുങ്ങിക്കിടക്കുന്ന കരാറുകാരൻ ബെന്നി പറഞ്ഞു.
പരാതി നൽകുമോ എന്ന ചോദ്യത്തിന്, സിപിഎം പ്രാദേശിക നേതാക്കൾ തന്റെ സുഹൃത്തുക്കളോ വ്യക്തിപരമായി അറിയാവുന്നവരോ ആയതിനാൽ നിയമപരമായി നീങ്ങാൻ ആഗ്രഹിക്കുന്നില്ലെന്ന് ബെന്നി പറഞ്ഞു. മറ്റൊരു നിക്ഷേപകയായ നിഷ ബാലകൃഷ്ണൻ (55) തന്റെ സങ്കടങ്ങളും പങ്കുവച്ചു. വർഷങ്ങൾക്ക് മുമ്പ് അവര്‍ തന്റെ പണം ബാങ്കിൽ നിക്ഷേപിച്ചിരുന്നു. മകന്റെ സ്വകാര്യ ആവശ്യങ്ങൾക്കായി പണം പിൻവലിക്കാൻ ശ്രമിച്ചെങ്കിലും ലഭിച്ചില്ല. “ബാങ്ക് അധികാരികൾക്കെതിരെ നീങ്ങാൻ ഞാൻ നിക്ഷേപകരുടെ ഒരു ഫോറം രൂപീകരിക്കാൻ പോലും ശ്രമിച്ചു, പക്ഷേ ആരും മുന്നോട്ട് വന്നില്ല,” അവർ പറഞ്ഞു.
സി.പി.എമ്മിന്റെ നേതൃത്വത്തിലുള്ള ബാങ്കിനെതിരെ തുറന്ന് പറയാൻ നിക്ഷേപകരിൽ ഭൂരിഭാഗവും ഭയപ്പെടുന്നതായി വിവരാവകാശ ചോദ്യത്തിലൂടെ ബാങ്കിന്റെ നിഗൂഢമായ പ്രവർത്തനങ്ങളെ വെളിച്ചത്തു കൊണ്ടുവന്ന സുരേഷ് എം.വി ചൂണ്ടിക്കാട്ടി. ബാങ്കിനും സി.പി.എം നേതൃത്വത്തിനുമെതിരെ ശബ്ദമുയർത്തിയതിനാൽ അജ്ഞാതരിൽ നിന്ന് ജീവന് ഭീഷണിയുണ്ടെന്നും അദ്ദേഹം പറഞ്ഞു. നിലവിൽ ബിജെപിയിൽ പ്രവർത്തിക്കുന്ന സുരേഷ് കരുവന്നൂർ ബാങ്ക് നിക്ഷേപകരുടെ ജനകീയ പ്രതിരോധ സമിതി രൂപീകരിച്ചിരുന്നു. കേസിൽ സിബിഐ അന്വേഷണം ആവശ്യപ്പെട്ട് ബിജെപി ഹൈക്കോടതിയിൽ ഹർജി നൽകിയെങ്കിലും സംസ്ഥാന സർക്കാർ എതിർത്തു.
ബിന്ദു കുടുംബത്തോട് മാപ്പ് പറയണമെന്ന് വി.ഡി. സതീശൻ
തൃശൂർ: അഴിമതിക്കേസിൽ പെട്ട കരുവന്നൂർ സർവീസ് സഹകരണ ബാങ്കിൽ നിന്ന് നിക്ഷേപിച്ച തുക ലഭിക്കാതെ മരിച്ച ഫിലോമിനയുടെ കുടുംബാംഗങ്ങളോട് ഉന്നത വിദ്യാഭ്യാസ മന്ത്രി ആർ ബിന്ദു മാപ്പ് പറയണമെന്ന് പ്രതിപക്ഷ നേതാവ് വി ഡി സതീശൻ ആവശ്യപ്പെട്ടു. മരിച്ച സ്ത്രീയുടെ കുടുംബത്തിന്റെ പ്രതിഷേധം രാഷ്ട്രീയമാണെന്ന മന്ത്രിയുടെ പ്രസ്താവന അപലപനീയമാണെന്നും സതീശൻ പറഞ്ഞു. “കുടുംബത്തെ അപമാനിക്കുന്ന പ്രസ്താവനകൾ അവര്‍ ഒഴിവാക്കണമായിരുന്നു. മരിച്ച സ്ത്രീ സിസ്റ്റത്തിന്റെ പരാജയത്തിന്റെ ഇരയാണ്, ”അദ്ദേഹം പറഞ്ഞു.
