ന്യൂഡൽഹി: ഇന്ത്യയുടെ ദേശീയ സുരക്ഷ, വിദേശ ബന്ധം, പൊതു ക്രമം എന്നിവയുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിച്ചതിന് പാക്കിസ്താനില്‍ നിന്ന് പ്രവർത്തിക്കുന്ന ഒരു ചാനല്‍ ഉള്‍പ്പടെ എട്ട് യൂട്യൂബ് ചാനലുകൾ ബ്ലോക്ക് ചെയ്യാൻ സർക്കാർ ഉത്തരവിട്ടു.
നിയന്ത്രിത യൂട്യൂബ് ചാനലുകൾക്ക് 114 കോടിയിലധികം കാഴ്‌ചക്കാരും 85.73 ലക്ഷം സബ്‌സ്‌ക്രൈബർമാരും ഉണ്ടെന്നും ഉള്ളടക്കം ധനസമ്പാദനം നടത്തുകയാണെന്നും ഔദ്യോഗിക പ്രസ്താവനയിൽ പറയുന്നു.
ഇൻഫർമേഷൻ ടെക്‌നോളജി നിയമങ്ങൾ-2021 അനുസരിച്ച് നിയന്ത്രിച്ച ചാനലുകളിൽ ഏഴ് ഇന്ത്യൻ വാർത്താ സ്റ്റേഷനുകളും ഉൾപ്പെടുന്നു. നിരോധിത യൂട്യൂബ് ചാനലുകൾ ഇന്ത്യൻ സർക്കാർ മതയുദ്ധം പ്രഖ്യാപിച്ചെന്നും മതപരമായ കെട്ടിടങ്ങൾ തകർക്കുന്നുവെന്നും കിംവദന്തികൾ പ്രചരിപ്പിച്ചതായി ഒരു ഔദ്യോഗിക പ്രസ്താവന അവകാശപ്പെട്ടു. മതപരമായ ഉത്സവങ്ങൾ ആഘോഷിക്കാൻ കഴിയില്ലെന്നും അവകാശപ്പെട്ടു.
റിപ്പോർട്ട് അനുസരിച്ച്, “ഇത്തരം ഉള്ളടക്കം പരസ്പര കലഹത്തിനും ദേശീയ ക്രമത്തെ അസ്ഥിരപ്പെടുത്തുന്നതിനും സാധ്യതയുള്ളതായി കണ്ടെത്തി.” ഇന്ത്യൻ സായുധ സേന, ജമ്മു കശ്മീർ തുടങ്ങിയ വിവിധ വിഷയങ്ങളിൽ വ്യാജ വാർത്തകൾ പോസ്റ്റ് ചെയ്യുന്നതിനും യൂട്യൂബ് ചാനലുകൾ ഉപയോഗിച്ചിരുന്നു. “ദേശീയ സുരക്ഷയുടെയും വിദേശരാജ്യങ്ങളുമായുള്ള ഇന്ത്യയുടെ നല്ല ബന്ധത്തിന്റെയും വീക്ഷണത്തിൽ, ഉള്ളടക്കം തീർത്തും അസത്യവും സെൻസിറ്റീവും ആണെന്ന് ശ്രദ്ധിക്കപ്പെട്ടു,” പ്രസ്താവനയിൽ പറയുന്നു.
