ഭരണകക്ഷിയായ ഭാരതീയ ജനതാ പാർട്ടിയുടെ (ബിജെപി) നിരവധി പ്രമുഖ നേതാക്കളുടെ ഇസ്ലാമോഫോബിക് അഭിപ്രായങ്ങളെ അപലപിക്കുകയും അവരെ കാനഡയിൽ കാലുകുത്തുന്നത് നിരോധിക്കണമെന്നും നാഷണൽ കൗൺസിൽ ഓഫ് കനേഡിയൻ മുസ്‌ലിംസ് (എൻസിസിഎം) വെള്ളിയാഴ്ച പ്രസ്താവനയിൽ ആവശ്യപ്പെട്ടു.
കാനഡയിലെ മുസ്ലീങ്ങളെ പ്രതിനിധീകരിക്കുന്ന സംഘടന ഈ വർഷം കശ്മീരിൽ നടക്കാനിരിക്കുന്ന 2022 ജി-20 സമ്മേളനത്തിൽ പങ്കെടുക്കുന്നതിൽ നിന്ന് രാജ്യം വിട്ടുനിൽക്കണമെന്ന് ആവശ്യപ്പെട്ടു.
“ഇന്ത്യ കടുത്ത മനുഷ്യാവകാശ ദ്രോഹങ്ങൾ ചെയ്യുന്ന അതേ അടിസ്ഥാനത്തിലാണ് ഈ വർഷത്തെ ജി-20 ആതിഥേയത്വം വഹിക്കുന്നത്, വംശഹത്യ സാഹചര്യങ്ങൾ ഇപ്പോഴും തുടരുന്നു,” NCCM പ്രസ്താവനയിൽ പറഞ്ഞു.
ഇന്ത്യയിലെ മതന്യൂനപക്ഷങ്ങൾക്കെതിരെ നടത്തിയ പ്രസ്താവനകളുടെ പേരിൽ 13 ഉന്നത ബിജെപി നേതാക്കള്‍ക്കും ഉദ്യോഗസ്ഥര്‍ക്കും കാനഡ പ്രവേശന വിലക്ക് ഏർപ്പെടുത്തണമെന്നാണ് എൻസിസിഎം ആവശ്യപ്പെട്ടിരിക്കുന്നത്.
“ഇന്ത്യയിൽ വംശീയ ഉന്മൂലനത്തിനും വർഗീയ കലാപത്തിനും ആഹ്വാനം ചെയ്യുന്ന ബിജെപി നേതാക്കൾ കാനഡയിൽ പ്രവേശിക്കുന്നത് നിരോധിക്കണമെന്ന് ഇമിഗ്രേഷൻ ആൻഡ് റഫ്യൂജി പ്രൊട്ടക്ഷൻ നിയമത്തിലെ വ്യവസ്ഥകൾ അനുസരിച്ച് ഞങ്ങൾ കനേഡിയൻ ഗവൺമെന്റിനോട് ആവശ്യപ്പെടുന്നു,” എൻസിസിഎം പറഞ്ഞു. ഇന്ത്യയിലെ പൗരാവകാശങ്ങളുടെയും മനുഷ്യാവകാശങ്ങളുടെയും തുടർച്ചയായ തകർച്ചയ്ക്ക് ബിജെപി ഉത്തരവാദിയാണെന്നും എൻസിസിഎം ആരോപിച്ചു.
മുസ്‌ലിംകൾ, സിഖുകാർ, ക്രിസ്ത്യാനികൾ, ദലിതുകൾ, ആദിവാസികൾ തുടങ്ങിയ ന്യൂനപക്ഷ വിഭാഗങ്ങളുടെ ചെലവിൽ ഇന്ത്യയെ ഒരു പ്രത്യേക ഹിന്ദു രാഷ്ട്രമായി പുനർനിർമ്മിക്കുന്നതിന് സമർപ്പിച്ചിരിക്കുന്ന അവരുടെ “ഹിന്ദുത്വ” അല്ലെങ്കിൽ ഹിന്ദു മേൽക്കോയ്മയുടെ പ്രത്യയശാസ്ത്രമാണ് ഇത് വലിയ തോതിൽ പ്രോത്സാഹിപ്പിക്കുന്നത്, കൗൺസിൽ വ്യക്തമാക്കി.
എൻഎംഎംസിയുടെ പട്ടികയിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ്, രാജ്യസഭാ എംപി സുബ്രഹ്മണ്യൻ സ്വാമി, അടുത്തിടെ സസ്‌പെൻഡ് ചെയ്യപ്പെട്ട തെലങ്കാനയിൽ നിന്നുള്ള എംഎൽഎ രാജാ സിംഗ് എന്നിവരും ഉള്‍പ്പെടുന്നു.
ബിഹാർ ബി.ജെ.പി എം.എൽ.എ ഹരിഭൂഷൺ താക്കൂർ ബചൗൾ, സുപ്രീം കോടതി അഭിഭാഷകനും ഡൽഹി ബി.ജെ.പി ഘടകം നേതാവുമായ അശ്വിനി ഉപാധ്യായ, കേന്ദ്ര യുവജനകാര്യ കായിക മന്ത്രി അനുരാഗ് താക്കൂർ, എം. പഞ്ചാക്ഷര്യ രേണുകാചാര്യ (കർണാടക മുഖ്യമന്ത്രി ബസവരാജ് ബൊമ്മൈയുടെ രാഷ്ട്രീയ സെക്രട്ടറി), കേന്ദ്ര പഞ്ചായത്തീരാജ് മന്ത്രി ഗിരിരാജ് സിംഗ് , ബിജെപി ഡൽഹി നേതാവ് കപിൽ മിശ്ര, ഹരിയാന ബിജെപി വക്താവ് സൂരജ് പാൽ അമു, യുപി ബിജെപി എംഎൽഎ രാഘവേന്ദ്ര പ്രതാപ് സിംഗ്, യുപി എംഎൽഎ രഘുരാജ് സിംഗ് എന്നിവരാണ് പട്ടികയിലെ മറ്റുള്ളവർ.
ബിജെപി നേതാക്കളുടെ ഇസ്ലാമോഫോബിക് പരാമർശങ്ങൾ:
യോഗി ആദിത്യനാഥ് , തന്റെ ഇസ്ലാമോഫോബിക് നയങ്ങൾക്കും വാക്ചാതുര്യങ്ങൾക്കും എതിരെ പ്രകടനം നടത്തുന്ന പ്രതിഷേധക്കാരുടെ വീടുകളും വ്യാപാര സ്ഥാപനങ്ങളും ബുൾഡോസർ ചെയ്യുന്നത് പ്രോത്സാഹിപ്പിക്കുന്നു. പങ്കെടുക്കുന്നവരെ ഭയപ്പെടുത്താൻ അദ്ദേഹം ബുൾഡോസറുകൾ പോലും പ്രതിഷേധത്തിന് കൊണ്ടുവന്നു.
മുസ്ലീങ്ങൾ ജനസംഖ്യയുടെ 30 ശതമാനത്തിലധികം വരുന്ന ഏതൊരു രാജ്യവും അപകടത്തിലാണെന്ന് സുബ്രഹ്മണ്യൻ സ്വാമി പറഞ്ഞു. “ഇല്ല, എല്ലാ ആളുകളും തുല്യരല്ല, മുസ്ലീങ്ങൾ തുല്യ വിഭാഗത്തിൽ പെടുന്നില്ല” എന്നും അദ്ദേഹം ഒരിക്കൽ പറഞ്ഞു.
2020ലെ റാലിയിൽ മുസ്ലീങ്ങൾ രാജ്യദ്രോഹികളാണെന്ന് അനുരാഗ് താക്കൂർ ഒരിക്കൽ സൂചിപ്പിച്ചിരുന്നു. “രാജ്യ ദ്രോഹികളെ എന്ത് ചെയ്യണം എന്ന് അദ്ദേഹം ചോദിച്ചപ്പോള്‍ “അവരെ വെടിവെച്ച് കൊല്ലൂ” എന്ന് ജനക്കൂട്ടം മറുപടി പറഞ്ഞു.
“അന്താരാഷ്ട്ര മനുഷ്യാവകാശങ്ങൾക്കായി കാനഡ നിലകൊള്ളണം” എന്ന് എൻസിസിഎം പ്രസ്താവനയില്‍ പറഞ്ഞു.
