വിര്‍ജീനിയ: തെക്കുകിഴക്കൻ യുഎസ് സംസ്ഥാനമായ വിർജീനിയയിൽ ഞായറാഴ്ച നടന്ന വെടിവയ്പ്പിൽ രണ്ട് പേർ കൊല്ലപ്പെടുകയും അഞ്ച് പേർക്ക് പരിക്കേൽക്കുകയും ചെയ്തതായി പോലീസ് അറിയിച്ചു. രാജ്യത്ത് തോക്ക് അക്രമങ്ങള്‍ പകർച്ചവ്യാധി പോലെ പടര്‍ന്നു പിടിക്കുകയാണെന്ന് പോലീസ് പറയുന്നു.
തെക്കുകിഴക്കൻ വിർജീനിയയിലെ ഒരു വാട്ടർഫ്രണ്ട് നഗരമായ നോർഫോക്കിലാണ് സംഭവം നടന്നത്. ശനിയാഴ്ച അർദ്ധരാത്രി മുതൽ ഞായറാഴ്ച പുലർച്ചെ വരെ കില്ലം അവന്യൂവില്‍ നടന്ന ഒരു പാർട്ടിയിലാണ് വെടിവെപ്പ് നടന്നതെന്ന് റിപ്പോർട്ടുകളില്‍ പറയുന്നു.
നോർഫോക്ക് പോലീസ് പറയുന്നതനുസരിച്ച്, വെടിവെപ്പിൽ നാല് സ്ത്രീകൾക്കും മൂന്ന് പുരുഷന്മാർക്കും പരിക്കേറ്റു. അവരിൽ രണ്ട് പേർ പിന്നീട് ആശുപത്രിയിൽ മരണത്തിന് കീഴടങ്ങി. സാബ്രെ മില്ലർ (25), ആഞ്ചെലിയ മക്നൈറ്റ് (19) എന്നിവരാണ് കൊല്ലപ്പെട്ടത്.
കാമ്പസിന് പുറത്ത് നടന്ന, നഗരത്തിലുടനീളം ഞെട്ടലുണ്ടാക്കിയ കൂട്ട വെടിവയ്പിലെ ഇരകളിൽ പലരും സർവകലാശാലയിലെ വിദ്യാർത്ഥികളാണെന്ന് കൂടുതൽ വിശദാംശങ്ങൾ നൽകാതെ നോർഫോക്ക് സ്റ്റേറ്റ് യൂണിവേഴ്സിറ്റി പറഞ്ഞു.
“50-ആം സ്ട്രീറ്റിനും ഹാംപ്ടൺ ബ്ലൂവിഡിനും സമീപമുള്ള ഒറ്റപ്പെട്ട ഓഫ്-കാമ്പസ് ലൊക്കേഷനിൽ നിരവധി NSU വിദ്യാർത്ഥികൾ വെടിവയ്പ്പിന് ഇരയായതായി നോർഫോക്ക് പോലീസ് ഞങ്ങളെ അറിയിച്ചു,” യൂണിവേഴ്സിറ്റി ട്വീറ്റ് ചെയ്തു.
എൻഎസ്‌യു പോലീസ് എൻഎസ്‌യു കാമ്പസ് സുരക്ഷിതമാക്കിയിട്ടുണ്ട്. സേവനം ആവശ്യമുള്ള ഏതൊരു വിദ്യാർത്ഥിക്കും കൗൺസിലിംഗ് ലഭ്യമാക്കുമെന്നും ട്വീറ്റില്‍ പറഞ്ഞു.
വെടിവയ്പ്പിനെക്കുറിച്ച് പൊതുജനങ്ങളിൽ നിന്ന് വിവരങ്ങൾ തേടി പോലീസിലെ കുറ്റാന്വേഷണ വിഭാഗം അന്വേഷണം നടത്തിവരികയാണ്.
അന്വേഷണം തുടരുന്നതിനാൽ, സംഭവത്തെക്കുറിച്ച് എന്തെങ്കിലും വിവരം ലഭിക്കുന്നവർ 1-888-LOCK-U-UP എന്ന നമ്പറിൽ നോർഫോക്ക് ക്രൈം ലൈനുമായി ബന്ധപ്പെടാനോ P3Tips മൊബൈൽ ആപ്പ് വഴി വിവരങ്ങള്‍ നല്‍കണമെന്ന് നോർഫോക്ക് പോലീസ് പ്രസ്താവനയിൽ പറഞ്ഞു.
അമേരിക്കയിൽ തോക്ക് അക്രമം വ്യാപകമാണ്. ഗൺ വയലൻസ് ആർക്കൈവ് അനുസരിച്ച് 2022 ൽ 456 കൂട്ട വെടിവയ്പ്പുകളെങ്കിലും ഉണ്ടായിട്ടുണ്ട്. അതില്‍ 30, 237 പേർ മരിക്കുകയും ചെയ്തു.
2018 ലെ സ്മോൾ ആംസ് സർവേയിൽ രാജ്യത്ത് ഏകദേശം 393 ദശലക്ഷം തോക്കുകൾ സാധാരണക്കാരുടെ കൈയിലുണ്ടെന്ന് കണ്ടെത്തിയിട്ടുണ്ട്. അതായത്, 100 പേര്‍ക്ക് 120.5 തോക്കുകൾ.
