ലഖ്‌നൗ: കനത്ത മഴയിൽ സൈനിക എൻക്ലേവിന്റെ അതിർത്തി മതിൽ ഇടിഞ്ഞുവീണ് ഒമ്പത് പേർ മരിക്കുകയും രണ്ട് പേർക്ക് പരിക്കേൽക്കുകയും ചെയ്തു. ലഖ്‌നൗവിലെ ദിൽകുഷ മേഖലയിലാണ് സംഭവം നടന്നതെന്ന് പോലീസ് പറഞ്ഞു. ഇതുവരെ ഒരാളെ കെട്ടിടാവശിഷ്ടങ്ങൾക്കിടയിൽ നിന്ന് രക്ഷപ്പെടുത്തിയതായി പോലീസ് അറിയിച്ചു.
രക്ഷാപ്രവർത്തനത്തിനായി പോലീസ് എൻഡിആർഎഫിനെ വിളിച്ചിട്ടുണ്ട്. “ചില തൊഴിലാളികൾ ദിൽകുഷ ഏരിയയിലെ ആർമി എൻക്ലേവിന് പുറത്ത് കുടിലുകളിൽ താമസിച്ചിരുന്നു. കനത്ത മഴയെത്തുടർന്ന് ആർമി എൻക്ലേവിന്റെ അതിർത്തി മതിൽ തകർന്നു,” ജോയിന്റ് പോലീസ് കമ്മീഷണർ (ലോ ആൻഡ് ഓർഡർ) പിയൂഷ് മോർദിയ പറഞ്ഞു. പുലർച്ചെ 3 മണിയോടെ ഞങ്ങൾ സ്ഥലത്തെത്തി. ഒമ്പത് മൃതദേഹങ്ങൾ അവശിഷ്ടങ്ങൾക്കിടയിൽ നിന്ന് പുറത്തെടുത്തു, ഒരാളെ ജീവനോടെ രക്ഷപ്പെടുത്തി, അദ്ദേഹം കൂട്ടിച്ചേർത്തു.
ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ദുഃഖം രേഖപ്പെടുത്തുകയും അവശിഷ്ടങ്ങൾക്കടിയിൽ കുടുങ്ങിക്കിടക്കുന്നവരെ രക്ഷിക്കാൻ ആവശ്യമായ എല്ലാ നടപടികളും സ്വീകരിക്കാൻ സർക്കാർ ഉദ്യോഗസ്ഥരോട് ആവശ്യപ്പെടുകയും ചെയ്തു. മരിച്ചവർക്ക് നാല് ലക്ഷം രൂപയും പരിക്കേറ്റവരുടെ ചികിത്സയ്ക്ക് രണ്ട് ലക്ഷം രൂപയും ധനസഹായം പ്രഖ്യാപിച്ചു.
