കൊച്ചി: ഹർത്താലിന്റെ ഭാഗമായി സംസ്ഥാനത്തുടനീളം നടന്ന വ്യാപക അക്രമങ്ങളിൽ അതൃപ്തി രേഖപ്പെടുത്തി, കോടതി നിരോധിച്ച ഹർത്താൽ ആഹ്വാനം ചെയ്തതിന് പോപ്പുലർ ഫ്രണ്ട് ഓഫ് ഇന്ത്യ (പിഎഫ്ഐ) നേതാക്കൾക്കെതിരെ കേരള ഹൈക്കോടതി വെള്ളിയാഴ്ച സ്വമേധയാ കേസെടുത്തു . .
ജസ്റ്റിസ് എ കെ ജയശങ്കരൻ നമ്പ്യാർ, ജസ്റ്റിസ് സി പി മുഹമ്മദ് നിയാസ് എന്നിവരടങ്ങുന്ന ഡിവിഷൻ ബെഞ്ച് വിശദമായ ഉത്തരവ് പുറപ്പെടുവിക്കും.
കോടതിയുടെ ഉത്തരവ് ലംഘിക്കുന്നവർക്കെതിരെ കർശന നടപടി സ്വീകരിക്കുകയും, പൗരന്മാരുടെ ജീവിതത്തെ തടസ്സപ്പെടുത്തുന്ന ഈ അക്രമങ്ങൾ നടത്തുന്നവരെ ഉരുക്കു മുഷ്ടി കൊണ്ട് നേരിടണമെന്നും, ഇത് തടയാൻ എല്ലാ സര്‍ക്കാര്‍ സം‌വിധാനങ്ങളും ഉപയോഗിക്കണമെന്നും കോടതി പറഞ്ഞു.
പ്രതിഷേധക്കാരുടെ നടപടി പൂർണ്ണമായും അംഗീകരിക്കാനാവില്ല. പ്രകടനം നടത്താനുള്ള അവകാശത്തിൽ ഞങ്ങൾ ഇടപെട്ടിട്ടില്ല. എന്നാൽ, രാഷ്ട്രീയ പാർട്ടികൾക്കും സംഘടനകൾക്കും സംസ്ഥാനത്തെ ജനങ്ങളെ ബുദ്ധിമുട്ടിക്കുന്ന ഫ്‌ളാഷ് ഹർത്താൽ പ്രഖ്യാപിക്കാന്‍ കഴിയില്ലെന്ന് മാത്രമാണ് ഞങ്ങൾ പറഞ്ഞതെന്നും കോടതി പറഞ്ഞു.
സ്വകാര്യ, പൊതു സ്വത്തുക്കൾ നശിപ്പിക്കുന്ന എല്ലാ സംഭവങ്ങളും തടയണമെന്ന് ബെഞ്ച് വ്യക്തമാക്കി.
സർക്കാർ സർക്കുലർ പുറപ്പെടുവിച്ചിട്ടുണ്ടെന്നും നിയമലംഘകർക്കെതിരെ കർശന നടപടി സ്വീകരിക്കുമെന്നും സംസ്ഥാന സർക്കാർ അറിയിച്ചു.
ഫ്‌ളാഷ് ഹർത്താൽ നിരോധിക്കുകയും ഹർത്താലിനോ പൊതുപണിമുടക്കോ ആഹ്വാനം ചെയ്യുന്ന രാഷ്ട്രീയ പാർട്ടികൾ ഉൾപ്പെടെയുള്ള ഏതൊരു വ്യക്തിക്കും വ്യക്തമായ ഏഴ് ദിവസത്തെ പൊതു അറിയിപ്പ് നൽകണമെന്നും ഹൈക്കോടതി ഉത്തരവിട്ടിരുന്നു. മുൻകൂർ അറിയിപ്പില്ലാതെ നടത്തുന്ന ഹർത്താൽ ഭരണഘടനാ വിരുദ്ധമായിരിക്കുമെന്നും സർക്കാരിനും പൗരന്മാർക്കും ഉണ്ടാകുന്ന നഷ്ടത്തിന് ഉത്തരവാദപ്പെട്ട വ്യക്തിയോ രാഷ്ട്രീയ പാർട്ടികളോ ഉത്തരവാദികളായിരിക്കുമെന്നും കോടതി പറഞ്ഞു.
