യുഎസ് രഹസ്യാന്വേഷണ ഏജൻസികളുടെ “പൂർണ്ണ നിയന്ത്രണത്തിലുള്ള” ഡെന്മാർക്കിന്റെയും സ്വീഡന്റെയും തീരങ്ങളിൽ വിള്ളലുകൾ ഉണ്ടായതിനാൽ നോർഡ് സ്ട്രീം പൈപ്പ്ലൈനുകളിലെ ചോർച്ചയ്ക്ക് പിന്നിൽ യുഎസാണെന്ന് റഷ്യ ആരോപിച്ചു.
നോർഡ് സ്ട്രീം 1, നോർഡ് സ്ട്രീം 2 പൈപ്പ്ലൈനുകള്‍ പൊട്ടിത്തെറിച്ച് ഡെന്മാർക്കിന്റെയും സ്വീഡന്റെയും തീരങ്ങളിൽ നാല് വാതക ചോർച്ചയുണ്ടായത് പൂർണ്ണമായും യുഎസ് നിയന്ത്രണത്തിലുള്ള പ്രദേശത്താണ് സംഭവിച്ചതെന്ന് റഷ്യൻ വിദേശകാര്യ മന്ത്രാലയ വക്താവ് മരിയ സഖറോവ വ്യാഴാഴ്ച പറഞ്ഞു.
“ഡെൻമാർക്കിലെയും സ്വീഡനിലെയും വ്യാപാര, സാമ്പത്തിക മേഖലകളിലാണ് ഇത് സംഭവിച്ചത്. ഇവ നേറ്റോ കേന്ദ്രീകൃത രാജ്യങ്ങളാണ്, ”സഖരോവ ഒരു മാധ്യമത്തിന് നൽകിയ അഭിമുഖത്തിൽ പറഞ്ഞു. യുഎസ് രഹസ്യാന്വേഷണ വിഭാഗത്തിന്റെ നിയന്ത്രണത്തിലുള്ള രാജ്യങ്ങളാണ് അവയെന്നും അവർ പറഞ്ഞു.
നോർഡ് സ്ട്രീം വാതക പൈപ്പ് ലൈനുകളിൽ ദുരൂഹമായ ചോർച്ചയ്ക്ക് കാരണമായ അട്ടിമറിയുടെ പേരിൽ റഷ്യയും പാശ്ചാത്യ രാജ്യങ്ങളും പരസ്പരം കുറ്റപ്പെടുത്തുകയാണ്. റഷ്യ-യുക്രെയ്ൻ യുദ്ധം ആരംഭിച്ചതുമുതൽ ഊർജ വിതരണത്തെച്ചൊല്ലി റഷ്യയും യൂറോപ്പും തമ്മിലുള്ള തർക്കത്തിന്റെ കേന്ദ്രബിന്ദുവാണ് ഈ വിഷയം.
വാതക ചോർച്ചയ്ക്ക് പിന്നിൽ മോസ്കോയാണെന്ന ആരോപണങ്ങൾ “വിഡ്ഢിത്തവും അസംബന്ധവുമാണ്” എന്ന് ബുധനാഴ്ച രാവിലെ ക്രെംലിൻ വക്താവ് ദിമിത്രി പെസ്കോവ് പറഞ്ഞിരുന്നു. “വിതരണം പല മടങ്ങ് വർദ്ധിപ്പിച്ച യുഎസ് എൽഎൻജി വിതരണക്കാർക്ക് വലിയ ലാഭവും കിട്ടി,” അദ്ദേഹം ചൂണ്ടിക്കാട്ടി.
നോർഡ് സ്ട്രീം 1, 2 ഗ്യാസ് പൈപ്പ്ലൈനുകളിൽ സെപ്തംബർ 26-ന് വിശദീകരിക്കാനാകാത്ത ചോർച്ചയുണ്ടായി. നോർഡ് സ്ട്രീം 2-ൽ മർദ്ദം കുറഞ്ഞ് മണിക്കൂറുകൾക്ക് ശേഷം തിങ്കളാഴ്ച വൈകുന്നേരമാണ് നോർഡ് സ്ട്രീം 1 ചോർച്ച ആദ്യമായി കണ്ടെത്തിയത്.
നോർഡ് സ്ട്രീം 1-ന് ഏതാണ്ട് സമാന്തരമായി പ്രവർത്തിക്കുന്ന നോർഡ് സ്ട്രീം 2 സെപ്റ്റംബറിൽ നിർമ്മിച്ചതാണ്. എന്നാൽ, അത് സാക്ഷ്യപ്പെടുത്താൻ ജർമ്മനി വിസമ്മതിച്ചതിനാൽ ഒരിക്കലും ലോഞ്ച് ചെയ്തില്ല. ഫെബ്രുവരി 24 ന് മോസ്കോ “പ്രത്യേക സൈനിക ഓപ്പറേഷൻ” എന്ന് വിളിക്കപ്പെടുന്ന ഉക്രെയ്നിലെ ആക്രമണം ആരംഭിക്കുന്നതിന് ദിവസങ്ങൾക്ക് മുമ്പ് പദ്ധതി പൂർണ്ണമായും നിർത്തിവച്ചു.
