വാഷിംഗ്ടണ്‍: ഇയാൻ ചുഴലിക്കാറ്റ് ഫ്ലോറിഡയിലെ എക്കാലത്തെയും “മാരകമായ” കൊടുങ്കാറ്റായി മാറിയേക്കുമെന്ന് യുഎസ് പ്രസിഡന്റ് ജോ ബൈഡൻ വ്യാഴാഴ്ച മുന്നറിയിപ്പ് നൽകി. സംസ്ഥാനത്തുടനീളം “ഗണ്യമായ” മരണങ്ങൾ ഉണ്ടായേക്കാമെന്ന ഭയവും അദ്ദേഹം പങ്കുവെച്ചു.
“ഫ്ലോറിഡയുടെ ചരിത്രത്തിലെ ഏറ്റവും മാരകമായ ചുഴലിക്കാറ്റായിരിക്കും ഇത്”, വാഷിംഗ്ടണിലെ ഫെമ എമർജൻസി മാനേജ്‌മെന്റ് ഹെഡ്ക്വാർട്ടേഴ്‌സിൽ നടന്ന ഒരു ബ്രീഫിംഗിന് ശേഷം അദ്ദേഹം പറഞ്ഞു.
“സംഖ്യകൾ… ഇപ്പോഴും വ്യക്തമല്ല, പക്ഷേ കാര്യമായ ജീവഹാനിയെക്കുറിച്ചുള്ള റിപ്പോർട്ടുകൾ ഞങ്ങൾ കേൾക്കുന്നു,” അദ്ദേഹം പറഞ്ഞു. സാഹചര്യങ്ങള്‍ വിലയിരുത്തിയതിനു ശേഷം താന്‍ ഫ്ലോറിഡയിലേക്ക് പോകുമെന്നും അദ്ദേഹം കൂട്ടിച്ചേര്‍ത്തു.
നേരത്തെ ഫിയോണ ചുഴലിക്കാറ്റിൽ നിന്ന് കരകയറുന്ന യുഎസ് കരീബിയൻ ദ്വീപായ പ്യൂർട്ടോ റിക്കോ സന്ദർശിക്കുന്നതും പരിഗണനയിലുണ്ടെന്ന് അദ്ദേഹം മാധ്യമ പ്രവർത്തകരോട് പറഞ്ഞു.
ഫ്ലോറിഡയുടെ അടിയന്തര സേവനങ്ങളെ ബൈഡൻ പ്രശംസിച്ചു. കാറ്റും വെള്ളപ്പൊക്കവും നശിപ്പിച്ച മേഖലകളിൽ അത്യാഹിത വിഭാഗവും രക്ഷാപ്രവര്‍ത്തകരും അഭിമുഖീകരിക്കുന്ന ദൗത്യത്തിന്റെ വലിയ തോതിനെക്കുറിച്ചും ബൈഡന്‍ വിവരിച്ചു.
“ഒറ്റപ്പെട്ടുപോയവർക്കും നിരാശാജനകമായ അവസ്ഥയിലുള്ളവർക്കും വേണ്ടിയുള്ള തിരച്ചിൽ, രക്ഷാപ്രവർത്തനങ്ങൾ ഇന്ന് പുലർച്ചെക്ക് മുമ്പേ ആരംഭിച്ചിട്ടുണ്ട്,” അദ്ദേഹം പറഞ്ഞു.
“രക്ഷാപ്രവര്‍ത്തനങ്ങള്‍ ത്വരിതപ്പെടുത്താന്‍ നിരവധി സം‌വിധാനങ്ങള്‍ ക്രമീകരിച്ചിട്ടുണ്ട്. കൂടാതെ, യുഎസ് കോസ്റ്റ് ഗാർഡ് 16 ഹെലികോപ്റ്ററുകളും ആറ് വിമാനങ്ങളും 18 ബോട്ടുകളും വിന്യസിച്ചിട്ടുണ്ട്. ഇവര്‍ നേരിടുന്നത് അപകടകരമായ ദൗത്യങ്ങളാണ്,” ബൈഡന്‍ പറഞ്ഞു.
“ഇന്ന് പലരും വേദനിക്കുന്നു, നമ്മുടെ രാജ്യം മുഴുവൻ അവരോടൊപ്പം വേദനിക്കുന്നു,” ഫ്ലോറിഡക്കാരെ അഭിസംബോധന ചെയ്തുകൊണ്ട് അദ്ദേഹം പറഞ്ഞു,
മാരകമായ മഴയും വിനാശകരമായ കൊടുങ്കാറ്റും റോഡുകളും വീടുകളും വെള്ളത്തിനടിയിലാകുന്നത് ഞങ്ങൾ കണ്ടുകൊണ്ടിരിക്കുകയാണ്. ദശലക്ഷക്കണക്കിന് ആളുകൾ വൈദ്യുതി ഇല്ലാതെയും ആയിരക്കണക്കിന് ആളുകൾ സ്‌കൂളുകളിലും കമ്മ്യൂണിറ്റി സെന്ററുകളിലും അഭയം പ്രാപിച്ചതും ഞങ്ങൾ കാണുന്നുണ്ട്, ബൈഡന്‍ മാധ്യമങ്ങളോട് പറഞ്ഞു.
2024 ലെ പ്രസിഡന്റ് തെരഞ്ഞെടുപ്പിൽ മുൻ പ്രസിഡന്റ് ഡൊണാൾഡ് ട്രംപുമായി മത്സരിക്കുന്നതായി പരക്കെ കാണപ്പെടുന്ന വലതുപക്ഷ റിപ്പബ്ലിക്കൻ ഫ്ലോറിഡ ഗവർണർ റോൺ ഡിസാന്റിസിന് ബൈഡന്‍ സമാധാന സന്ദേശം നല്‍കി.
ബൈഡനോടുള്ള വിട്ടുവീഴ്ചയില്ലാത്ത എതിരാളിയായാണ് ഡിസാന്റിസ് ഉയർന്നുവന്നിട്ടുള്ളത്. എന്നാല്‍, പ്രതിസന്ധി ഘട്ടത്തിൽ അവർ രാഷ്ട്രീയം മാറ്റിവച്ചതായി പ്രസിഡന്റ് പറഞ്ഞു. “ഞങ്ങൾ ഒരു ടീമായി ഒന്നിക്കാൻ പോകുകയാണ്,” ബൈഡന്‍ പറഞ്ഞു.
“ഇത്… രാഷ്ട്രീയമായി ഞങ്ങളുടെ അഭിപ്രായവ്യത്യാസങ്ങളുമായി എന്തെങ്കിലും ബന്ധമുള്ള കാര്യമല്ല. ഇത് ജനങ്ങളുടെ ജീവനും സ്വത്തും ബിസിനസ്സുകളും സംരക്ഷിക്കുന്നതിനെക്കുറിച്ചാണ്,” ബൈഡന്‍ പറഞ്ഞു. ചുഴലിക്കാറ്റ് നാശനഷ്ടങ്ങളെക്കുറിച്ചും രക്ഷാപ്രവര്‍ത്തനങ്ങളെക്കുറിച്ചും ഡിസാന്റിസുമായി “നാലോ അഞ്ചോ തവണ” സംസാരിച്ചതായി അദ്ദേഹം പറഞ്ഞു.
