ബഗാഹ (ബീഹാർ): കഴിഞ്ഞ രണ്ട് മാസത്തിനിടെ ഒമ്പത് മനുഷ്യമരണങ്ങൾക്ക് കാരണമായ ബീഹാറിലെ നരഭോജി കടുവ ഒടുവിൽ ശനിയാഴ്ച കൊല്ലപ്പെട്ടു. പടിഞ്ഞാറൻ ചമ്പാരൻ ജില്ലയിലെ ബഗാഹ പട്ടണത്തിലെ ഒരു കരിമ്പ് തോട്ടത്തിൽ ഉച്ചയോടെയാണ് കടുവയെ കണ്ടതും വെടിവെച്ച് കൊന്നതെന്നും വനം വകുപ്പ് വൃത്തങ്ങൾ പറഞ്ഞു.
ചിവതഹാൻ, ഗോവർദ്ധൻ വനമേഖലയ്ക്ക് സമീപം രണ്ട് മാസത്തിനിടെ ഒമ്പത് മനുഷ്യരെയാണ് കടുവ കൊന്നത്. ബഗാഹയിലെ ഗോവർദ്ധന പോലീസ് സ്‌റ്റേഷനു കീഴിലുള്ള ബാലുവ ഗ്രാമത്തിൽ രാവിലെ 7 മണിയോടെ വീട്ടിൽ കയറി ഒരു സ്ത്രീയെയും മകനെയും കൊലപ്പെടുത്തിയിരുന്നു. നരഭോജിയെ ഉന്മൂലനം ചെയ്യാൻ ബീഹാർ ചീഫ് വൈൽഡ് ലൈഫ് വാർഡൻ പികെ ഗുപ്ത ഷൂട്ട് അറ്റ് സൈറ്റ് ഉത്തരവ് പുറപ്പെടുവിച്ചതിന് തൊട്ടുപിന്നാലെയാണ് സംഭവം. ദൗത്യത്തിനായി എസ്ടിഎഫിനെ വിന്യസിച്ചു.
വാൽമീകി കടുവാ സങ്കേതത്തിലെ (വിടിആർ) രംഗിയ ഫോറസ്റ്റ് റേഞ്ചിലെ സിംഗാഹി പഞ്ചായത്തിന് കീഴിലുള്ള ദുമാരി ഗ്രാമത്തിൽ നിന്നുള്ള 34 കാരനെ വെള്ളിയാഴ്ച രാവിലെ കടുവ കൊന്നതിനെ തുടർന്നാണ് നിർദേശം നല്‍കിയത്. ബുധനാഴ്ച, സിംഗാഹി മുസ്തോലി ഗ്രാമത്തിൽ 12 വയസ്സുള്ള പെൺകുട്ടി കൊല്ലപ്പെട്ടതായി റിസർവിലെ വൈൽഡ് കൺസർവേറ്ററും ഫീൽഡ് ഡയറക്ടറുമായ ഡോ. നേഷാമണി കെ പറഞ്ഞു.
കടുവ കൊലവിളി തുടർന്നതോടെ പ്രദേശവാസികൾക്കിടയിൽ കടുത്ത അതൃപ്തി ഉയർന്നിരുന്നു. രോഷാകുലരായ ഗ്രാമവാസികൾ വനംവകുപ്പിന്റെ നിരവധി വാഹനങ്ങൾ നശിപ്പിച്ച് വിവിധ ഗ്രാമങ്ങളിൽ ഒളിക്കാൻ ജീവനക്കാരെ നിർബന്ധിതരാക്കി. കടുവയുടെ ആക്രമണം ഭയന്ന് ഗ്രാമവാസികൾ വീടിന് പുറത്തിറങ്ങാൻ പോലും ഭയപ്പെടുന്നു.
ബീഹാറിലെ വെസ്റ്റ് ചമ്പാരൻ ജില്ലയിലുള്ള വാൽമീകി ടൈഗർ റിസർവ് ആണ് സംസ്ഥാനത്തെ ഏക ദേശീയ ഉദ്യാനം. ജില്ലയുടെ മൊത്തം ഭൂമിശാസ്ത്രപരമായ വിസ്തൃതിയുടെ 17.4% (898.45 കി.മീ) ഇത് ഉൾക്കൊള്ളുന്നു. 2018 ലെ കടുവ സെൻസസ് പ്രകാരം റിസർവിൽ 40 കടുവകൾ ഉണ്ടായിരുന്നു.
