ഫ്ലോറിഡ: അമേരിക്കയിലായിരിക്കെ അയച്ച ട്വീറ്റുകളുടെ പേരിൽ ഒരു അമേരിക്കൻ പൗരനെ സൗദി അറേബ്യയിൽ അറസ്റ്റ് ചെയ്യുകയും പീഡിപ്പിക്കുകയും 16 വർഷം തടവിന് ശിക്ഷിക്കുകയും ചെയ്തതായി അദ്ദേഹത്തിന്റെ മകൻ ചൊവ്വാഴ്ച പറഞ്ഞു.
ഫ്ലോറിഡയിൽ താമസിക്കുന്ന റിട്ടയേർഡ് പ്രോജക്ട് മാനേജരായ 72 കാരനായ സാദ് ഇബ്രാഹിം അൽമാദിയെ കഴിഞ്ഞ നവംബറിലാണ് സൗദിയിലുള്ള കുടുംബത്തെ സന്ദർശിക്കുന്നതിനിടെ അറസ്റ്റ് ചെയ്യുകയും ഈ മാസം ആദ്യം ശിക്ഷ വിധിക്കുകയും ചെയ്തതെന്ന് മകൻ ഇബ്രാഹിം വാഷിംഗ്ടണ്‍ പോസ്റ്റിനോട് പറഞ്ഞു. അൽമാദിക്ക് ഇരട്ട പൗരത്വം(യു എസ് – സൗദി) ഉണ്ട്. സൗദി അധികൃതരിൽ നിന്ന് ഉടൻ പ്രതികരണമൊന്നും ഉണ്ടായിട്ടില്ല.
അൽമാദിയുടെ ശിക്ഷ ചൊവ്വാഴ്ച സ്റ്റേറ്റ് ഡിപ്പാർട്ട്മെന്റ് ഡപ്യൂട്ടി വക്താവ് വേദാന്ത് പട്ടേൽ വാഷിംഗ്ടണിൽ മാധ്യമ പ്രവർത്തകരോട് സംസാരിക്കവെ സ്ഥിരീകരിച്ചു.
റിയാദിലെയും വാഷിംഗ്ടൺ ഡിസിയിലെയും ചാനലുകളിലൂടെ സൗദി ഗവൺമെന്റിന്റെ മുതിർന്ന തലങ്ങളിൽ ഞങ്ങളുടെ ആശങ്കകൾ ഉന്നയിച്ചിട്ടുണ്ടെന്നും, അത് തുടരുമെന്നും പട്ടേല്‍ പറഞ്ഞു.
സർക്കാരിനെ വിമർശിക്കുന്ന സോഷ്യൽ മീഡിയ പോസ്റ്റുകളുടെ പേരിൽ സൗദികൾക്ക് ദീർഘകാല ജയിൽ ശിക്ഷ ലഭിച്ച സമീപകാല കേസുകളിലെ ഏറ്റവും പുതിയതാണ് അല്‍മാദിയുടേത്.
സോഷ്യൽ മീഡിയയിലൂടെ രാജ്യത്തെ അവഹേളിച്ചെന്ന് ആരോപിച്ച് സൗദി കോടതി അടുത്തിടെ ഒരു സ്ത്രീക്ക് 45 വർഷം തടവ് വിധിച്ചിരുന്നു.
ഇംഗ്ലണ്ടിലെ ലീഡ്‌സ് യൂണിവേഴ്‌സിറ്റിയിലെ ഒരു സൗദി ഡോക്ടറൽ വിദ്യാർത്ഥിക്ക് “കിംവദന്തികൾ” പ്രചരിപ്പിക്കുകയും വിയോജിക്കുന്നവരെ റീട്വീറ്റ് ചെയ്യുകയും ചെയ്തതിന് 34 വർഷം തടവിന് ശിക്ഷ വിധിച്ചത് അന്താരാഷ്ട്ര രോഷത്തിന് ഇടയാക്കി.
കഴിഞ്ഞ ഏഴ് വർഷത്തിനിടെ ട്വിറ്ററിൽ പോസ്റ്റ് ചെയ്ത 14 “സാധാരണ ട്വീറ്റുകൾ” മൂലം തന്റെ പിതാവിനെ തടഞ്ഞുവച്ചിരിക്കുകയാണെന്ന് സാദ് ഇബ്രാഹിം അൽമാദിയുടെ മകന്‍ ഇബ്രാഹിം പറയുന്നു. ട്വീറ്റില്‍ കൂടുതലും സർക്കാർ നയങ്ങളെയും അഴിമതി ആരോപണങ്ങളെയും വിമർശിക്കുന്നവയാണ്. തന്റെ പിതാവ് ഒരു ആക്ടിവിസ്റ്റല്ലെന്നും അഭിപ്രായ സ്വാതന്ത്ര്യം ഭരണഘടനാപരമായ അവകാശമായി കണക്കാക്കുന്ന അമേരിക്കയിലായിരിക്കുമ്പോള്‍ തന്റെ അഭിപ്രായം തുറന്നു പ്രകടിപ്പിക്കുന്ന ഒരു സ്വകാര്യ പൗരനാണെന്നും അദ്ദേഹം പറയുന്നു.
തീവ്രവാദത്തെ പിന്തുണച്ചുവെന്ന കുറ്റം ചുമത്തി ഒക്‌ടോബർ മൂന്നിന് പിതാവിന് 16 വർഷത്തെ തടവ് ശിക്ഷ ലഭിച്ചതായി ഇബ്രാഹിം പറഞ്ഞു. ഇബ്രാഹിം പോസ്റ്റ് ചെയ്ത ട്വീറ്റുകളിൽ തീവ്രവാദം റിപ്പോർട്ട് ചെയ്യുന്നതിൽ പരാജയപ്പെട്ടുവെന്ന കുറ്റവും പിതാവിനെതിരെ ചുമത്തിയിട്ടുണ്ട്.
പിതാവിന് 16 വർഷത്തെ യാത്രാ വിലക്കും ഏർപ്പെടുത്തിയിട്ടുണ്ട്. ശിക്ഷ നടപ്പാക്കിയാൽ, 72 വയസ്സുള്ള അദ്ദേഹം മോചിതനാകുമ്പോൾ 87 വയസ്സ് തികയും, 104 വയസ്സ് തികയാതെ യുഎസിലേക്ക് മടങ്ങാനും സാധിക്കുകയില്ല.
കേസിൽ മിണ്ടാതിരിക്കാനും യുഎസ് സർക്കാരിനെ ഉൾപ്പെടുത്തരുതെന്നും സൗദി അധികൃതർ തന്റെ കുടുംബത്തിന് മുന്നറിയിപ്പ് നൽകിയതായി ഇബ്രാഹിം പറഞ്ഞു. മാർച്ചിൽ കുടുംബം സ്റ്റേറ്റ് ഡിപ്പാർട്ട്മെന്റുമായി ബന്ധപ്പെട്ടതിനെ തുടർന്നാണ് പിതാവ് പീഡിപ്പിക്കപ്പെട്ടതെന്ന് അദ്ദേഹം പറഞ്ഞു.
“തെറ്റായ രീതിയിൽ തടങ്കലിൽ വച്ചിരിക്കുന്ന” അമേരിക്കക്കാരനായി പ്രഖ്യാപിക്കാതെ തന്റെ പിതാവിന്റെ കേസ് സ്റ്റേറ്റ് ഡിപ്പാർട്ട്മെന്റ് അവഗണിക്കുകയാണെന്ന് ഇബ്രാഹിം ആരോപിച്ചു.
ഇനി സ്റ്റേറ്റ് ഡിപ്പാർട്ട്മെന്റുമായി ഒരു “ചൂതാട്ടം” നടത്താൻ ഞാൻ തയ്യാറല്ലെന്നും ഇബ്രാഹിം പറഞ്ഞു.
പ്രസിഡന്റ് ജോ ബൈഡൻ ജൂലൈയിൽ സൗദി രാജകുമാരനുമായുള്ള കൂടിക്കാഴ്ചയ്ക്കായി എണ്ണ സമ്പന്നമായ രാജ്യത്തേക്ക് പോയിരുന്നു. അതിൽ മനുഷ്യാവകാശ ധ്വംസനങ്ങളെക്കുറിച്ചും താന്‍ സംസാരിച്ചതായി അദ്ദേഹം പറഞ്ഞു.
സൗദി പത്രപ്രവർത്തകനും വാഷിംഗ്ടൺ പോസ്റ്റ് കോളമിസ്റ്റുമായ ജമാൽ ഖഷോഗിയെ 2018-ൽ കൊലപ്പെടുത്തിയതിനെച്ചൊല്ലി സൗദി അറേബ്യയെ ഒരു “പരിഹാസം” ആക്കാനുള്ള ബൈഡന്റെ നേരത്തെയുള്ള പ്രതിജ്ഞയും, ഇരുവരുടെ കൂടിക്കാഴ്ചയും പരക്കെ വിമർശിക്കപ്പെട്ടു.
