ന്യൂഡൽഹി: സൈനികർക്കൊപ്പം വെളിച്ചത്തിന്റെ ഉത്സവം ആഘോഷിക്കാൻ തിങ്കളാഴ്ച കാർഗിലിൽ വിമാനമിറങ്ങിയ പ്രധാനമന്ത്രി നരേന്ദ്ര മോദി, ദീപാവലി എന്നാൽ “ഭീകരതയുടെ അവസാനത്തിന്റെ ഉത്സവം” ആണെന്നും കാർഗിൽ അത് സാധ്യമാക്കിയെന്നും പറഞ്ഞു.
“എനിക്ക് നിങ്ങളെല്ലാവരും വർഷങ്ങളായി എന്റെ കുടുംബമാണ്. കാർഗിലിൽ നമ്മുടെ ധീര ജവാൻമാർക്കൊപ്പം ദീപാവലി ആഘോഷിക്കാൻ കഴിഞ്ഞത് ഒരു ഭാഗ്യമാണ്. ഇന്ത്യയുടെ സുരക്ഷയുടെ നെടുംതൂണാണ് സൈന്യം. കാർഗിലിന്റെ ഈ വിജയഭൂമിയിൽ നിന്ന്, രാജ്യവാസികൾക്കും ലോകത്തിനും ഞാൻ ദീപാവലി ആശംസകൾ നേരുന്നു. കാർഗിൽ വിജയപതാക ഉയർത്താത്ത ഒരു യുദ്ധം പോലും പാക്കിസ്താനുമായി ഉണ്ടായിട്ടില്ല. ദീപാവലിയുടെ അർത്ഥം ഭീകരതയുടെ അവസാനമാണ്, കാർഗിൽ അത് സാധ്യമാക്കി,” സൈനികരെ അഭിസംബോധന ചെയ്തുകൊണ്ട് പ്രധാനമന്ത്രി പറഞ്ഞു.
“കാർഗിലിൽ നമ്മുടെ സൈന്യം ഭീകരത തകർക്കുന്നത് സാക്ഷിയാകാനുള്ള ഭാഗ്യം എനിക്കുണ്ടായി. എന്റെ പഴയ ഫോട്ടോകൾ ഇവിടെ കാണിച്ചു, അതിന് ഞാൻ നന്ദിയുള്ളവനാണ്, ”അദ്ദേഹം കൂട്ടിച്ചേർത്തു. വർഷങ്ങളായി സൈനികർക്കൊപ്പമാണ് പ്രധാനമന്ത്രി ഉത്സവം ആഘോഷിക്കാറ്.
2019ൽ ജമ്മു കശ്മീരിലെ നിയന്ത്രണ രേഖയോട് ചേർന്നുള്ള രജൗരി ജില്ലയിൽ സൈനികർക്കൊപ്പം പ്രധാനമന്ത്രി ദീപാവലി ആഘോഷിച്ചു. അദ്ദേഹം പട്ടാളക്കാരെ കുടുംബമെന്ന് വിശേഷിപ്പിക്കുകയും, ഉത്സവ വേളകളിൽ പോലും അതിർത്തി കാക്കുന്നവരെ അഭിനന്ദിക്കുകയും ചെയ്തിരുന്നു. പത്താൻകോട്ട് എയർഫോഴ്സ് സ്റ്റേഷനിൽ ഇന്ത്യൻ എയർഫോഴ്സ് (ഐഎഎഫ്) ഉദ്യോഗസ്ഥരുമായി അദ്ദേഹം ദീപാവലി ആശംസകൾ കൈമാറി.
2018ൽ ഉത്തരാഖണ്ഡിലെ ഹർസിലിൽ ഇന്ത്യൻ ആർമിയുടെയും ഇന്തോ-ടിബറ്റൻ ബോർഡർ പോലീസിന്റെയും (ഐടിബിപി) ജവാൻമാർക്കൊപ്പം പ്രധാനമന്ത്രി മോദി ദീപാവലി ആഘോഷിച്ചിരുന്നു. തുടർന്ന് അദ്ദേഹം കേദാർനാഥ് ക്ഷേത്രത്തിൽ പ്രാർഥന നടത്തിയിരുന്നു.
2017-ൽ ജമ്മു കശ്മീരിലെ ബന്ദിപ്പോര ജില്ലയിലെ ഗുരേസ് താഴ്‌വരയിൽ സൈനികർക്കും അതിർത്തി രക്ഷാ സേന (ബിഎസ്എഫ്) ജവാന്മാർക്കുമൊപ്പം പ്രധാനമന്ത്രി പ്രകാശത്തിന്റെ ഉത്സവം ആഘോഷിച്ചു.
2016-ൽ പ്രധാനമന്ത്രി ഹിമാചൽ പ്രദേശിൽ ഇന്തോ-ടിബറ്റൻ ബോർഡർ പോലീസ് ഉദ്യോഗസ്ഥർക്കൊപ്പം ഒരു ഔട്ട്‌പോസ്റ്റിൽ ഉത്സവം ആഘോഷിക്കാൻ പോയിരുന്നു.
2015ൽ സൈനികർക്കൊപ്പം ദീപാവലി ആഘോഷിക്കാൻ പഞ്ചാബ് അതിർത്തി സന്ദർശിച്ചു.
2014ൽ പ്രധാനമന്ത്രി മോദി സൈനികർക്കൊപ്പം സിയാച്ചിനിൽ ദീപാവലി ആഘോഷിച്ചു. ഗുജറാത്ത് മുഖ്യമന്ത്രിയായിരുന്ന കാലം മുതൽ പ്രധാനമന്ത്രി മോദി ദീപാവലി ദിനത്തിൽ സൈനികരെ സന്ദർശിക്കുന്നത് ശ്രദ്ധേയമാണ്.
Prime Minister Shri @narendramodi has landed in Kargil, where he will celebrate Diwali with our brave soldiers. pic.twitter.com/RQxanDEgDK
— PMO India (@PMOIndia) October 24, 2022
