യുണൈറ്റഡ് അറബ് എമിറേറ്റ്‌സിലേയും (യുഎഇ) മറ്റ് ഗൾഫ് രാജ്യങ്ങളിലെയും തൊഴില്‍‌രഹിതരായ സ്ത്രീകളെയും പുരുഷന്മാരെയും ലക്ഷ്യമിട്ട് സംഘടിത സ്വർണക്കടത്ത് മാഫിയ ഇന്ത്യയിലേക്ക് സ്വർണം കടത്തുന്നതായി റിപ്പോര്‍ട്ട്.
ഒരു അന്താരാഷ്ട്ര മയക്കുമരുന്ന് കള്ളക്കടത്ത് റാക്കറ്റിനെക്കുറിച്ച് കസ്റ്റംസ് ഉദ്യോഗസ്ഥർ ആഴത്തിൽ അന്വേഷിക്കുമ്പോൾ തൊഴിലില്ലാത്തവരെ പ്രലോഭിപ്പിച്ച് ഇന്ത്യൻ നഗരങ്ങളിലേക്ക് സ്വർണം കൊണ്ടുപോകുന്നതായി കണ്ടെത്തി. പകരം ചെറിയ തുകകളും വിമാന ടിക്കറ്റുകളുമാണ് ഇവര്‍ വാഗ്ദാനം ചെയ്യുന്നത്.
“ഒരു ജോലി ലഭിക്കാൻ നിരവധി ശ്രമങ്ങൾ നടത്തുന്നവരും ഇന്ത്യയിലേക്ക് മടങ്ങാൻ ആഗ്രഹിക്കുന്നവരുമായ ആളുകളെ ഏജന്റുമാർ വേട്ടയാടുകയാണ്. ജോലിയില്ലാത്തതിനാൽ വിമാന ടിക്കറ്റ് വാങ്ങാനുള്ള പണം പോലും കൈയ്യിലില്ലാത്തവരെ ഏജന്റുമാർ സ്വർണക്കടത്ത് സംഘങ്ങളുമായി ബന്ധിപ്പിക്കുകയും അവർ വഴി സ്വർണം വിവിധ രൂപങ്ങളിൽ കടത്തുകയും ചെയ്യുന്നു,” ഹൈദരാബാദ് കസ്റ്റംസിലെ ഒരു ഉദ്യോഗസ്ഥൻ പറഞ്ഞു.
ഒരു യാത്രയ്ക്ക് ഇവർക്ക് 1000 രൂപ മുതല്‍ 30,000 രൂപ വരെ കമ്മീഷന്‍ ലഭിക്കും. പിടിക്കപ്പെട്ടാൽ തുക പകുതിയായി കുറയും. അറസ്റ്റ് ചെയ്യപ്പെട്ടാൽ ഉൾപ്പെടുന്ന നിയമപരമായ കാര്യങ്ങൾ സ്വർണ്ണ കള്ളക്കടത്തുകാരുടെ സിൻഡിക്കേറ്റുകളിലെ പ്രാദേശിക അഭിഭാഷകരാണ് കൈകാര്യം ചെയ്യുന്നതെന്ന് പോലീസ് ഉദ്യോഗസ്ഥർ പറഞ്ഞു. ഗൾഫ് രാജ്യങ്ങളിൽ തുച്ഛമായ തുകയ്‌ക്ക് നിരവധി ഏജന്റുമാർ ജോലി ചെയ്യുന്നുണ്ടെന്നും ഇന്ത്യയിലേക്ക് മടങ്ങാനുള്ള നിരാശയിൽ നിന്ന് സ്വർണം കടത്താൻ തയ്യാറായ ആളുകളെ തിരിച്ചറിയുകയും ചെയ്യുമെന്ന് അവർ കൂട്ടിച്ചേർത്തു.
“സാമ്പത്തികമായി പിന്നോക്കം നിൽക്കുന്ന കുടുംബങ്ങളിൽ നിന്നുള്ളവരാണ് സ്വർണ്ണ വാഹകർ എന്ന് വിളിക്കപ്പെടുന്നവര്‍. കള്ളക്കടത്തിൽ പങ്കാളികളാകാൻ പുരുഷന്മാരും സ്ത്രീകളും ഒരുപോലെ സമ്മതിക്കുന്നു,” ഹൈദരാബാദ് പോലീസിലെ ഒരു ഉദ്യോഗസ്ഥൻ പറഞ്ഞു.
ചൊവ്വാഴ്ച, ഇൻസ്പെക്ടർ എസ് രാഘവേന്ദ്രയുടെ നേതൃത്വത്തിലുള്ള ഹൈദരാബാദ് കമ്മീഷണറുടെ ടാസ്‌ക് ഫോഴ്‌സ് (സൗത്ത്) സംഘം യുഎഇയിൽ നിന്ന് കടത്തിയ ഒരു കിലോ സ്വർണവുമായി നാല് പേരെ പിടികൂടി.
ഹൈദരാബാദിലെ ഗോൽക്കൊണ്ടയിലെ മുഹമ്മദ് ഖാജാ മൊഹിയുദ്ദീൻ (38) ആണ് സ്വർണ ഗുളികകൾ മലാശയത്തിൽ ഒളിപ്പിച്ച് രാജ്യത്തേക്ക് കടത്തിയത്. നഗരത്തിലെ ഒരു ലോഡ്ജിലെത്തിയ ശേഷം അയാൾ അവിടെ താമസിച്ചു. വാഷ് റൂമില്‍ പോകുന്നതുവരെ അവിടെ തങ്ങി.
അതിനിടെ കർണാടക സ്വദേശികളായ റയീസ് അഹമ്മദ് സയീദ് ഹുസൈൻ (48), സരിം ഹുസൈൻ (29), ഫൗസാൻ (38) എന്നിവർ മുംബൈയിലെ സ്വർണ മാർക്കറ്റിൽ സ്വർണം കൊണ്ടുപോയി മാഫിയയുമായി ബന്ധമുള്ളവർക്ക് കൈമാറാൻ എത്തുകയും ചെയ്തു.
“ഇന്ത്യയിലെ സിൻഡിക്കേറ്റിൽ റയീസ് പ്രധാനിയാണ്. കാരിയർമാർ സ്വർണം കടത്തുന്ന എല്ലാ നഗരങ്ങളും അയാള്‍ സന്ദർശിക്കുകയും ശേഖരിക്കുകയും ചെയ്യുന്നു,” ഗൾഫ് രാജ്യങ്ങളിലും ഇന്ത്യയിലും ഒരു വലിയ ശൃംഖലയുണ്ടെന്ന് കസ്റ്റംസ് ഉദ്യോഗസ്ഥൻ പറഞ്ഞു.
ഖാജാ മൊഹിയുദ്ദീൻ സന്ദര്‍ശക വിസയിലാണ് യു.എ.ഇയിലേക്ക് പോയതെന്നും, പണം തീർന്നപ്പോള്‍ മുസ്താകിൻ എന്നയാളെ അവിടെ കണ്ടുമുട്ടുകയും രാജ്യത്തേക്ക് സ്വർണം കടത്തുന്നതിന് പകരമായി പണവും വിമാന ടിക്കറ്റും വാഗ്ദാനം ചെയ്യുകയും ചെയ്തു എന്ന് പോലീസ് പറഞ്ഞു.
“മുസ്താകിൻ അവിടെവെച്ച് മൂന്ന് സ്വർണ്ണ ഗുളികകൾ കൈമാറിയതിന് ശേഷം ഖാജ അവ വിഴുങ്ങി. ആർ‌ജി‌ഐ എയർപോർട്ടിൽ ഇറങ്ങിയ ശേഷം റയീസിനെയും കൂട്ടാളികളെയും കണ്ടു, അവർ അയാളെ അഫ്‌സൽഗഞ്ചിലെ ഒരു ലോഡ്ജിലേക്ക് കൊണ്ടുപോയി അവിടെ താമസിപ്പിച്ചു. അയാൾ അത് വാഷ്റൂമിൽ നിന്ന് പുറത്തെടുത്ത് റയീസിന് കൈമാറി,” പോലീസ് ഉദ്യോഗസ്ഥൻ പറഞ്ഞു.
