ദോഹ: ആഫ്രിക്കൻ രാജ്യമായ ലൈബീരിയയുടെ തലസ്ഥാനമാണ് മൺറോവിയ. ഭരണകക്ഷിയായ കോൺഗ്രസ് ഫോർ ഡെമോക്രാറ്റിക് ചേഞ്ചിന്റെ ആസ്ഥാനത്ത് ലോകകപ്പ് മത്സരം കാണാൻ വലിയ സ്‌ക്രീൻ തയ്യാറായി. രാഷ്ട്രീയ ചർച്ചകൾ മാത്രം നടക്കുന്ന ആ കെട്ടിടത്തിൽ ഇതാദ്യമായാണ് ലോകകപ്പ് തത്സമയം സംപ്രേക്ഷണം ചെയ്യുന്നത്. ഇതുവരെ ലോകകപ്പ് കളിച്ചിട്ടില്ലാത്ത രാജ്യത്തിന് ചൂടുപിടിക്കാൻ കാരണമുണ്ട്. വെയിൽസിനെതിരായ അതേ മത്സരത്തിൽ അമേരിക്കയുടെ നിർണായക ഗോൾ നേടിയ 22-കാരൻ തിമോത്തി വീഹ്. ഖത്തറിൽ ചരിത്രപരമായ ഒരു നിയോഗത്തിലാണ് അദ്ദേഹം. അച്ഛന് ഒരിക്കലും കളിക്കാൻ അവസരം കിട്ടാതിരുന്ന ലോകകപ്പ് വേദിയിൽ അദ്ദേഹം പന്തുരുട്ടുന്നു, ടീമിലെ നിർണായക ശക്തിയായി. അദ്ദേഹത്തിന്റെ പിതാവ് ജോർജ്ജ് വീഹ് ഗ്യാലറിയിൽ ആവേശഭരിതനായി കളി കാണുന്നു.
ജോർജ്ജ് വീഹ് ആഫ്രിക്കയിലെ എക്കാലത്തെയും മികച്ച ഫുട്ബോൾ കളിക്കാരനായിരുന്നു. എസി മിലാൻ, പിഎസ്ജി, മൊണാക്കോ, ചെൽസി, മാഞ്ചസ്റ്റർ സിറ്റി തുടങ്ങിയ യൂറോപ്പിലെ ഏറ്റവും വലിയ ക്ലബ്ബുകൾക്കായി അദ്ദേഹം കളിച്ചിട്ടുണ്ട്. 1995-ൽ ഫിഫ വേൾഡ് പ്ലെയർ ഓഫ് ദി ഇയർ, ബാലാന്‍ ദിയോര്‍ അവാർഡുകൾ എന്നിവ നേടിയിട്ടുണ്ട്. അന്താരാഷ്ട്ര തലത്തിൽ ഒരു ആഫ്രിക്കൻ രാജ്യത്തെ പ്രതിനിധീകരിച്ച് ഈ അവാർഡുകൾ നേടിയ ഒരേയൊരു ഫുട്ബോൾ കളിക്കാരനാണ് വീഹ്. 75 രാജ്യാന്തര മത്സരങ്ങളിൽ നിന്ന് 18 ഗോളുകൾ നേടിയ ലോകപ്രശസ്ത താരമായിരുന്നിട്ടും ലോകകപ്പ് വേദിയിൽ ബൂട്ട് കെട്ടാൻ ജോർജ്ജ് വീഹിന് കഴിഞ്ഞില്ല. പ്രതിഭയുടെ കുറവുകൊണ്ടല്ല, ലോകകപ്പ് സ്വപ്നം ഏറ്റെടുക്കാൻ പകരക്കാരനായി മറ്റൊരാളില്ലാത്തത് കൊണ്ടാണ്.
ജോർജ്ജ് വീഹിനപ്പുറം ലൈബീരിയയ്ക്ക് ഫുട്ബോളിൽ അവകാശവാദമില്ല. നിലവിൽ ലോക റാങ്കിംഗില്‍ 150-ാം സ്ഥാനത്താണ്. 2002 ലോകകപ്പിൽ മാത്രമാണ് ലൈബീരിയ യോഗ്യതാ റൗണ്ടിൽ മികച്ച പ്രകടനം ലൈബീരിയ കാഴ്ചവെച്ചത്. 2002ലും 1996ലും ആഫ്രിക്കൻ കപ്പ് ഓഫ് നേഷൻസിൽ കളിച്ചതാണ് അവരുടെ നേട്ടം. രണ്ടും ജോർജ് വീഹിന്റെ സാന്നിധ്യത്തിൽ.
കാല്‍പ്പന്ത് വിട്ട് രാഷ്ട്രീയത്തിലിറങ്ങിയ ജോര്‍ജ് വീഹ് 2018 ല്‍ ലൈബീരിയയുടെ പ്രസിഡന്‌റായി തിരഞ്ഞെടുക്കപ്പെട്ടു. ഫുട്‌ബോള്‍ സ്വപ്‌നങ്ങള്‍ മകന് കൈമാറിയായിരുന്നു ആ ചുവടുമാറ്റം. ഇപ്പോള്‍ തനിക്ക് അസാധ്യമായ ആ ലോകകപ്പ് സ്വപ്നം മകനിലൂടെ സാധ്യമാകുമ്പോള്‍ നേരില്‍ കാണാന്‍ ഗ്യാലറിയിൽ ജോർജ് വീഹുമുണ്ട്.
അമേരിക്കയില്‍ ജനിച്ചു വളര്‍ന്ന ടിം വീഹ് 14ാം വയസിലാണ് പിഎസ്ജിയിലെത്തിയത്. ആദ്യകാലത്ത് അച്ഛന് തന്നെയായിരുന്നു പരിശീലകന്‍. വിവിധ രാജ്യങ്ങളിൽ വേരുകളുള്ള ടിം വീഹിന് ജമൈക്ക, ലൈബീരിയ, അമേരിക്ക തുടങ്ങിയ ടീമുകൾക്കായി കളിക്കാൻ അവസരമുണ്ടായിരുന്നു. ഇതിൽ അമേരിക്കയെ രാജ്യാന്തര ഫുട്‌ബോളിനായി തിരഞ്ഞെടുത്തത് അച്ഛന്‌റെ ദുര്‍വിധി ഓര്‍ത്താകും. ലോക കപ്പ് കളിക്കുന്ന ആദ്യ ലൈബീരിയന്‍ വംശജനെന്ന നേട്ടത്തിന് ടിമ്മിനെ അര്‍ഹനാക്കിയ് ആ തീരുമാനം കൂടിയാണ്. അമേരിക്കയ്ക്ക് വേണ്ടി കളിക്കാനുള്ള ടിമ്മിന്‌റെ തീരുമാനം രാഷ്ട്രീയ എതിരാളികള്‍ ആയുധമാക്കാന്‍ ശ്രമിച്ചെങ്കിലും ജോര്‍ജ് വീഹ് കുലുങ്ങിയില്ല. തങ്ങളിലൊരാള്‍ ലോകകപ്പ് വേദിയിലെത്തിയതിനെ തുറന്ന മനസോടെ സ്വീകരിക്കാന്‍ ലൈബീരിയന്‍ ജനതയും തയ്യാറാണ്.
തിമോത്തി നിലവിൽ ലിഗ് വൺ ക്ലബ്ബായ ലില്ലിനാണ് കളിക്കുന്നത്. 2018-ൽ പാരീസ് സെന്റ് ജെർമെയ്‌നിനായി അരങ്ങേറ്റം കുറിച്ച അദ്ദേഹം മൂന്ന് തവണ ലീഗ് കിരീടം നേടിയിട്ടുണ്ട്. തിമോത്തി രണ്ടു തവണ പിഎസ്‌ജിക്കൊപ്പം ഒരു തവണയും ലില്ലെയ്‌ക്കൊപ്പം ഒരു തവണയും കിരീടം നേടി. യുഎസ്എ ദേശീയ ടീമിനായി തിമോത്തി 25 മത്സരങ്ങൾ കളിച്ചു.
വെയ്ൽസിനെതിരെ നിർണായക ഗോൾ നേടിയ തിമോത്തി പറഞ്ഞു: “അച്ഛന് ഒരിക്കലും തന്റെ രാജ്യത്തെ ഒരു ലോകകപ്പ് സ്റ്റേജിലേക്ക് കൊണ്ടുപോകാൻ കഴിഞ്ഞിട്ടില്ല, ഇപ്പോൾ അദ്ദേഹത്തിന്റെ മകൻ ഇവിടെയുണ്ട്, അദ്ദേഹത്തിന് അഭിമാനിക്കാൻ എനിക്ക് കഴിയുന്നത് ഞാൻ ചെയ്യും.”
