അഹമ്മദാബാദ്: ഗുജറാത്ത് നിയമസഭാ തെരഞ്ഞെടുപ്പിന് മുന്നോടിയായി പ്രധാനമന്ത്രി നരേന്ദ്ര മോദിക്ക് നേരെ രാവണൻ എന്ന പ്രയോഗവുമായി കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെ. ഗുജറാത്തികളോടുള്ള പ്രതിപക്ഷ പാർട്ടിയുടെ വിദ്വേഷമാണ് പരാമർശം പ്രതിഫലിപ്പിക്കുന്നതെന്ന് മുഖ്യമന്ത്രി ഭൂപേന്ദ്ര പട്ടേൽ ആരോപിച്ചു.
ബിജെപി ഭരിക്കുന്ന ഗുജറാത്തിൽ 182 അംഗ നിയമസഭയിലേക്കുള്ള തിരഞ്ഞെടുപ്പ് ഡിസംബർ 1, 5 തീയതികളിൽ രണ്ട് ഘട്ടങ്ങളിലായി നടക്കും. തെരഞ്ഞെടുപ്പിന് മുന്നോടിയായി ബിജെപി സ്ഥാനാർത്ഥികൾക്കായി പ്രധാനമന്ത്രി മോദി വിപുലമായ പ്രചാരണം നടത്തുന്നുണ്ട്.
തിങ്കളാഴ്ച രാത്രി അഹമ്മദാബാദ് നഗരത്തിലെ ബെഹ്‌റാംപുര ഏരിയയിൽ ഒരു റാലിയെ അഭിസംബോധന ചെയ്തുകൊണ്ട് ഖാർഗെ പറഞ്ഞു, എല്ലാ തെരഞ്ഞെടുപ്പുകളിലും “തന്റെ മുഖത്ത് നോക്കി” വോട്ട് ചെയ്യാൻ പ്രധാനമന്ത്രി ജനങ്ങളോട് ആവശ്യപ്പെടുന്നു. “താങ്കള്‍ രാവണനെപ്പോലെ 100 തലയുള്ളവനാണോ,” അദ്ദേഹം ചോദിച്ചു.
വികസന അജണ്ടയും ജനങ്ങളുടെ പിന്തുണയും ഇല്ലാതെ, കോൺഗ്രസ് ഗുജറാത്തിനെയും ഗുജറാത്തികളെയും അധിക്ഷേപിക്കാൻ ഒരുങ്ങുകയാണെന്ന് മുഖ്യമന്ത്രി ഭൂപേന്ദ്ര പട്ടേല്‍ തിരിച്ചടിച്ചു.
പ്രധാനമന്ത്രി നരേന്ദ്ര മോദിക്കെതിരെ ഖാർഗെ ജി നടത്തിയ പ്രസ്താവന ഗുജറാത്തികളോടുള്ള അവരുടെ വെറുപ്പിന്റെ തെളിവാണ്. അത്തരം പെരുമാറ്റത്തിന്റെ പേരിൽ ഗുജറാത്തിലെ ജനങ്ങൾ ഇത്തവണയും അവരെ തിരസ്‌കരിക്കുമെന്നും പട്ടേൽ കൂട്ടിച്ചേർത്തു.
കോൺഗ്രസ് കൈവശമുള്ള ഡാനിലിംഡ സീറ്റിന് കീഴിലുള്ള ബെഹ്‌റാംപുര പ്രദേശത്ത് ജനങ്ങളെ അഭിസംബോധന ചെയ്ത് ഖാർഗെ പറഞ്ഞു, എല്ലാ തിരഞ്ഞെടുപ്പുകളിലും പ്രാദേശിക സ്ഥാനാർത്ഥികൾക്കും സർക്കാരിന്റെ പ്രകടനത്തിനും പകരം മോദിയുടെ പേരിലാണ് വോട്ട് തേടുന്നത്.
“എല്ലാം അവഗണിച്ച് തന്റെ മുഖം കാണിച്ച് വോട്ട് ചെയ്യാൻ മോദി ജനങ്ങളോട് ആവശ്യപ്പെടുന്നു. ഏതെല്ലാം അവസരങ്ങളിൽ ഞങ്ങൾ നിങ്ങളുടെ മുഖം കാണണം? മുനിസിപ്പൽ കോർപ്പറേഷൻ തിരഞ്ഞെടുപ്പിലും നിയമസഭാ തിരഞ്ഞെടുപ്പിലും എംപിമാരെ തിരഞ്ഞെടുക്കാനുള്ള തിരഞ്ഞെടുപ്പിലും ജനങ്ങൾ മോദിയുടെ മുഖം കാണണം. ഞങ്ങൾ നിങ്ങളുടെ മുഖം കാണണമെന്ന് നിങ്ങൾ ആഗ്രഹിക്കുന്ന സമയത്തെല്ലാം നിങ്ങള്‍ കാണിക്കുന്നു. നിങ്ങൾക്ക് എത്ര മുഖങ്ങളുണ്ട്? നിങ്ങള്‍ രാവണനെപ്പോലെ 100 തലയുള്ളവനാണോ? എനിക്കത് മനസ്സിലാകുന്നില്ല,” കോൺഗ്രസ് അദ്ധ്യക്ഷൻ പറഞ്ഞു.
മോദിക്ക് വോട്ട് ചെയ്യാനാണ് ബിജെപി ജനങ്ങളോട് ആവശ്യപ്പെടുന്നതെന്നും ഖാര്‍ഗെ പറഞ്ഞു. “ഈ സീറ്റിലെ ഞങ്ങളുടെ സ്ഥാനാർത്ഥി ശൈലേഷ് പർമറാണെങ്കിൽ, അദ്ദേഹത്തിനെതിരെ നിങ്ങളുടെ സ്ഥാനാർത്ഥിക്ക് വേണ്ടി പ്രചാരണം നടത്തുകയും അദ്ദേഹത്തിന്റെ പേരിൽ വോട്ട് തേടുകയും ചെയ്യുക. പകരം മോദിക്ക് വോട്ട് ചെയ്യുക എന്നാണ് നിങ്ങള്‍ പറയുന്നത്. മുനിസിപ്പാലിറ്റിയുമായി ബന്ധപ്പെട്ട പ്രശ്നങ്ങൾ പരിഹരിക്കാൻ മോദി ഇവിടെ വരുമോ? ഖാർഗെ ചോദിച്ചു.
ഇന്ത്യയുടെ പ്രധാനമന്ത്രിയെന്ന നിലയിൽ തന്റെ ജോലി ചെയ്യുന്നതിനു പകരം, തദ്ദേശ സ്ഥാപനങ്ങളോ നിയമസഭാ തെരഞ്ഞെടുപ്പുകളോ ആകട്ടെ, വിവിധ തെരഞ്ഞെടുപ്പുകൾക്കായി മോദി ക്യാൻവാസ് ചെയ്യുന്നുവെന്നും മുതിർന്ന കോൺഗ്രസ് നേതാവ് പറഞ്ഞു.
27 വർഷം മുമ്പുള്ള ഗുജറാത്തിലും കേന്ദ്രത്തിലും ബിജെപി സർക്കാരിന്റെയും മുൻ കോൺഗ്രസ് സർക്കാരുകളുടെയും പ്രകടനത്തെക്കുറിച്ച് വോട്ട് തേടാൻ അദ്ദേഹം ബിജെപിയോട് ആവശ്യപ്പെട്ടു. “ബിജെപി വിശ്വസിക്കുന്നത് കള്ളം പറയുന്നതിൽ മാത്രമാണ്. കള്ളം പറയുന്നതിന് മോദി ‘ബാദ്ഷാ’ ആണെന്ന് ഞാൻ അടുത്തിടെ പറഞ്ഞിരുന്നു. കാരണം, അദ്ദേഹം കള്ളം പറഞ്ഞുകൊണ്ടേയിരിക്കുന്നു. പ്രതിവർഷം രണ്ട് കോടി തൊഴിലവസരങ്ങൾ നല്‍കുമെന്ന് പറഞ്ഞിട്ട് എന്തായി? വിദേശത്ത് നിന്ന് കള്ളപ്പണം കൊണ്ടുവന്നതിന് ശേഷം ഓരോ പൗരനും 15 ലക്ഷം രൂപ നൽകുമെന്ന് അദ്ദേഹം പണ്ട് പറയാറുണ്ടായിരുന്നു. ആ പണം കൊണ്ടുവന്നോ? ഓരോ പൗരന്മാരുടേയും ബാങ്ക് അക്കൗണ്ടിലേക്ക് അത് നിക്ഷേപിച്ചോ?” ഖാർഗെ ചോദിച്ചു.
കോൺഗ്രസ് ആദ്യം ആരംഭിച്ച പദ്ധതികൾ ഉദ്ഘാടനം ചെയ്യാൻ മോദിക്ക് താൽപ്പര്യമുണ്ടെന്ന് അദ്ദേഹം അവകാശപ്പെട്ടു. “അടുത്തിടെ, കേന്ദ്രം 75,000 ഒഴിവുകൾ നികത്തി. ആ സംഭവം ഞാൻ ടിവിയിൽ കണ്ടു. ആരാണ് ചടങ്ങിൽ സർട്ടിഫിക്കറ്റുകൾ വിതരണം ചെയ്തത്? ഈ രാജ്യത്തിന്റെ പ്രധാനമന്ത്രി തന്നെ. എന്തുകൊണ്ടാണ് അദ്ദേഹം ഒരു ഗുമസ്തന്റെയോ ഡെപ്യൂട്ടി സെക്രട്ടറിയുടെയോ ജോലി ചെയ്യുന്നത്? അപ്പോയിന്റ്മെന്റ് ഓർഡറുകൾ വിതരണം ചെയ്യാൻ പ്രധാനമന്ത്രിയുടെ ആവശ്യമുണ്ടോ?” അദ്ദേഹം പറഞ്ഞു.
30 ലക്ഷം ഒഴിവുകൾ നികത്താത്തത് എന്തുകൊണ്ടാണെന്ന് നിങ്ങൾ ആദ്യം രാജ്യത്തോട് പറയൂ? അവർ അത് ചെയ്യാത്തത് ആ 30 ലക്ഷത്തിൽ 16 ലക്ഷത്തോളം തൊഴിലവസരങ്ങൾ പാവപ്പെട്ടവർക്ക് ലഭിക്കുമെന്നതിനാലാണ്. പട്ടികജാതി, പട്ടികവർഗ, സാമ്പത്തികമായി പിന്നാക്കം നിൽക്കുന്ന ഉദ്യോഗാർത്ഥികൾക്ക് ജോലി ലഭിക്കാൻ അവർ ആഗ്രഹിക്കുന്നില്ല,” ഖാർഗെ അവകാശപ്പെട്ടു.
