ന്യൂഡൽഹി: ‘ഭീഷണിപ്പെടുത്തിയും വഞ്ചനയിലൂടെയും സമ്മാനങ്ങൾ വഴിയും സാമ്പത്തിക ആനുകൂല്യങ്ങളിലൂടെയും കബളിപ്പിച്ച് വ്യാജ മതപരിവർത്തനം നടത്തുന്നത് തടയാൻ കേന്ദ്രത്തിനും സംസ്ഥാനങ്ങൾക്കും നിർദേശം നൽകണമെന്ന് ആവശ്യപ്പെട്ട് സമർപ്പിച്ച ഹർജിയിൽ വാദം കേൾക്കുന്നത് സുപ്രീം കോടതി ജനുവരി 9-ലേക്ക് മാറ്റി.
വ്യാജ മതപരിവർത്തനം നിയന്ത്രിക്കാൻ കേന്ദ്രത്തിനും സംസ്ഥാനങ്ങൾക്കും നിർദേശം നൽകണമെന്ന് ആവശ്യപ്പെട്ട് ബിജെപി നേതാവും അഭിഭാഷകനുമായ അശ്വിനി കുമാർ ഉപാധ്യായ സമർപ്പിച്ച ഹർജി പരിഗണിക്കുകയായിരുന്നു കോടതി. സോളിസിറ്റർ ജനറൽ തുഷാർ മേത്ത ഹാജരാകാത്തതിനാലാണ് ജസ്റ്റിസുമാരായ എംആർ ഷാ, എസ് രവീന്ദ്ര ഭട്ട് എന്നിവരടങ്ങിയ ബെഞ്ച് കേസ് ജനുവരി 9ലേക്ക് മാറ്റിയത്.
ഹ്രസ്വമായ വിചാരണയ്ക്കിടെ, ഒരു കക്ഷിക്കുവേണ്ടി ഹാജരായ മുതിർന്ന അഭിഭാഷകൻ ദുഷ്യന്ത് ദവെ, മതങ്ങൾക്കെതിരെ വളരെ ഗുരുതരവും വിഷമകരവുമായ ചില ആരോപണങ്ങളുണ്ടെന്ന് പറഞ്ഞു. അതിനെ തുടർന്ന്, നിർബന്ധിത മതപരിവർത്തനത്തിനെതിരായ തന്റെ പൊതുതാൽപര്യ ഹർജിയിൽ ന്യൂനപക്ഷ സമുദായത്തിനെതിരെ നടത്തിയ “നിന്ദ്യമായ പ്രസ്താവനകൾ” നീക്കം ചെയ്യാൻ സുപ്രീം കോടതി അഭിഭാഷകനും ബിജെപി അംഗവുമായ അശ്വിനി ഉപാധ്യായയോട് ആവശ്യപ്പെട്ടു. മറ്റ് മതങ്ങൾക്കെതിരെയുള്ള പ്രസ്താവനകൾ അങ്ങേയറ്റം അരോചകമാണെന്നും ഉപാധ്യായയ്‌ക്കെതിരെ വിദ്വേഷ പ്രസംഗത്തിന് കേസെടുത്തിട്ടുണ്ടെന്നും ദവെ കോടതിയെ അറിയിച്ചു.
ഇത്തരം പ്രസ്താവനകൾ നീക്കം ചെയ്യുന്നുവെന്ന് ഉറപ്പാക്കാൻ ഉപാധ്യായയ്ക്കുവേണ്ടി ഹാജരായ മുതിർന്ന അഭിഭാഷകൻ അരവിന്ദ് ദത്തറിനോട് കോടതി ആവശ്യപ്പെട്ടു. ചില ക്രിസ്ത്യൻ സംഘടനകളും വിഷയത്തിൽ ഇടപെടാൻ ആഗ്രഹിക്കുന്നതായും വാദം കേൾക്കുന്നതിനിടെ കോടതിയെ അറിയിച്ചു.
ദാനധർമ്മത്തിന്റെ ഉദ്ദേശ്യം മതപരിവർത്തനമായിരിക്കരുതെന്ന് വാദിച്ചുകൊണ്ട്, നിർബന്ധിത മതപരിവർത്തനം “ഗുരുതരമായ” വിഷയമാണെന്നും ഭരണഘടനാ വിരുദ്ധമാണെന്നും സുപ്രീം കോടതി നേരത്തെ ആവർത്തിച്ച് വ്യക്തമാക്കിയിരുന്നു.
നിർബന്ധിത മതപരിവർത്തനം ദേശീയ സുരക്ഷയ്ക്ക് അപകടമുണ്ടാക്കുകയും പൗരന്മാരുടെ മതസ്വാതന്ത്ര്യത്തെ തടസ്സപ്പെടുത്തുകയും ചെയ്യും, “വളരെ ഗുരുതരമായ” പ്രശ്നം പരിഹരിക്കാൻ ആത്മാർത്ഥമായി ഇടപെടാൻ കേന്ദ്രത്തോട് ആവശ്യപ്പെട്ടതായി സുപ്രീം കോടതി അടുത്തിടെ പറഞ്ഞിരുന്നു. വഞ്ചനയിലൂടെയും വശീകരണത്തിലൂടെയും ഭീഷണിപ്പെടുത്തിയുമുള്ള മതംമാറ്റം അവസാനിപ്പിച്ചില്ലെങ്കിൽ വളരെ വിഷമകരമായ സാഹചര്യം ഉടലെടുക്കുമെന്ന് കോടതി മുന്നറിയിപ്പ് നൽകിയിരുന്നു.
നേരത്തെ, മതസ്വാതന്ത്ര്യത്തിൽ മറ്റുള്ളവരെ മതം മാറ്റാനുള്ള അവകാശം ഉൾപ്പെടുന്നില്ലെന്ന് ഗുജറാത്ത് സർക്കാർ സുപ്രീം കോടതിയെ അറിയിച്ചിരുന്നു. വിവാഹത്തിലൂടെ മതപരിവർത്തനത്തിന് ജില്ലാ മജിസ്‌ട്രേറ്റിന്റെ മുൻകൂർ അനുമതി നിർബന്ധമാക്കുന്ന സംസ്ഥാന നിയമത്തിന്റെ വ്യവസ്ഥയിൽ ഹൈക്കോടതി സ്റ്റേ നീക്കാൻ സുപ്രീം കോടതിയോട് അഭ്യർത്ഥിച്ചിരുന്നു. സെപ്തംബർ 23 ന് സുപ്രീം കോടതി ഈ ഹർജിയിൽ കേന്ദ്രസർക്കാരിൽ നിന്നും മറ്റുള്ളവരിൽ നിന്നും പ്രതികരണം തേടിയിരുന്നു.
നിർബന്ധിത മതപരിവർത്തനം രാജ്യവ്യാപകമായ പ്രശ്‌നമാണെന്നും അത് ഉടനടി പരിഹരിക്കണമെന്നും ഉപാധ്യായ തന്റെ ഹർജിയിൽ പറയുന്നു. “ഭയപ്പെടുത്തിയും ഭീഷണിപ്പെടുത്തിയും വഞ്ചിച്ചും സമ്മാനങ്ങൾ വഴിയും പണ ആനുകൂല്യങ്ങൾ വഴിയും മന്ത്രവാദം, അന്ധവിശ്വാസം, അത്ഭുതങ്ങൾ എന്നിവയിലൂടെയും മതപരിവർത്തനം നടക്കുന്ന സംഭവങ്ങൾ രാജ്യത്തുടനീളം എല്ലാ ആഴ്ചയും റിപ്പോർട്ട് ചെയ്യപ്പെടുന്നു. എന്നാൽ, ഈ വിപത്തിനെ തടയാൻ കേന്ദ്രവും സംസ്ഥാനങ്ങളും കർശനമായ നടപടികൾ സ്വീകരിച്ചിട്ടില്ല,” അഭിഭാഷകൻ അശ്വനി കുമാർ ദുബെ മുഖേന സമര്‍പ്പിച്ച ഹർജിയില്‍ പറയുന്നു.
