ന്യൂഡൽഹി: ഇന്ന് നിര്‍ഭയ കൂട്ട ബലാത്സംഗത്തിന്റെ പത്താം വാര്‍ഷികമായതിനാല്‍ ഇന്നത്തെ പാർലമെന്ററി ചർച്ചകൾ നിർത്തിവെച്ച് സ്ത്രീ സുരക്ഷയെക്കുറിച്ച് സംസാരിക്കണമെന്ന് ആവശ്യപ്പെട്ട് ഡൽഹി വനിതാ കമ്മീഷൻ മേധാവി സ്വാതി മലിവാൾ ലോക്‌സഭാ സ്പീക്കർ ഓം ബിർളയ്ക്കും രാജ്യസഭാ ചെയർമാൻ ജഗ്ദീപ് ധൻഖറിനും കത്തയച്ചു.
2012 ഡിസംബറിലാണ് നിര്‍ഭയ ബലാത്സംഗികളുടെ ഏറ്റവും ഭീകരമായ ക്രൂരതകൾക്ക് വിധേയയായത്. രാജ്യത്തുടനീളം അഭൂതപൂര്‍‌വ്വമായ പ്രതിഷേധത്തിന് സാക്ഷ്യം വഹിച്ച ഈ സംഭവം രാജ്യത്തിന്റെ മനഃസാക്ഷിയെ പിടിച്ചുകുലുക്കി, ആത്യന്തികമായി നിരവധി നിയമ പരിഷ്കാരങ്ങളിലേക്ക് നയിച്ചു.
എന്നാല്‍, ദാരുണമായ സംഭവം നടന്നിട്ട് 10 വർഷം പിന്നിട്ടിരിക്കുന്നു, രാജ്യത്ത് സ്ത്രീകൾക്കും പെൺകുട്ടികൾക്കും എതിരായ കുറ്റകൃത്യങ്ങൾ വർദ്ധിച്ചുകൊണ്ടിരിക്കുകയാണ്. രാജ്യതലസ്ഥാനത്ത് തന്നെ ദിവസവും ആറ് ബലാത്സംഗങ്ങളാണ് റിപ്പോർട്ട് ചെയ്തത്. ഡൽഹിയിൽ എട്ട് മാസം പ്രായമുള്ള കുഞ്ഞിനെയും 90 വയസ്സുള്ള സ്ത്രീയെയും ബലാത്സംഗം ചെയ്തു.
രണ്ട് ദിവസം മുമ്പ് ഡൽഹിയിലെ ദ്വാരകയിലുള്ള സ്‌കൂളിലേക്ക് പോകുകയായിരുന്ന 17-കാരിക്കു നേരെ ബൈക്കിലെത്തിയ രണ്ട് യുവാക്കൾ ആസിഡ് ഒഴിച്ചു. ഗുരുതരമായി പൊള്ളലേറ്റ പെണ്‍കുട്ടി ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. സമാനമായ ഭയാനകമായ കേസുകൾ രാജ്യത്തിന്റെ എല്ലാ ഭാഗങ്ങളിൽ നിന്നും റിപ്പോർട്ട് ചെയ്യപ്പെടുന്നു.
സ്ത്രീകൾക്കും പെൺകുട്ടികൾക്കുമെതിരായ വർധിച്ചുവരുന്ന കുറ്റകൃത്യങ്ങളുടെ പ്രശ്നം ഒരു പകർച്ചവ്യാധിയുടെ അനുപാതത്തിലെത്തി, അതിനെ പ്രതിരോധിക്കാൻ കൃത്യമായ നടപടികൾ സ്വീകരിക്കുന്നതിൽ സർക്കാരുകൾ പരാജയപ്പെടുന്നു. സ്ത്രീകൾക്കും പെൺകുട്ടികൾക്കും ആശ്വാസവും പുനരധിവാസവും നൽകുന്നതിനായി രൂപീകരിച്ച നിർഭയ ഫണ്ട് പോലും ഗണ്യമായി കുറച്ചു. സ്ത്രീകൾക്കും പെൺകുട്ടികൾക്കുമെതിരായ കുറ്റകൃത്യങ്ങൾക്കെതിരെ ജനങ്ങളുടെ മനസ്സിൽ പ്രതിബന്ധം സൃഷ്ടിക്കുന്നതിൽ സർക്കാരുകൾ പരാജയപ്പെട്ടു.
