ഷാർജ: വാഹന രജിസ്ട്രേഷനുള്ള ഇ-സിഗ്നേച്ചർ സേവനം ഷാർജയിൽ ആരംഭിച്ചു. വാഹന ഉപഭോക്താക്കൾക്ക് മികച്ച സേവനങ്ങൾ നൽകുന്നതിനായി ഷാർജ പോലീസിന്റെ കീഴിലുള്ള വാഹന രജിസ്ട്രേഷൻ വകുപ്പിന്റെ ഭാഗമാണിത്.
എല്ലാ അഡ്മിനിസ്ട്രേറ്റീവ് സേവനങ്ങളും ഗുണനിലവാരം, കാര്യക്ഷമത, സുതാര്യത എന്നീ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കാൻ ലക്ഷ്യമിട്ടുള്ള ആഭ്യന്തര മന്ത്രാലയത്തിന്റെ പ്രവർത്തനങ്ങളുടെ ഭാഗമാണിതെന്ന് ഉദ്യോഗസ്ഥർ പറഞ്ഞു. ആഭ്യന്തര മന്ത്രാലയത്തിന്റെ വെബ്‌സൈറ്റിൽ വാഹന ഉടമകൾക്ക് ഇലക്ട്രോണിക് സൈൻ ചെയ്യാനുള്ള സംവിധാനം ഈ സേവനത്തിലുണ്ടെന്ന് ഷാർജ പോലീസ് വെഹിക്കിൾ രജിസ്ട്രേഷൻ ഡിപ്പാർട്ട്‌മെന്റ് മേധാവി ലെഫ്റ്റനന്റ് കേണൽ അബ്ദുൾ റഹ്മാൻ ഖാതർ പറഞ്ഞു.
എങ്ങനെ രജിസ്റ്റർ ചെയ്യാം?
ആദ്യം, ആഭ്യന്തര മന്ത്രാലയത്തിന്റെ വെബ്സൈറ്റ് സന്ദർശിക്കുക. തുടർന്ന് ട്രാഫിക് സേവനങ്ങൾ തിരഞ്ഞെടുത്ത് കരാർ ഒപ്പിടുക. തുടർന്ന് ഡിജിറ്റൽ ഐഡന്റിറ്റി സജീവമാക്കി സേവനങ്ങൾ നേടുക. വാഹന ഉടമാവകാശം, കയറ്റുമതി, രജിസ്ട്രേഷൻ, കൈമാറ്റം എന്നിവയുമായി ബന്ധപ്പെട്ട ഇടപാടുകൾ സേവന കേന്ദ്രം സന്ദർശിക്കാതെ തന്നെ ഇ-സിഗ്നേച്ചർ സുഗമമാക്കുന്നു.
കമ്പനി വാഹനങ്ങളുടെ രജിസ്ട്രേഷൻ
കമ്പനി വാഹനങ്ങളുടെ രജിസ്ട്രേഷൻ, പുതുക്കൽ, ഉടമസ്ഥാവകാശ കൈമാറ്റം എന്നിവയിൽ തങ്ങളുടെ ചുമതലകൾ നിർവഹിക്കാൻ കമ്പനിയിലെ ഒരു അംഗത്തെ അനുവദിക്കുന്നതിനായി കമ്പനിയിൽ നിന്ന് ഒരു പ്രതിനിധി കത്ത് നൽകിയാൽ കമ്പനികൾക്കും സേവനം ഉപയോഗിക്കാൻ അർഹതയുണ്ടെന്ന് ഖാതർ പറഞ്ഞു. ഹെവി വെഹിക്കിൾസ് ടെസ്റ്റിംഗ് സെന്റർ (തസ്ജിൽ) – ഇൻഡസ്ട്രിയൽ ഏരിയ നമ്പര്‍ 12, റെഡ് പാച്ച് പോലീസ് ഓഫീസ് (കാർ ഷോറൂമുകൾ), അൽ ദെയ്ദ് വെഹിക്കിൾ രജിസ്ട്രേഷൻ ഡിപ്പാർട്ട്‌മെന്റ്, കൽബ പോലീസ് സ്റ്റേഷൻ എന്നിവിടങ്ങളിലേതെങ്കിലുമൊന്നില്‍ പ്രതിനിധികൾ സന്ദർശിച്ച് ഒപ്പിടണം.
