ന്യൂഡെൽഹി: യുണൈറ്റഡ് സ്റ്റേറ്റ്സ് കൊമേഴ്‌സ് സെക്രട്ടറി ജിന റൈമോണ്ടോ നാല് ദിവസത്തെ ഇന്ത്യാ സന്ദർശനത്തിനായി മാർച്ച് 7 ന് ന്യൂഡൽഹിയിലെത്തി. അവർ യുഎസ്-ഇന്ത്യ കൊമേഴ്സ്യൽ ഡയലോഗിലും സിഇഒ ഫോറത്തിലും പങ്കെടുക്കും.
ഇരു രാജ്യങ്ങൾക്കുമിടയിൽ “പുതിയ വ്യാപാര, നിക്ഷേപ അവസരങ്ങൾ തുറക്കുക” എന്നതാണ് റെയ്‌മോണ്ടോയുടെ സന്ദർശനത്തിന്റെ ലക്ഷ്യമെന്ന് യുഎസ് വാണിജ്യ വകുപ്പ് പ്രസ്താവനയിൽ പറഞ്ഞു. മാർച്ച് 10 വരെ അവർ ഇന്ത്യയിലുണ്ടാകും. സന്ദർശന വേളയിൽ അവർ പൊതു-സ്വകാര്യ മേഖലയിലെ വ്യവസായ പ്രമുഖരുമായി കൂടിക്കാഴ്ച നടത്തും.
“ഇത് യുഎസ്-ഇന്ത്യ ബന്ധത്തിന് ശുഭാപ്തിവിശ്വാസമുള്ള സമയമാണ്, വർഷത്തിലെ അത്തരമൊരു പ്രത്യേക സമയത്ത്, ഹോളി ആഘോഷത്തിൽ ഇന്ത്യ സന്ദർശിക്കുന്നതിൽ ഞാൻ ആവേശഭരിതയാണ്,” ജിന പ്രസ്താവനയിൽ പറഞ്ഞു.
യുഎസ്-ഇന്ത്യ ബന്ധത്തിന് പ്രസിഡന്റ് ജോ ബൈഡന്റെ സർക്കാർ നൽകുന്ന പ്രാധാന്യം അവർ അറിയിക്കുമെന്നും ഇരുരാജ്യങ്ങളും തമ്മിലുള്ള വാണിജ്യ ബന്ധം കൂടുതൽ ആഴത്തിലാക്കാനുള്ള സുപ്രധാന അവസരത്തിന് ഊന്നൽ നൽകുമെന്നും ഡിപ്പാർട്ട്‌മെന്റ് പ്രസ്താവനയിൽ പറയുന്നു.
കഴിഞ്ഞ മാസം ന്യൂഡൽഹിയിൽ നടന്ന ഇന്തോ-പസഫിക് സാമ്പത്തിക ചട്ടക്കൂടിനായുള്ള പ്രത്യേക ചർച്ചയ്ക്ക് ശേഷമാണ് ജിന റൈമോണ്ടോയുടെ സന്ദർശനം. യുഎസ്-ഇന്ത്യ കൊമേഴ്സ്യൽ ഡയലോഗ് ആൻഡ് സിഇഒ ഫോറം 2023 മാർച്ച് 10 ന് നടക്കും, അവിടെ ഇരു രാജ്യങ്ങളും തമ്മിലുള്ള പുതിയ വ്യാപാര, നിക്ഷേപ അവസരങ്ങൾ തുറക്കാൻ കഴിയുന്ന വിവിധ മേഖലകളിലെ സഹകരണത്തെക്കുറിച്ചുള്ള ചർച്ചകൾ നടക്കും.
കേന്ദ്ര വാണിജ്യ മന്ത്രി പിയൂഷ് ഗോയലിന്റെ ക്ഷണപ്രകാരമാണ് റെയ്മണ്ടോ ഇന്ത്യയിലെത്തുന്നത് എന്നത് ശ്രദ്ധേയമാണ്.
