മിനി സ്‌ക്രീൻ മുതൽ ബിഗ് സ്‌ക്രീൻ വരെ മലയാളികൾക്ക് സുപരിചിതയായ നടിയാണ് ശ്രുതി രജനികാന്ത്. ഇപ്പോഴിതാ താൻ വിഷാദരോഗത്തിലൂടെ കടന്നു പോവുകയാണെന്ന് വെളിപ്പെടുത്തിയിരിക്കുകയാണ് നടി. ഹൃദ്യമായി ചിരിച്ചിട്ട് ഇപ്പോൾ ഏഴാഴ്ചയായെന്ന് ശ്രുതി പറയുന്നു. ജീവിതത്തിൽ ഒന്നും ചെയ്യാനോ ജോലി ചെയ്യാനോ തനിക്ക് കഴിയുന്നില്ലെന്നും ആ സമയങ്ങളിൽ തന്റെ മനസ്സിൽ നെഗറ്റീവ് ചിന്തകൾ നിറയുമെന്നും നടി പറയുന്നു. നേരത്തെ ജോഷ് ടോക്കിൽ ശ്രുതി തന്റെ വിഷാദത്തെ അതിജീവിച്ചതിനെക്കുറിച്ച് പറഞ്ഞിരുന്നു. ശ്രുതിയുടെ പുതിയ വീഡിയോ അത് കൂടുതൽ വ്യക്തമാക്കുന്നു.
എനിക്ക് ഉറങ്ങാൻ പോലും കഴിയുന്നില്ല, ഇത് എങ്ങനെ വിശദീകരിക്കണമെന്ന് എനിക്കറിയില്ല. ചില ആളുകൾക്ക് നമ്മുടെ സാഹചര്യം എന്താണെന്ന് അറിയില്ല, അവർക്ക് മനസ്സിലാകണമെന്നില്ല. ജോലി കഴിഞ്ഞ് കണ്ണടച്ചാലും ഉറങ്ങില്ല. എല്ലാം ഇങ്ങിനെ ചിന്തിച്ചു. ഞാൻ ആദ്യം ഒരുപാട് കരയുമായിരുന്നു. എനിക്കിപ്പോൾ കരയാൻ പോലും വയ്യ. ഞാൻ മാത്രമല്ല ഇത് അനുഭവിക്കുന്നത്. എന്റെ തലമുറയിൽ പലരും ഇത് അനുഭവിക്കുന്നുണ്ട്. ഒരു ദിവസം ഒരാൾക്ക് വിഷാദരോഗം ഉണ്ടോ എന്ന് ചോദിച്ച് ഇൻസ്റ്റാഗ്രാമിൽ ഒരു കഥ വന്നിരുന്നു. അതിന്റെ പ്രതികരണം കൊണ്ട് ഇൻസ്റ്റഗ്രാം നിറഞ്ഞു കവിഞ്ഞിരുന്നു എന്ന് തന്നെ പറയാം.
