തിരുവനന്തപുരം: ദേവസ്വം ബോര്‍ഡിന്റെ കീഴിലുള്ള ആരാധനാലയങ്ങളിൽ ആർഎസ്എസ് ശാഖകളോ കൂട്ട അഭ്യാസങ്ങളോ നിരോധിച്ചുകൊണ്ടുള്ള മുൻ ഉത്തരവ് കർശനമായി പാലിക്കണമെന്ന് കേരളത്തിലെ ക്ഷേത്രങ്ങൾ കൈകാര്യം ചെയ്യുന്ന തിരുവിതാംകൂർ ദേവസ്വം ബോർഡ് (ടിഡിബി) പുതിയ സർക്കുലർ പുറപ്പെടുവിച്ചു. നിയമം കര്‍ശനമായി നടപ്പിലാക്കണമെന്ന് അതിന്റെ ഉദ്യോഗസ്ഥരോട് ആവശ്യപ്പെട്ടു.
ക്ഷേത്ര സ്വത്തുക്കൾ ആയുധ പരിശീലനത്തിനായി ഉപയോഗിക്കുന്നതിൽ നിന്ന് സംഘപരിവാർ സംഘടനയെ തടയാൻ ഉദ്യോഗസ്ഥരോട് നിർദ്ദേശിച്ച 2021 ലെ ഉത്തരവ് നടപ്പാക്കപ്പെടുന്നില്ലെന്ന് മെയ് 18 ന് പുറത്തിറക്കിയ സർക്കുലറിൽ ടിഡിബി പറഞ്ഞു.
ടിഡിബിയുടെ ഉത്തരവ് പാലിക്കാൻ വിസമ്മതിക്കുന്ന ഉദ്യോഗസ്ഥർക്കെതിരെ കർശന നടപടി സ്വീകരിക്കുമെന്നും അറിയിച്ചു.
ക്ഷേത്ര സമുച്ചയങ്ങളിൽ ആർഎസ്എസ് നടത്തുന്ന എല്ലാത്തരം ആയുധ പരിശീലനങ്ങളും നിരോധിച്ചുകൊണ്ട് 2016ൽ ടിഡിബി സർക്കുലർ പുറപ്പെടുവിച്ചിരുന്നു. പിന്നീട്, 2021 മാർച്ച് 30 ന്, ഇക്കാര്യത്തിൽ നടപടിയെടുക്കാൻ ഉദ്യോഗസ്ഥരോട് ആവശ്യപ്പെട്ട് ബോർഡ് സർക്കുലർ വീണ്ടും പുറത്തിറക്കി.
ക്ഷേത്രപരിസരത്ത് ആർഎസ്എസ് ശാഖകളുടെ പ്രവർത്തനം അനുവദിക്കുന്നില്ലെന്ന് ഉറപ്പാക്കാനാണ് ഇത്തവണ സർക്കുലർ വീണ്ടും ഇറക്കിയതെന്ന് ടിഡിബിയിലെ മുതിർന്ന ഉദ്യോഗസ്ഥൻ പറഞ്ഞു.
2016ൽ അന്നത്തെ ദേവസ്വം മന്ത്രി കടകംപള്ളി സുരേന്ദ്രൻ കേരളത്തിലെ ക്ഷേത്രങ്ങളെ ആയുധപ്പുരയാക്കാൻ ആർഎസ്എസ് ശ്രമിക്കുന്നുവെന്നും സർക്കാരിന് ഇതുമായി ബന്ധപ്പെട്ട് വൻ പരാതികൾ ലഭിക്കുന്നുണ്ടെന്നും ആരോപിച്ചിരുന്നു.
