കഴിഞ്ഞ വർഷം ദക്ഷിണ കന്നഡ ജില്ലയിൽ വർഗീയ കലാപത്തിൽ കൊല്ലപ്പെട്ട നാല് പേരുടെ കുടുംബങ്ങൾക്ക് കർണാടക സര്‍ക്കാര്‍ വെള്ളിയാഴ്ച 25 ലക്ഷം രൂപ വീതം ധനസഹായം പ്രഖ്യാപിച്ചു.
ദീപക് റാവു, മുഹമ്മദ് ഫാസിൽ, മുഹമ്മദ് മഷൂദ്, അബ്ദുൾ ജലീൽ എന്നിവരുടെ കുടുംബങ്ങൾക്കാണ് നഷ്ടപരിഹാരം പ്രഖ്യാപിച്ചത്. അടുത്തിടെ സമാപിച്ച നിയമസഭാ തെരഞ്ഞെടുപ്പിൽ കോൺഗ്രസിനോട് പരാജയപ്പെട്ട ബസവരാജ് ബൊമ്മൈയുടെ നേതൃത്വത്തിലുള്ള ബിജെപി സർക്കാരിന്റെ കാലത്ത് നടന്ന വർഗീയ കലാപങ്ങളിലാണ് അവർ കൊല്ലപ്പെട്ടത്.
എല്ലാവർക്കും നീതി, എല്ലാവർക്കും സമത്വം എന്ന തത്വവുമായി നയിക്കുന്ന ഞങ്ങളുടെ സർക്കാരിൽ വിവേചനത്തിന് ഇടമില്ലെന്ന് കർണാടക കോൺഗ്രസ് ശനിയാഴ്ച ട്വീറ്റ് ചെയ്തു. ബിജെപി ഭരണകാലത്ത് വർഗീയ കലാപത്തിന് ഇരയായ മസൂദ്, ഫാസിൽ, ജലീൽ, ദീപക് റാവു എന്നിവരുടെ കുടുംബങ്ങൾക്ക് മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് 25 ലക്ഷം രൂപ വീതം അനുവദിച്ചു. മുഖ്യമന്ത്രി സിദ്ധരാമയ്യയാണ് ഇക്കാര്യം അറിയിച്ചത് . കർണാടകയിൽ ഒരു കാരണവശാലും വർഗീയ കലാപങ്ങളും പ്രകോപനങ്ങളും വെച്ചുപൊറുപ്പിക്കില്ലെന്നും അദ്ദേഹം പറഞ്ഞു.
വർഗീയ കലാപത്തിന് ഇരയായ കുടുംബാംഗങ്ങൾക്ക് നഷ്ടപരിഹാരം നൽകണമെന്ന് ദക്ഷിണ കന്നഡ കോൺഗ്രസിന്റെ ന്യൂനപക്ഷ സെൽ ആവശ്യപ്പെട്ടതിനെ തുടർന്നാണ് നടപടി. കൊല്ലപ്പെട്ട ബിജെപി യുവമോർച്ച നേതാവ് പ്രവീൺ നെട്ടരുവിന്റെ കുടുംബത്തിന് മുൻ സർക്കാർ വിവേചനരഹിതമായി നഷ്ടപരിഹാരം നൽകിയെന്നും മുസ്ലീം കുടുംബങ്ങളെ അവഗണിച്ചെന്നും ന്യൂനപക്ഷ സെൽ ആരോപിച്ചു.
ദീപക് റാവു
ഒരു മൊബൈൽ ഔട്ട്‌ലെറ്റിൽ ജോലി ചെയ്തിരുന്ന 30 വയസ്സുകാരനാണ് ദീപക് റാവു. 2018 ജനുവരി മൂന്നിന് സൂറത്ത്കലിൽ വെച്ച് അജ്ഞാതർ ഇയാളെ വെട്ടിക്കൊലപ്പെടുത്തി. 2018ലെ കർണാടക നിയമസഭാ തിരഞ്ഞെടുപ്പിന്റെ പ്രചാരണത്തിനിടെ കേന്ദ്ര ആഭ്യന്തരമന്ത്രി അമിത് ഷാ റാവുവിന്റെ കുടുംബത്തെ സന്ദർശിച്ചിരുന്നു. എന്നാൽ, അന്ന് നഷ്ടപരിഹാരം പ്രഖ്യാപിച്ചിരുന്നില്ല.
മുഹമ്മദ് മഷൂദ്
ജൂലൈ 19 ന് ഒരു സംഘം ബജ്‌റംഗ് ദൾ അംഗങ്ങൾ തലയിൽ സോഡാ കുപ്പി കൊണ്ട് ആക്രമിച്ച 19 കാരനായ കൗമാരക്കാരനായിരുന്നു മുഹമ്മദ് മഷൂദ്. ജൂലൈ 21 ന് അദ്ദേഹം മരണത്തിന് കീഴടങ്ങി.
മുഹമ്മദ് ഫാസിൽ
ജൂലായ് 27ന് ബെള്ളാരെയിൽ ബൈക്കിലെത്തിയ അജ്ഞാതർ ബിജെവൈഎം നേതാവ് പ്രവീൺ നെട്ടാറുവിനെ വെട്ടിക്കൊലപ്പെടുത്തിയിരുന്നു. ആശുപത്രിയിൽ എത്തിച്ചപ്പോഴേക്കും 32കാരൻ മരിച്ചിരുന്നു. തൊട്ടടുത്ത ദിവസം കർണാടകയിലെ മംഗളൂരു ജില്ലയിലെ ഒരു വസ്ത്രക്കടയ്ക്ക് മുന്നിൽ മുഹമ്മദ് ഫാസിൽ കൊല്ലപ്പെട്ടു. ഫാസിലിന്റെ കൊലപാതകത്തിൽ ഏഴുപേരെ പ്രതികളാക്കി. പോലീസ് അന്വേഷണമനുസരിച്ച്, അവർ “ആരെയെങ്കിലും കൊല്ലാൻ ആഗ്രഹിച്ചു” എന്നും, മൂന്ന് ദിവസത്തേക്ക് പ്രതിദിനം 5000 രൂപയ്ക്ക് കാർ വാടകയ്ക്ക് എടുത്തു എന്നും കണ്ടെത്തി.
അബ്ദുൾ ജലീൽ
2022 ഡിസംബർ 24 ന് സൂറത്കലിൽ വെച്ച് 45 കാരനായ കടയുടമ അബ്ദുൾ ജലീൽ കുത്തേറ്റു മരിച്ചു. കേസുമായി ബന്ധപ്പെട്ട് ഒരു സ്ത്രീ ഉൾപ്പെടെ അഞ്ച് പേരെ കസ്റ്റഡിയിലെടുത്തു.
