കോഴിക്കോട്: കെ.പി.സി.സി പ്രസിഡന്റ്‌ കെ.സുധാകരന്റെ മുന്‍ ഡ്രൈവര്‍ നല്‍കിയ അഴിമതിയും ഫണ്ട് തിരിമറിയും സംബന്ധിച്ച പരാതിയില്‍ വിജിലന്‍സ്‌ അന്വേഷണം ഊര്‍ജിതമാക്കി. സുധാകരന്റെ മുന്‍ ഡ്രൈവറും അടുത്ത കൂട്ടാളിയുമായ പ്രശാന്ത്‌ മാറോളി 2021ല്‍ നല്‍കിയ പരാതിയിലാണ്‌ കോഴിക്കോട് വിജിലന്‍സ്‌ സെല്‍ അന്വേഷണം ആരംഭിച്ചത്‌.
കണ്ണൂരിലെ ചിറക്കല്‍ രാജാസ്‌ ഹൈസ്കൂള്‍ ഏറ്റെടുക്കാന്‍ വിദേശത്ത്‌ നിന്ന്‌ പിരിച്ചെടുത്ത 16 കോടി രൂപ സുധാകരനും സഹപ്രവര്‍ത്തകരും ചേര്‍ന്ന്‌ തട്ടിയെടുത്തെന്നാണ്‌ പ്രധാന പരാതി. സുധാകരന്റെ സാമ്പത്തിക സ്രോതസ്സും വിജിലന്‍സ്‌ അന്വേഷിക്കുന്നുണ്ട്‌. ഇതിന്റെ ആദ്യപടിയായി സുധാകരന്റെ ഭാര്യ സ്മിതയുടെ ശമ്പള വിവരം ആവശ്യപ്പെട്ട് കണ്ണൂര്‍ കടച്ചിറ ഹൈസ്കൂള്‍ പ്രധാന അദ്ധ്യാപികക്ക്‌ വിജിലന്‍സ്‌ നോട്ടീസ്‌ അയച്ചു. കേസിന്റെ വിശദാംശങ്ങള്‍ കൈമാറാന്‍ ചൊവ്വാഴ്ച രാവിലെ 11 മണിക്ക്‌ കോഴിക്കോട് വിജിലന്‍സ്‌ ഓഫീസില്‍ ഹാജരാകാന്‍ പ്രശാന്തിനോട്‌ ആവശ്യപ്പെട്ടിട്ടുണ്ട്‌.
സ്കൂളിനായി പിരിച്ചെടുത്ത തുകയ്ക്ക്‌ പുറമെ, സുധാകരന്‍ കണ്ണൂര്‍ ഡിസിസി പ്രസിഡന്റായിരുന്ന കാലം മുതല്‍ മന്ത്രിയാകുന്നതുവരെ വാങ്ങിയ വീടുകള്‍, ജില്ലകള്‍, മരുമകന്റെ സ്വത്ത്‌ വിവരങ്ങള്‍, ബിനാമികളുടെ പേരില്‍ വാങ്ങിയ ആഡംബര കാറുകള്‍ എന്നിവയുടെ ഉറവിടം അന്വേഷിക്കണമെന്നും പ്രശാന്ത്‌ ആവശ്യപ്പെട്ടു.
സുധാകരന്റെ ഭാര്യയുടെ സ്വത്ത്‌ വിവരങ്ങള്‍ക്ക്‌ പുറമെ അദ്ദേഹത്തിന്റെ വരുമാനവും കണക്കുകളും പരിശോധിക്കുമെന്ന്‌ വിജിലന്‍സ്‌ അറിയിച്ചു. സുധാകരന്റെ വരുമാനവും 15 വര്‍ഷമായി സമ്പാദിച്ച സ്വത്തുക്കളും പരിശോധിക്കും. ഇതൊരു പുതിയ അന്വേഷണമല്ലെന്നും 2021ല്‍ തുടങ്ങിയതാണെന്നും വിജിലന്‍സ്‌ സ്പെഷ്യല്‍ സെല്‍ അറിയിച്ചു. സ്പെഷ്യല്‍ അസിസ്റ്റന്റ്‌ കമ്മിഷണര്‍ അബ്ദുള്‍ റസാഖിന്റെ നേതൃത്വത്തിലാണ്‌ അന്വേഷണം.
സ്കൂള് ഏറ്റെടുക്കാന്‍ 16 കോടി
ചിറക്കല്‍ രാജാസ്‌ ഹൈസ്കൂള്‍ ഏറ്റെടുക്കാന്‍ വിദേശത്ത്‌ നിന്ന്‌ പിരിച്ചെടുത്ത 16 കോടി രൂപ സുധാകരനും കൂട്ടാളികളും ചേര്‍ന്ന്‌ തട്ടിയെടുത്തെന്ന്‌ സുധാകരനെതിരെ പരാതി നല്‍കിയ പ്രശാന്ത്‌ മാറോളി പറഞ്ഞു.
“ഇത്‌ കെ കരുണാകരന്‍ പഠിച്ച സ്കൂളാണ്‌. ജീര്‍ണിച്ച സ്കൂള് രാജകുടുംബത്തില്‍ നിന്ന്‌ ഏറ്റെടുക്കാന്‍ പാര്‍ട്ടി കെ കരുണാകരന്‍ മെമ്മോറിയല്‍ ട്രസ്റ്റ് രൂപീകരിച്ചു. കരുണാകരന്റെ പേര്‌ കേട്ട കേരളത്തിനകത്തും പുറത്തുമായി നിരവധി പേരാണ്‌ സഹായവുമായി എത്തിയത്‌. അങ്ങനെ ഏകദേശം 32 കോടിയോളം പിരിച്ചെടുത്തതില്‍ ഗള്‍ഫില്‍ നിന്ന്‌ മാത്രം 19 കോടിയാണ്. എന്നാല്‍, ട്രസ്റ്റില്‍ എത്തിയത്‌ 16 കോടി മാത്രം.
കരുണാകരന്‍ മെമ്മോറിയല്‍ ട്രസ്റ്റിനു പകരം സുധാകരനും ചില ബന്ധുക്കളും കൂട്ടാളികളും അടങ്ങുന്ന പുതിയ ട്രസ്റ്റ് നിലവില്‍ വന്നു. എഡ്യൂപാര്‍ക്ക്‌ സൊസൈറ്റി എന്നാണ്‌ പേര്‌. എഡ്യൂപാര്‍ക്ക്‌ സൊസൈറ്റിയുടെ പേരില്‍ സ്കൂള് ഏറ്റെടുക്കാന്‍ പോയപ്പോള്‍ വീട്ടുകാര്‍ സമ്മതിച്ചില്ല. പിന്നീട് സ്കൂള് സി.പി.എം നിയന്ത്രണത്തിലുള്ള ബാങ്ക് ഏറ്റെടുത്തു.1987 മുതല്‍ 1993 വരെ സുധാകരനൊപ്പം ഞാന്‍ ഉണ്ടായിരുന്നു. അദ്ദേഹത്തിന്റെ ഓഫീസ്‌ സെക്രട്ടറിയായും ഞാന്‍ സേവനമനുഷ്ഠിച്ചിട്ടുണ്ട്‌, ഡ്രൈവര്‍ പ്രശാന്ത്‌ മാറോളി പറഞ്ഞു.
