ചെന്നൈ: ഏകീകൃത സിവില്‍ കോഡ്‌ നടപ്പാക്കാന്‍ ശ്രമിക്കുന്ന പ്രധാനമന്ത്രി നരേന്ദ്ര മോദിക്കെതിരെ ആഞ്ഞടിച്ച് ഡിഎംകെ അദ്ധ്യക്ഷനും തമിഴ്നാട് മുഖ്യമന്ത്രിയുമായ എംകെ സ്റ്റാലിന്‍. യുസിസിയെക്കുറിച്ചുള്ള മോദിയുടെ പരാമര്‍ശങ്ങളെ വിമര്‍ശിച്ച്, ക്രമസമാധാന നില പൂര്‍ണ്ണമായും തകര്‍ക്കാനും’ മതപരമായ അക്രമം’ സൃഷ്ടിക്കാനും അദ്ദേഹം ശ്രമിച്ചുവെന്ന്‌ സ്റ്റാലിന്‍ കുറ്റപ്പെടുത്തി.
“ഒരു രാജ്യത്ത്‌ രണ്ട്‌ തരത്തിലുള്ള നിയമങ്ങള്‍ പാടില്ലെന്നാണ്‌ നമ്മുടെ മോദി പറയുന്നത്‌.” 2024ലെ ലോക്സഭാ തെരഞ്ഞെടുപ്പില്‍ വര്‍ഗീയ വികാരം വളര്‍ത്തി രാജ്യത്ത്‌ ആശയക്കുഴപ്പം സൃഷ്ടിച്ച്‌ വിജയിക്കാനാണ്‌ പ്രധാനമന്ത്രി ആലോചിക്കുന്നതെന്ന്‌ ഡിഎംകെ അധ്യക്ഷന്‍ ആരോപിച്ചു. “ഞാന്‍ നിങ്ങളോട്‌ വ്യക്തമായി പറയുന്നു, വരാനിരിക്കുന്ന ലോക്സഭാ തെരഞ്ഞെടുപ്പില്‍ ബിജെപിയെ ഉചിതമായ പാഠം പഠിപ്പിക്കാന്‍ ആളുകള്‍ തയ്യാറാണ്‌; നിങ്ങള്‍ തയ്യാറാകുകയും നിശ്ചയദാര്‍ഡ്യമുള്ളവരായിരിക്കുകയും വേണം ബിജെപിയെ പരാജയപ്പെടുത്താന്‍,” അദ്ദേഹം പറഞ്ഞു.
ലോക്സഭാ തെരഞ്ഞെടുപ്പില്‍ ബിജെപിയെ പരാജയപ്പെടുത്താന്‍ അടുത്തിടെ പട്‌നയില്‍ നടന്ന പ്രതിപക്ഷ നേതാക്കളുടെ യോഗം മോദിയെ ഭയപ്പെടുത്തിയിരുന്നു. ബിജെപി ഭരിക്കുന്ന മണിപ്പൂരില്‍ മോദി സന്ദര്‍ശനം നടത്താത്തതില്‍ സ്റ്റാലിന്‍ ആഞ്ഞടിച്ചു. “മണിപ്പൂര്‍ കഴിഞ്ഞ 50 ദിവസമായി കത്തിക്കൊണ്ടിരിക്കുകയാണ്‌, ഇതുവരെ 150 പേര്‍ കൊല്ലപ്പെട്ടു. ആയിരങ്ങള്‍ സംസ്ഥാനത്ത്‌ നിന്ന് പലായനം ചെയ്തു. ഇതുവരെ പ്രധാനമന്ത്രി സംസ്ഥാനം സന്ദര്‍ശിച്ചിട്ടില്ല. 50 ദിവസത്തിന്‌ ശേഷമാണ്‌ അമിത്‌ ഷാ സര്‍വ കക്ഷിയോഗം നടത്തിയത്‌,” അദ്ദേഹം പറഞ്ഞു. പറഞ്ഞു. കാവി പാര്‍ട്ടി നേതൃത്വം നല്‍കുന്ന കേന്ദ്ര സര്‍ക്കാരിന്റെ പരിതാപകരമായ ഭരണസംവിധാനം ഇങ്ങനെയാണ്. ഇങ്ങനെയിരിക്കെയാണ്‌ മോദി യുസിസി നടപ്പാക്കുന്നതിനെക്കുറിച്ച്‌ ചിന്തിക്കുന്നത്.
കുപ്രസിദ്ധമായ അടിയന്തരാവസ്ഥക്കാലത്ത്‌ (1975-77) ജയില്‍വാസം അനുസ്മരിച്ചുകൊണ്ട്‌ അദ്ദേഹം പറഞ്ഞു, “അത്‌ ചരിത്രമാണ്‌, പലര്‍ക്കും ആ ചരിത്രം മനസ്സിലാകുന്നില്ല; പ്രധാനമന്ത്രി മോദിക്ക്‌ പോലും ഇത്‌ അറിയാത്തപ്പോള്‍, ഡിഎംകെ പാരമ്പര്യവുമായി സമന്വയിപ്പിച്ച്‌ ഞാന്‍ എന്ത്‌ പറയും? തന്റെ പാര്‍ട്ടിയെ ‘കുടുംബം’ എന്ന്‌ വിശേഷിപ്പിച്ച സ്റ്റാലിന്‍, കുടുംബ രാഷ്ട്രീയം എന്ന ആക്ഷേപം ഉന്നയിക്കുന്ന ബി.ജെ.പിക്ക്‌ തിരിച്ചടി നല്‍കി. ‘ഞങ്ങള്‍ കുടുംബ രാഷ്ട്രീയം ചെയ്യുന്നു, ശരിയാണ്‌, ഇതാണ്‌ കുടുംബ രാഷ്ട്രീയം’ എന്ന്‌ മോദി ആരോപിച്ചതായി മുഖ്യമന്ത്രി പറഞ്ഞു. ഡിഎംകെയില്‍ കുടുംബങ്ങള്‍ ഉള്‍പ്പെടുന്നു, അത്‌ സൂചിപ്പിച്ചതിന്‌ ഞാന്‍ അദ്ദേഹത്തിന്‌ നന്ദി പറയുന്നു.
പാര്‍ട്ടി സ്ഥാപകന്‍ സി എന്‍ അണ്ണാദുരൈ കേഡര്‍മാരെ ‘തമ്പി’ (ഇളയ സഹോദരന്‍) എന്നും അന്തരിച്ച പാര്‍ട്ടി കുലപതി
എം കരുണാനിധി പാര്‍ട്ടി പ്രവര്‍ത്തകരെയും ജനങ്ങളെയും ‘ഉടന്‍പിറപ്പേ’ (സഹോദരന്മാർ/സഹോദരിർ) എന്നുമാണ്
അഭിസംബോധന ചെയ്തിരുന്നത്. പാര്‍ട്ടി സമ്മേളനങ്ങളിലും പ്രകടനങ്ങളിലും കുടുംബാംഗങ്ങളോടൊപ്പം പങ്കെടുക്കാന്‍ കലൈഞ്ജര്‍ (കരുണാനിധി) കേഡര്‍മാരെ ക്ഷണിക്കാറുണ്ടായിരുന്നു. അതാണ്‌ ദ്രാവിഡ പ്രസ്ഥാനത്തിന്റെ രീതി. ഒരു കുടുംബമെന്ന നിലയില്‍ ഡിഎംകെയുടെ പാരമ്പര്യം അങ്ങനെയായിരുന്നു.
ഡിഎംകെയ്ക്ക്‌ വോട്ട്‌ ചെയ്താല്‍ കരുണാനിധിയുടെ കുടുംബത്തിന്റെ വളര്‍ച്ചയ്ക്ക്‌ മാത്രമേ സഹായിക്കൂ എന്നായിരുന്നു മോദിയുടെ പരാമര്‍ശമെന്ന്‌ സ്റ്റാലിന്‍ പറഞ്ഞു. “അതെ, കരുണാനിധിയുടെ കുടുംബം തമിഴ്‌നാടും തമിഴ്‌ ജനതയുമാണ്‌.” അടിയന്തരാവസ്ഥക്കാലത്ത്‌ ജയിലില്‍ കിടന്നവരെയെല്ലാം തന്റെ മക്കളായാണ്‌ കരുണാനിധി കരുതിയിരുന്നത്‌. അതിനാല്‍, പ്രധാനമന്ത്രിയുടെ കുടുംബ രാഷ്ട്രീയ പരാമര്‍ശം ഒരു കുടുംബമെന്ന നിലയില്‍ ഒരുമിച്ച്‌ നില്‍ക്കാനുള്ള പാര്‍ട്ടിയുടെ പാരമ്പര്യവുമായി പൊരുത്തപ്പെടുന്നു. കഴിഞ്ഞ 50 വര്‍ഷമായി ദ്രാവിഡ പ്രസ്ഥാനമാണ്‌ തമിഴ്നാട് ഭരിക്കുന്നത്‌. കഴിഞ്ഞ 50 വര്‍ഷമായി തമിഴ്നാട് കൈവരിച്ച വളര്‍ച്ച വിലയിരുത്തിയ ശേഷം പ്രധാനമന്ത്രി സംസാരിക്കണമെന്നാണ്‌ എന്റെ അഭ്യര്‍ത്ഥന.
കരുണാനിധി (1924-2018) ആധുനിക തമിഴ്‌നാടിന്റെ ശില്പിയാണെന്നും അദ്ദേഹത്തിന്റെ ജന്മശതാബ്ദി (2023-24)
ഇപ്പോള്‍ ആഘോഷിക്കുകയാണെന്നും മുഖ്യമന്ത്രി പറഞ്ഞു. അന്തരിച്ച നേതാവിന്റെ ‘നേട്ടങ്ങളുടെ പട്ടിക’ അടിവരയിട്ട്‌, നിലവിലെ ഡിഎംകെ ഭരണം കരുണാനിധിയുടെ പാത പിന്തുടരുകയാണെന്നും സാമൂഹിക നീതിയുടെ നേതൃത്വത്തിലുള്ള ദ്രാവിഡ മാതൃക സദ്ഭരണം ജനങ്ങള്‍ക്ക്‌ നല്‍കിയെന്നും അദ്ദേഹം പറഞ്ഞു.
“ഇത്‌ നിങ്ങളുടെ സര്‍ക്കാരാണ്‌ (ടിഎന്‍ സംസ്ഥാന സര്‍ക്കാര്‍), ഇതാണ്‌ ദ്രാവിഡ ഭരണ മാത്യക,” 2021 ലെ നിയമസഭാ
തെരഞ്ഞെടുപ്പിന്‌ മുന്നോടിയായി ഡിഎംകെ ജനങ്ങള്‍ക്ക്‌ നല്‍കിയ എല്ലാ ഉറപ്പുകളും പാലിക്കപ്പെടുകയാണെന്നും അദ്ദേഹം ആവര്‍ത്തിച്ചു. 2021-ല്‍ ഡി.എം.കെ.യെ സംസ്ഥാനത്ത്‌ അധികാരത്തിലെത്തിക്കാന്‍ ജനങ്ങള്‍ വോട്ട്‌ ചെയ്തു, അതുപോലെ, 2024-ല്‍ കേന്ദ്രത്തില്‍ മതേതരവും സംസ്ഥാനങ്ങള്‍ക്ക്‌ അര്‍ഹമായ അവകാശങ്ങള്‍ നല്‍കുന്നതുമായ ഒരു ഭരണം കൊണ്ടുവരാന്‍ അവര്‍ തയ്യാറാകണം. മുതിര്‍ന്ന പാര്‍ട്ടി ഭാരവാഹിയുടെ കൊച്ചുമകളുടെ വിവാഹ ചടങ്ങില്‍ അദ്ധ്യക്ഷത വഹിച്ച്‌ സംസാരിക്കവെയാണ്‌ സ്റ്റാലിന്‍ ഇക്കാര്യം പറഞ്ഞത്‌. ഡിഎംകെ ആസ്ഥാനമായ “അണ്ണാ അറിവാലയം’ വളപ്പിലെ ഓഡിറ്റോറിയത്തിലായിരുന്നു വിവാഹം.
