ചെന്നൈ: തമിഴ് സൂപ്പർതാരവും എംഎൻഎം സ്ഥാപക പ്രസിഡന്റുമായ കമൽഹാസൻ പൊതുതെരഞ്ഞെടുപ്പിൽ കോയമ്പത്തൂർ ലോക്‌സഭാ മണ്ഡലത്തിൽ മത്സരിച്ചേക്കും. കമൽഹാസന് ഡിഎംകെ കോയമ്പത്തൂർ സീറ്റ് നൽകിയേക്കുമെന്നാണ് റിപ്പോർട്ടുകൾ.
2021ലെ നിയമസഭാ തെരഞ്ഞെടുപ്പിലും അദ്ദേഹം മികച്ച പ്രകടനം നടത്തി, ബിജെപിയുടെ വാനതി ശ്രീനിവാസനോട് 1,728 വോട്ടിന്റെ ചെറിയ വ്യത്യാസത്തിൽ പരാജയപ്പെട്ടു. കോയമ്പത്തൂർ സൗത്ത് അസംബ്ലി നിയോജകമണ്ഡലത്തിൽ എംഎൻഎമ്മിന്റെ സംസ്ഥാനതല ജനസമ്പർക്ക കാമ്പയിൻ അദ്ദേഹം ഉദ്ഘാടനം ചെയ്തു. തമിഴ്‌നാട്ടിലെ 234 നിയമസഭാ മണ്ഡലങ്ങളിലെയും ജനങ്ങളെ കാണാനും പാർട്ടി നേതാക്കളും കേഡർമാരും വാർഡ്, പഞ്ചായത്ത് തലങ്ങളിൽ ജനങ്ങളെ കാണാനും അവർ നേരിടുന്ന പ്രശ്‌നങ്ങൾ ചർച്ച ചെയ്യാനും എംഎൻഎം പദ്ധതിയിടുന്നുണ്ട്. അതത് മണ്ഡലങ്ങളിലെ ജനപ്രതിനിധികൾ അവഗണിക്കുന്ന വിഷയങ്ങളും ഇതിൽ ഉൾപ്പെടുന്നു.
പ്രദേശത്തെ ജനങ്ങളിൽ നിന്ന് ലഭിക്കുന്ന ഫീഡ്‌ബാക്ക് അടിസ്ഥാനമാക്കിയാണ് എംഎൻഎം തിരഞ്ഞെടുപ്പ് പ്രകടന പത്രിക തയ്യാറാക്കുകയെന്ന് പാർട്ടിയിലെ മുതിർന്ന നേതാവ് പറഞ്ഞു. ഓരോ വാർഡ് സെക്രട്ടറിക്കും അവരുടെ പ്രദേശത്തെ അടിസ്ഥാന സൗകര്യങ്ങളെക്കുറിച്ചുള്ള 25 ബൈനറി ചോദ്യങ്ങളുടെ ലിസ്റ്റ് ഗൂഗിൾ ഫോമിൽ നൽകിയിട്ടുണ്ടെന്നും ഓരോ മണ്ഡലത്തെക്കുറിച്ചും വ്യക്തമായ ചിത്രം ലഭിക്കുന്നതിന് ഫീഡ്‌ബാക്ക് ഉപയോഗിക്കുമെന്നും പാർട്ടി നേതൃത്വം അറിയിച്ചു. 2024ലെ ലോക്‌സഭാ തിരഞ്ഞെടുപ്പിൽ കോയമ്പത്തൂർ സീറ്റിൽ മത്സരിക്കണമെന്ന് പാർട്ടിയുടെ കോയമ്പത്തൂർ ജില്ലാ ഭാരവാഹികൾ തമിഴ് സൂപ്പർതാരത്തോട് അഭ്യർഥിച്ചിട്ടുണ്ടെന്ന് എംഎൻഎം വൃത്തങ്ങൾ അറിയിച്ചു.
ഡിഎംകെ നേതാവ് കനിമൊഴി ബസിൽ കയറിയതുമായി ബന്ധപ്പെട്ട വിവാദത്തെ തുടർന്ന് ജോലിയിൽ നിന്ന് പിരിച്ചുവിട്ട തമിഴ്‌നാട്ടിൽ നിന്നുള്ള ബസ് ഡ്രൈവർ ശർമിളയ്ക്ക് കമൽഹാസൻ അടുത്തിടെ ഒരു കാർ സമ്മാനിച്ചത് ശ്രദ്ധേയമാണ്. കനിമൊഴിയോട് ടിക്കറ്റ് നിരക്ക് ചോദിച്ച ബസ് കണ്ടക്ടറുമായി ശർമിള തർക്കത്തിലേർപ്പെട്ടു. ഇതേതുടർന്നാണ് ബസ് ഉടമ ശർമിളയെ ജോലിയിൽ നിന്ന് പുറത്താക്കിയത്. കമൽഹാസൻ അവരെ ചെന്നൈയിലെ വീട്ടിലേക്ക് ക്ഷണിക്കുകയും ഉപജീവനത്തിനായി ഓടിക്കാൻ കഴിയുന്ന ഒരു പുതിയ കാർ സമ്മാനിക്കുകയും ചെയ്തു.
