വാഷിംഗ്ടണ്‍: മാലിദ്വീപിലെ ഐസിസ്, അൽ ഖ്വയ്ദ തുടങ്ങിയ ഭീകര സംഘടനകളെ പിന്തുണയ്ക്കുന്നവർക്കെതിരെ യുഎസ് ശക്തമായ നടപടി സ്വീകരിച്ചു. മാലിദ്വീപിലെ തീവ്രവാദ സംഘടനകൾക്ക് സാമ്പത്തിക സഹായം നൽകിയതിന് 20 വ്യക്തികൾക്കും 29 കമ്പനികൾക്കും യുഎസ് ഉപരോധം ഏര്‍പ്പെടുത്തിയതായി റിപ്പോർട്ട്.
ഉപരോധം ഏര്‍പ്പെടുത്തിയവരില്‍ പലരും മാധ്യമ പ്രവർത്തകർക്കും പ്രാദേശിക ഉദ്യോഗസ്ഥർക്കും എതിരെ ആക്രമണങ്ങൾ ആസൂത്രണം ചെയ്തവരാണെന്ന് യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് മാത്യു മില്ലർ പറഞ്ഞു. ഇവര്‍ക്ക് ലഭിക്കുന്ന സഹായം തടയുകയും തടസ്സപ്പെടുത്തുകയും ചെയ്യുന്നത് തുടരും. യുഎസ് ട്രഷറിയും സ്റ്റേറ്റ് ഡിപ്പാർട്ട്‌മെന്റുകളും 18 ഐഎസിനും ISIS-ഖൊറാസനും (ISIS- കെ) ഫെസിലിറ്റേറ്റർമാർ, മാലിദ്വീപിലെ രണ്ട് അൽ-ഖ്വയ്ദ പ്രവർത്തകർ, കൂടാതെ 29 അനുബന്ധ കമ്പനികൾക്കുമാണ് ഉപരോധം ഏര്‍പ്പെടുത്തിയിരിക്കുന്നത്.
ഐസിസ്-കെയിലേക്ക് റിക്രൂട്ട്‌മെന്റ് നടത്തിയെന്നാരോപിച്ച് ഉപരോധം ഏര്‍പ്പെടുത്തിയവരുടെ പട്ടികയിൽ മുഹമ്മദ് അമീന്റെ പേരും ചേർത്തിട്ടുണ്ട്. ഐഎസിന്റെ പ്രധാന റിക്രൂട്ടർമാരിൽ ഒരാളാണ് ഇയാളെന്ന് കരുതപ്പെടുന്നു. മുഹമ്മദ് അമിനെ 2019-ൽ യുഎസ് തീവ്രവാദിയായി പ്രഖ്യാപിച്ചതാണ്. പ്രാദേശികമായും അന്തർദേശീയമായും ഈ തീവ്രവാദ സംഘടനകളെ പിന്തുണയ്ക്കുന്ന ഈ നെറ്റ്‌വർക്കുകളെയാണ് അമേരിക്ക ലക്ഷ്യമിടുന്നതെന്ന് യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് മില്ലർ പറഞ്ഞു.
ഭീകര സംഘടനയ്ക്ക് ആക്രമണം നടത്താനുള്ള പണവും വിഭവങ്ങളും നഷ്ടപ്പെടുത്തുക എന്നതാണ് യുഎസിന്റെ ലക്ഷ്യം. ഐഎസ്ഐഎസ് പ്രവർത്തനങ്ങൾക്ക് ധനസഹായം നൽകാനും സാധ്യതയുള്ള അംഗങ്ങളെ തിരിച്ചറിയാനും ശ്രമിക്കുന്ന മാലിദ്വീപ് ആസ്ഥാനമായുള്ള കാർട്ടലിൽ പങ്കെടുക്കുന്നവരുടെ പേരുകളും പുതിയ ഉപരോധത്തിൽ ഉൾപ്പെടുന്നു.
ഈ തീവ്രവാദ പിന്തുണ ശൃംഖലകൾക്ക് ധനസഹായവും വിഭവങ്ങളും നഷ്ടപ്പെടുത്താനും പ്രാദേശികമായും അന്തർദ്ദേശീയമായും അവർ ഉയർത്തുന്ന ഭീഷണികളെ ചെറുക്കാനും യുഎസ് പ്രതിജ്ഞാബദ്ധമാണെന്ന് തീവ്രവാദ, സാമ്പത്തിക ഇന്റലിജൻസ് അണ്ടർ സെക്രട്ടറി ബ്രയാൻ നെൽസൺ പറഞ്ഞു.
